كەشە قازاق جۇرتى قاراورمان حالقىنىڭ قامىن كۇيتتەپ, ۇلتتىڭ ۇلى ءسوزىن سويلەپ وتكەن اسا كورنەكتى قايراتكەر, حالىق جازۋشىسى, مەملەكەتتىك سىيلىقتىڭ لاۋرەاتى شەرحان مۇرتازاداي اياۋلى ۇلىمەن قوشتاستى.
مەملەكەت باسشىسى نۇرسۇلتان نازارباەۆ: «شەرحان مۇرتازا قازاق جۋرناليستەرىنىڭ بىرنەشە بۋىنىن تاربيەلەگەن ۇلتتىق ءباسپاسوزدىڭ بيىك بايتەرەگى ەدى. قاشاندا ادىلدىك پەن اقيقاتتىڭ الداسپانى بولعانى ءۇشىن قارا ءسوزدىڭ زەرگەرى, شىندىقتىڭ شىراقشىسى اتانعان شەرحان مۇرتازانى حالقى «شەراعاڭ» دەپ قادىر تۇتتى» دەپ اتاپ ايتقانداي, قوشتاسۋعا قاراقۇرىم ەل, شەراعاڭنىڭ شەكپەنىنەن شىققان شاكىرتتەرى جينالىپ, دارا تۇلعانىڭ تۋىسقاندارىنا, كۇللى قازاق جۇرتىنا قايعىرىپ كوڭىل ايتتى.
الماتىنىڭ مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا قارالى ميتينگىنى اشقان قازاقستان جازۋشىلار وداعى باسقارماسىنىڭ توراعاسى اقىن ۇلىقبەك ەسداۋلەت اقيقاتتىڭ الداسپانى, شىندىقتىڭ شىراقشىسى بولعان شەرحان مۇرتازانىڭ تاۋەلسىزدىك جىلدارىنداعى قوسقان ولشەۋسىز ۇلەسى تۋرالى ايتا كەلىپ, قايراتكەر قالامگەر تۋرالى «شەراعام ەل ىرگەسىن بەكىتۋدە ەلباسىمىز بىرەۋ, قالعانىمىز تىرەۋ بولۋىمىز كەرەك دەپ قيىن-قىستاۋ ساتتەردە ەلباسىنىڭ سەنىمدى سەرىگى بولا ءبىلدى, ەل بولاشاعى ءۇشىن كوك بايراقتىڭ استىنا تىزە قوسۋىمىز كەرەك دەپ قاداپ ايتتى. ونىڭ ارتىندا ۇرپاققا ميراس بولىپ ولمەيتىن شىعارمالارى قالدى, ارقىراعان ايباتتى, نايزاعايداي جارقىلداعان نامىسى قالدى» دەدى.
ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى قازاقستان پرەزيدەنتى نۇرسۇلتان نازارباەۆتىڭ «حالىقتىڭ شەراعاسىنا» اينالعان نار تۇلعالى قالامگەردىڭ, قارىمدى قوعام قايراتكەرىنىڭ اۋىر قازاسىنا بايلانىستى مارقۇمنىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن وقىپ بەردى. سونداي-اق قوشتاسۋ بارىسىندا سەنات توراعاسى ق.توقاەۆتىڭ, ءماجىلىس توراعاسى ن.نىعماتۋليننىڭ جانە ۇكىمەت باسشىسى ب.ساعىنتاەۆتىڭ كوڭىل ايتۋ حاتتارى وقىلدى.
الماتى قالاسىنىڭ اكىمى باۋىرجان بايبەك, شەرحان مۇرتازا تۋعان جامبىل وبلىسىنىڭ اكىمى اسقار مىرزاحمەتوۆ, ءماجىلىس دەپۋتاتى ساۋىتبەك ابدراحمانوۆ, اقىن نۇرلان ورازالين جانە باسقالارى ءسوز سويلەدى.
تاۋەلسىزدىكتىڭ ەلەڭ-الاڭىندا جەتپىس جىلدىق تاريحى بار پارتيالىق «سوتسياليستىك قازاقستاندى» ناعىز حالىقتىق «ەگەمەن قازاقستانعا» اينالدىرعان داڭقتى قالامگەر شەرحان مۇرتازانىڭ دەنەسى الماتىداعى كەڭساي زيراتىنا قويىلدى.
الاشتىڭ اياۋلى تۇلعاسىمەن قوشتاسۋعا ارنالعان قارالى ميتينگى استاناداعى «قازمەديا ورتالىعىنىڭ» كينوكونتسەرت زالىندا دا ءوتتى. جيىنعا اقپارات جانە كوممۋنيكاتسيالار ءمينيسترى داۋرەن اباەۆ, قازاق تەلەۆيزياسىنىڭ ارداگەرلەرى سۇلتان ورازالين, مەملەكەت جانە قوعام قايراتكەرى مىرزاتاي جولداسبەكوۆ قاتىسىپ, قالامگەردىڭ ءومىرى تۋرالى جارقىن ەستەلىكتەرمەن ءبولىستى.
اتىراۋ مەن التاي, الاتاۋ مەن ارقا اراسىنداعى قاراورمان قازاقپەن بىرگە اۋليەاتا حالقى دا ارداقتى ازاماتىن ازالادى. قايراتكەر تۇلعامەن تاراز قالاسىنداعى «جەڭىس» ساياباعىندا جامبىل جۇرتشىلىعى قيماي قوشتاستى. ساياباقتاعى شەرحان مۇرتازانىڭ ۇلكەن پورترەتى سالىنعان باننەرگە اۋليەاتالىقتار گۇل شوقتارىن قويىپ, مارقۇمنىڭ رۋحىنا تاعزىم ەتتى.
تالعات ءسۇيىنباي,
«ەگەمەن قازاقستان»
الماتى