ماڭعىستاۋدا «جارقىرا» الەۋمەتتىك باعدارلاماسى جۇزەگە اسپاق

باعدارلامانىڭ ايماقتىق ۇيلەستىرۋشىسى اسقار سەكەرباەۆتىڭ ايتۋىنشا, باعدارلاما ورتا ازيانى دامىتۋ قورى مەن «تەڭىزشەۆرويل» جشس-ءنىڭ قارجىلاي قولداۋىمەن جۇزەگە اسىپ كەلەدى. ماقسات- قوعامنىڭ الەۋمەتتىك, ەكونوميكالىق جانە ەكولوگيالىق ماسەلەلەرىنە تۇراقتى كاسىپكەرلىك شەشىمدەردى ۇسىنۋعا باعىتتالعان يننوۆاتسيالىق الەۋمەتتىك باستامالارعا سەرپىن بەرۋ. الەۋمەتتىك كاسىپكەرلىكپەن اينالىسامىن دەۋشىلەرگە 1,5 ملن- 3 ملن تەڭگە بولىنەدى. پايىزسىز قارىز 5 جىلعا بەرىلمەك.

- بۇل جوبا وتە ءتيىمدى. قازىر ۇسىنىلىپ جاتقان گرانتتاردىڭ ىشىندە ەڭ جوعارعى قارجى بولىپ سانالادى. كوبىنە ۇلكەن كولەمدەگى قارجىلار نەسيەگە بەرىلەدى. ماڭعىستاۋلىقتارعا قور قاراجاتى جاڭاشا باعىتتا كاسىپ دامىتۋعا سەپتىگىن تيگىزەتىنىنە سەنىم ارتامىن, دەيدى وڭىرلىك كاسىپكەرلەر پالاتاسىنىڭ ديرەكتورى نۇربەك قاراساەۆ.

2016-2018 جىلدار ارالىعىندا بۇل باعدارلاما اتىراۋدا جۇزەگە استى. وتكەن جىلدىڭ وزىندە مۇنايلى وڭىردە 7 الەۋمەتتىك-كاسىپكەرلىك جوبا دامىعان. بارلىعىنا 62 مىڭ دوللاردان استام قارجى بولىنگەن ەكەن.     

«جارقىرا» باعدارلاماسىنا قاتىسۋشىلاردىڭ جاسىنا شەكتەۋ قويىلمايدى. ءارى ونى ۇيرەنۋ تالاپتارى قاراپايىم. باعدارلاما ەكى كەزەڭنەن تۇرادى. ءبىرىنشى –الەۋمەتتىك يدەيالاردى ىرىكتەۋ كەزەڭى, ەكىنشى كەزەڭ- قاتىسۋشىلاردى تانىستىرۋ, سەمينار مەن دارىستەر وقۋ. سونداي-اق تاعىلىمدامادان ءوتىپ, كەڭەس بەرىلىپ, بيزنەس-جوبالارىن قورعاۋ. ياعني, الەۋمەتتىك يدەيانى بيزنەس جوسپارعا دەيىن جەتكىزۋ بارىسىن قامتيدى.

باعدارلاما ارقىلى الەۋمەتتىك كاسىپكەرلەر قوردان جىل سايىن قارجىلاي قولداۋ الۋىنا مۇمكىندىگى بار. باعدارلاما بالالار مەن جاستار, دەنساۋلىق ساقتاۋ, ء بىلىم بەرۋ, حالىق داستۇرلەرىن جانداندىرۋ, ەكولوگيا, سپورت, مادەنيەت جانە ونەر, وسال ادامدارعا قولداۋ كورسەتۋ: جالعىز, مۇگەدەكتەر, قارتتار, ورالماندار جانە ت.ب. باعىتتار بويىنشا جۇرگىزىلمەك.

باعدارلامانى جۇيەلى جۇرگىزۋ ءۇشىن ماڭعىستاۋ وبلىسى كاسىپكەرلەر پالاتاسى مەن ەۋرازيا ورتا ازيا قورى اراسىندا تۇسىنىستىك جونىندەگى مەموراندۋمعا قول قويىلدى.

گۇلايىم شىنتەمىرقىزى,

«ەگەمەن قازاقستان»

ماڭعىستاۋ وبلىس