قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «ەۋروپاداعى قاۋىپسىزدىك جانە ىنتىماقتاستىق ۇيىمىنىڭ قازاقستان رەسپۋبليكاسىنداعى قىزمەتىنە 20 جىل: ىنتىماقتاستىق پەن جەتىستىكتەر:» اتتى حالىقارالىق كونفەرەنتسياعا قاتىستى, دەپ حابارلايدى اقوردانىڭ ءباسپاسوز قىزمەتى.
جيىندى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى, قازاقستان رەسپۋبليكاسىنىڭ تۇڭعىش پرەزيدەنتى قورى, ەقىۇ-نىڭ استاناداعى باعدارلامالار ءوفيسى سىرتقى ىستەر مينيسترلىگىنىڭ قولداۋىمەن ۇيىمداستىردى.
كونفەرەنتسيانىڭ ماقساتى – ەكى جاقتى ىنتىماقتاستىقتىڭ 20 جىلدىعىنا وراي جاھاندىق الەمدەگى ەقىۇ-نىڭ ءرولىن جانە ونىڭ قازاقستان رەسپۋبليكاسىمەن ءوزارا ىقپالداستىعى ماسەلەلەرىن تالقىلاۋ.
ءىس-شاراعا, سونداي-اق ەقىۇ باس حاتشىسى ت.گرەمينگەر, سىرتقى ىستەر ءمينيسترى ق.ءابدىراحمانوۆ, پرەزيدەنت كەڭسەسىنىڭ باستىعى م.قاسىمبەكوۆ, پارلامەنت دەپۋتاتتارى, مەملەكەتتىك ورگانداردىڭ, ديپلوماتيالىق ميسسيانىڭ, عىلىمي-ساراپتامالىق قوعامداستىقتىڭ, جوعارى وقۋ ورىندارىنىڭ, ازاماتتىق قوعامنىڭ وكىلدەرى قاتىستى.
باسقوسۋدى اشقان گۇلشارا ابدىقالىقوۆا كونفەرەنتسياعا قاتىسۋشىلارعا مەملەكەت باسشىسى ن.نازارباەۆتىڭ قۇتتىقتاۋ ءسوزىن وقىپ بەردى. وندا: «2010 جىلى وسى بەدەلدى ۇيىمدى باسقارعان جانە بۇگىندە ونىڭ جۇمىسىنا بەلسەندى اتسالىسىپ كەلە جاتقان مەملەكەت رەتىندە ءبىز ءۇشىن بۇل وقيعانىڭ ماڭىزى زور. ەقىۇ-عا توراعالىعىمىز وڭىرلىك جانە حالىقارالىق قاۋىپسىزدىكتى قامتاماسىز ەتۋ ىسىنە ۇلەس قوسۋعا, ۇيىمدى باسقارۋ ءۇشىن سەنىمگە, ساباقتاستىققا, اشىقتىق پەن توزىمدىلىككە نەگىزدەلگەن جاۋاپتى كوزقاراس تانىتۋعا مۇمكىندىك بەردى. قازىرگى كەزەڭدەگى حالىقارالىق قاتىناستار ترانسفورماتسياسى جاعدايىندا ەقىۇ قاۋىپسىزدىكتىڭ جاڭا ارحيتەكتۋراسىنىڭ نەگىزگى ەلەمەنتىنىڭ ءبىرى بولىپ قالا بەرەتىنى ايتىلعان».
قازاقستاننىڭ ەقىۇ-مەن ىنتىماقتاستىعى قىزمەتتىڭ اسكەري-ساياسي, ەكونوميكا-ەكولوگيالىق, گۋمانيتارلىق سياقتى ءۇش ولشەمىنە سايكەس جۇرگىزىلىپ كەلەدى جانە ۇيىمنىڭ ورتالىق ينستيتۋتتارىمەن قاتار, ونىڭ وڭىردەگى ميسسياسى – ەقىۇ-نىڭ استاناداعى باعدارلامالار وفيسىمەن ءوزارا ىقپالداستىقتا جۇزەگە اسىرىلادى.
ەقىۇ-نىڭ استانا ءسامميتىنىڭ مۇراسىن دامىتۋ قازاقستاننىڭ ۇيىمداعى الداعى جىلداردا اتقاراتىن قىزمەتىنىڭ نەگىزگى وزەگى بولىپ قالا بەرمەك.