مەملەكەت باسشىسى 5 قازان كۇنى جاريالاعان جولداۋدا ء«بىلىم ساپاسىن باعالاۋ جۇيەسى حالىقارالىق ستاندارتتارعا نەگىزدەلۋگە ءتيىس. ورتا مەكتەپتەردىڭ وزىندە بالالاردى مەيلىنشە سۇرانىسقا يە ماماندىقتارعا بەيىمدەپ, كاسىبي دياگنوستيكا جۇرگىزۋ ماڭىزدى», دەپ تاپسىردى. بولاشاقتا قىزمەتكەر ءوز ماماندىعىن بەس-التى رەت وزگەرتۋگە تۋرا كەلەدى. عالىمداردىڭ بولجامى بويىنشا, 2020 جىلدىڭ وزىندە 5 ملن ادام جۇمىسسىز قالادى ەكەن. قاتال ەڭبەك نارىعىندا ۇزدىكسىز دامۋدى تاڭداعان مامان عانا سۇرانىسقا يە بولادى.
كەشە ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنە اقش ەلشىلىگىنىڭ مادەنيەت جانە ءبىلىم جونىندەگى كومەكشىسى لەنس ەريكسون ارنايى ساپارمەن كەلدى. ستراتەگيالىق دامۋ جونىندەگى پرورەكتور ق.شۇنكەەۆ ەلشىلىك وكىلىنىڭ ساپارىنا ساتتىلىك تىلەپ, وقۋ ورداسىنىڭ دامۋ جوسپارىمەن تانىستىردى.
كەزدەسۋدە جۇبانوۆ ۋنيۆەرسيتەتى مەن اقش عىلىمي ورتالىقتارى, جوعارى وقۋ ورىندارى اراسىندا بايلانىستاردى نىعايتۋ, بىرىككەن عىلىمي جوبالاردى كوبەيتۋ, سىرتقى اكادەميالىق ۇتقىرلىق باعدارلاماسى تالقىلاندى. حالىقارالىق ىنتىماقتاستىق ورتالىعىنىڭ باستىعى گۇلجان شوقىم وقىتۋشىلار مەن ستۋدەنتتەرگە قاتىستى بىرنەشە جوبانى بايانداپ, ۇسىنىستارىن ايتتى.
لەنس ەريكسون: «قازاقستانعا كەلگەنىمە ءۇش اي بولدى. عىلىم جانە مادەنيەت سالاسىن زەرتتەپ, جۇمىس جوسپارىن پىسىقتاپ جاتىرمىز. كەلۋىمنىڭ باستى ماقساتى - ۋنيۆەرسيتەتپەن جاقىنىراق تانىسۋ, امەريكاندىق وقۋ ورىندارىمەن قارىم-قاتىناس ورناتۋعا كومەكتەسۋ, سونداي-اق قازاقستانداعى اقش ەلشىلىگىنىڭ وقۋ باعدارلامالارى تۋرالى اقپارات تاراتۋ», دەدى.
كەزدەسۋدەن سوڭ لەنس ەريكسون ستۋدەنتتەر سارايىندا «Education USA Fair 2018» كورمەسىن ارالادى. اقش ەلشىلىگى, حالىقارالىق ءبىلىم بەرۋدىڭ امەريكالىق كەڭەسى قاتىسۋىمەن ۇيىمداستىرىلعان كورمەنىڭ ەرەكشەلىگى - اقش كوللەدجدەرى مەن ۋنيۆەرسيتەتتەرىنە ءتۇسۋ جولدارى تۋرالى اقتوبەلىك جاستارعا تولىق ماعلۇمات بەرە الدى. باكالاۆريات, ماگيستراتۋرا مەن دوكتورانتۋراعا شاقىرعان ون بەس ءتۇرلى وقۋ ورىندارى ىشىندە مەملەكەتتىك جانە جەكەمەنشىك, الەمدىك رەيتينگتە العاشقى وندىقتا تۇرعان تانىمال جوو مەن تىپ-تىنىش قالاشىقتا ورنالاسقان كوللەدجدەر بار.
امەريكالىق ءبىلىم جۇيەسىنىڭ الۋان ءتۇرلى ۇسىنىستارىن شولىپ شىققان مىڭداعان ستۋدەنتتەر مەن وقۋشىلار سۇراقتارىن ەمىن-ەركىن اعىلشىن تىلىندە قويىپ جاتىر. اقش-تان كەلگەن وكىلدەر مەن ەرىكتىلەر (ۆولونتەر) مىقتاپ دايىندالىپ كەلگەن ەكەن, جارنامالىق بۋكلەتتەر مەن كادەسىيلارىن تاراتىپ, مەيىلىنشە ءتۇسىندىرىپ باقتى. كورمەدەن سوڭ لەنس ەريكسون باستاعان وكىلدەر ستۋدەنتتەر سارايىنىڭ كورەرمەندەر زالىندا اقش ءبىلىم جۇيەسى, تالاپكەرلەر ءۇشىن قاجەتتى قۇجاتتار, ەلشىلىك تاراپىنان كورسەتىلەتىن كومەك جولدارى تۋرالى بايانداپ, سۇراقتارعا جاۋاپ بەردى. ءۇش تىلدىلىك ساياساتتىڭ جەمىسىن مەكتەپ وقۋشىلارى كورسەتتى. «اعىلشىن ءتىلىن كىم ەركىن تۇسىنەدى؟» دەگەن سۇراققا كورەرمەندەردىڭ باسىم بولىگى قول كوتەردى. سۇراقتارىن قويىپ, تىكەلەي سۇحباتتاسىپ وتىر. «شەت تىلدەرىن بىلمەۋ - ادامنىڭ ءوز مۇمكىندىگىن شەكتەۋى» دەگەن وسىندايدا ەسكە تۇسەدى.
ق.جۇبانوۆ اتىنداعى ۋنيۆەرسيتەت ايماقتاعى عىلىم-ءبىلىم پوتەنتسيالىنىڭ ۇلكەن ورتالىعى. وقۋ-بىلىمگە, عىلىمي جاڭالىقتارعا قاتىستى جيىندار, ماڭىزدى كەزدەسۋلەر ءجيى وتكىزىلىپ تۇرادى. ايماقتاعى دامۋ مەن سۇرانىس باعىتىن سارالاپ, كەرەكتى مامانداردى ەل ىشىنەن دە, شەتەلدەن دە شاقىرىپ, قىزمەتكەرلەردىڭ ءبىلىمىن جەتىلدىرىپ وتىراتىن جاقسى ءداستۇر قالىپتاسقان.
ايشۋاق دارمەن ۇلى,
ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى,
حالىقارالىق ىنتىماقتاستىق ورتالىعىنىڭ اعا عىلىمي قىزمەتكەرى