6-قازان كۇنى ارگەنتينادا جاسوسپىرىمدەردىڭ وليمپيادا ويىندارى باستالعان بولاتىن. بۋەنوس-ايرەستە ءوتىپ جاتقان جارىسقا قازاقستاننىڭ اتىنان 57 سپورتشى اتتانىپ, ولاردىڭ اراسىندا 4 ۆەلوشاباندوز بار. ۆەلوسپورتتان ەلىمىزدىڭ نامىسىن گلەب برۋسەنسكي, ەۆگەني فەدوروۆ, مارينا كۋرنوسوۆا جانە سۆەتلانا پاششەنكولار قورعايدى.
قازاقستاندىق شاباندوزدار تاس جولداعى ۆەلوسپورت پەن ماۋنتينبايكتەن تۇراتىن ارالاس جارىسقا قاتىسادى. ولار ءۇشىن جارىس باعدارلاماسى 13 قازان كۇنى جۇپتىق-كوماندالىق سىنمەن باستالادى. 14 قازان كۇنى جاس سپورتشىلار توپتىق جارىستا باق سىنايدى. ال 15-16 قازان كۇندەرى ماۋنتينبايكتەن, 17-قازان كريتەريۋم جارىسى وتەدى.
«جارىس جولىن ءبىز ءالى كورگەن جوقپىز, - دەپ اتاپ ءوتتى جاسوسپىرىمدەر قۇراماسىنىڭ جاتتىقتىرۋشىسى ۆاديم گورباچەۆسكي. – جولدى جارىس الدىندا عانا كورەمىز. جالپى تاس جول بۇل جاقتا جازىق ءارى قيىن ەمەس, تاۋ جوق. ءبىزدىڭ سپورتشىلارىمىزعا وسىنداي ايماق ىڭعايلى. جارىسقا 17 مەملەكەتتەن, ءار ەكى ادامنان قاتىسادى. بۇل 200 شاباندوز قاتىساتىن الەم چەمپيوناتى ەمەس. وسى ويىنداردا ءبىزدىڭ شامامەن 40-قا جۋىق قارسىلاستارىمىز بار.
بارلىق كوماندالاردىڭ قۇرامىندا ءبىر بايكەر جانە ءبىر تاس جولداعى ۆەلوسپورت شاباندوزى بار. ال بىزدە ەكەۋى دە تاس جولداعى ۆەلوسپورت شاباندوزدارى. بىراق, جالپى بيىلعى جىلى بايككە دە قاتىستىق. يسپانيادا دا, رەسەيدە دە بايككە, سول سەبەپتى ءبىز وعان دا دايىنبىز. ءبىز جاقسى قۇرال-سايماندارمەن قامتاماسىز ەتىلگەنبىز. ۆەلەسەبەدتەر دە ساتىپ الىندى. جالپى العاندا كوماندا دايىن. قازىر سوڭعى قىسقا, جىلدامدىققا ارنالعان, بەلسەندى جانە دەنە قىزدىرۋ جاتتىعۋلارى دا ءوتىپ جاتىر»
ەسكەرە كەتەتىن ءجايت, جاستار وليمپياداسىندا ۆەلوسپورتتان ارالاس جارىسقا ءبىر جيناق مەدال قاراستىرىلعان. ول بەس جارىس كۇنىنىڭ قورىتىندىسى بويىنشا كوماندالار اراسىندا ويناتىلاتىن بولادى. وسىلايشا جاسوسپىرىمدەر مەن ءجاسوسپىرىم قىزدار كوماندالارى ەل قورجىنىنا ەكى مەدال الىپ كەلۋىنە مۇمكىندىكتەرى بار.
«قازىر ءبىز وليمپيادا قالاشىعىندا جاتتىعۋ جاساپ جاتىرمىز, -دەيدى ءجاسوپىرىم قىزدار قۇراماسىنىڭ جاتتىقتىرۋشىسى ۆالەنتينا برۋسەنسكايا. جاعدايلارى جامان ەمەس. مارينا كۋرنوسوۆا مەن سۆەتلانا پاششەنكونىڭ سپورتتىق باپتارى وتە جاقسى. كوماندا قاجەتتى زاتتاردىڭ بارلىعىمەن جابدىقتالعان. ال ءبىزدىڭ ماقساتىمىز مەدال ءۇشىن لايىقتى باق سىناۋ»
جاسوسپىرىمدەر وليمپياداسى بۋەنوس-ايرەستە 6-18 قازان ارالىعىندا وتەدى. جارىسقا الەمنىڭ 206 مەملەكەتىنەن 18 جاسقا دەيىنگى 3900-دەن استام شاباندوز قاتىسادى.