قازان ايىنىڭ 10 كۇنى پولشانىڭ بالتىق تەڭىزىندەگى قاقپاسى, ەلدىڭ ءىرى عىلىمي – مادەني ورتالىقتارىنىڭ ءبىرى – گدانسك قالاسى, گدانسك مۋزەيىندە قر ۇلتتىق مۋزەيىنىڭ « ۇلى دالا مۇراسى: زەرگەرلىك ونەر جاۋھارلارى» اتتى كورمەسى ءوز جۇمىسىن باستادى.
قازاقستان رەسپۋبليكاسى پرەزيدەنتىنىڭ «رۋحاني جاڭعىرۋ» باعدارلاماسىنىڭ نەگىزىندە, «التىن ادامنىڭ الەم مۋزەيلەرىنە شەرۋى» حالىقارالىق كورمە جوباسىنىڭ اياسىنداعى شارا شەتەلدىك باق ءۇشىن ۇيىمداستىرىلعان ءباسپاسوز كونفەرەنتسياسىنان باستالدى. جۋرناليستەرمەن كەزدەسۋ بارىسىندا مەملەكەتىمىز تاريحىنىڭ ساق – ساۆرومات كەزەڭى, سول كونە داۋىردەن بۇگىنگە جەتىپ, وتاندىق عالىمداردىڭ قاجىرلى ەڭبەگىنىڭ ارقاسىندا زەرتتەلىپ, زەردەلەنگەن التىن بۇيىمدار, ولاردىڭ جاسالۋ تەحنولوگياسى مەن ەرەكشەلىكتەرى, قازاق حالقىنىڭ ارعى بابالارى بولىپ تابىلاتىن ساق تايپالارىنىڭ ءومىرى مەن دۇنيەتانىمى تۇرعىسىندا كەشەندى اقپاراتتار بەرىلدى. سونىمەن قاتار, كورمەگە قويىلعان قازاق حالقىنىڭ كۇمىستەن جاسالعان اشەكەي بۇيىمدارى دا تانىستىرىلىپ, پولياك ەلىنە جالپى سانى 300 - گە تاياۋ ەكسپوناتتاردىڭ جەتكىزىلگەندىگى ايتىلدى.
ءباسپاسوز كونفەرەنتسياسىنىڭ سوڭىن الا قر پولشا رەسپۋبليكاسىنداعى توتەنشە جانە وكىلەتتى ەلشىسى مارعۇلان بايمۇحان, گدانسك قالاسى باسشىسىنىڭ ورىنباسارى پەتر كوۆالچۋك, گدانسك مۋزەيىنىڭ ديرەكتورى لەونيد وسسوۆسكي مىرزالاردىڭ, ل.ن. گۋميلەۆ اتىنداعى ەۇۋ ارحەولوگيا عزي –ڭ ديرەكتورى مارال حابدۋلينانىڭ, قر مادەنيەت جانە سپورت مينيسترلىگى, قر ۇلتتىق مۋزەيى وكىلدەرىنىڭ قاتىسۋىمەن وتكەن كورمەنى اشۋ سالتاناتىنا: پولشا پارلامەنتىنىڭ دەپۋتتاتتارى, شەت مەملەكەتتەر ەلشىلىكتەرىنىڭ وكىلدەرى, جوعارى وقۋ ورىندارىنىڭ پروفەسسورلىق – وقىتۋشىلىق قۇرامى, كاسىپكەرلەر مەن ءبىلىم الۋشى جاستار قاتىناستى.
كەلۋشىلەردىڭ ۇلكەن قىزىعۋشىلىعىن تۋدىرعان كورمەنىڭ اشىلۋى بارىسىندا ونەر كورسەتىپ, ۇلتتىق جانە الەمدىك مۋزىكانىڭ كلاسسيكالىق تۋىندىلارىن ورىنداعان الماتىلىق «سازگەن سازى» فولكلورلىق – ەتنوگرافيالىق ءانسامبلى جينالعان قاۋىمنىڭ ىقىلاسىنا بولەندى.
وسىعان دەيىن ماسكەۋ, باكۋ, قحر-دىڭ سيان شاھارلارىندا قويىلعان كورمەنىڭ گدانسك مۋزەيىندەگى جۇمىسى جەلتوقسان ايىنىڭ 10 جۇلدىزىنا دەيىن جالعاساتىن بولادى.
جاندوس اۋەلبەك ۇلى,
«ەگەمەن قازاقستان»
گدانسك, پولشا