جازۋشىمەن قوشتاسۋعا زيالى قاۋىم وكىلدەرى, جازۋشىلار, قالامگەرلەر, الماتى اكىمى باۋىرجان بايبەك, قر مادەنيەت جانە سپورت ءمينيسترى ارىستانبەك مۇحامەدي ۇلى كەلدى.
مəدەنيەت جəنە سپورت ءمينيسترى ارىستانبەك مۇحامەدي ۇلى «بىر كەم دۇنيە دەپ شىرىلداپ وتكەن الاشتىڭ ارىسى شەراعاڭدى اقتىق ساپارعا شىعارىپ سالۋعا جينالىپ وتىرمىز. بۇل - بارشامىزعا ورتاق ورنى تولماس قازا. شەرحان مۇرتازانىڭ ەڭبەكتەرى ەل تاعدىرىمەن تامىرلاس. سونىمەن قاتار ول كىسى ورتامىزدا وتىرعان كوپتەگەن ازاماتتاردىڭ رۋحاني ۇستازى بولعان», - دەدى.
سونىمەن قاتار, مəدەنيەت جəنە سپورت ءمينيسترى ءمينيسترى پرەزيدەنت نۇرسۇلتان نازارباەۆتىڭ كوڭىل ايتۋ جەدەلحاتىن وقىپ بەردى.
«شەرحان مۇرتازا بۇكىل عۇمىرىن ءتول ادەبيەتىمىز بەن مادەنيەتىمىزدىڭ دامۋىنا ارناعان ءبىرتۋار ازامات, قازاقتىڭ مۇڭىن مۇڭداپ, جوعىن جوقتاعان نار تۇلعالى قالامگەر, قارىمدى قوعام قايراتكەرى بولدى. ۇلت رۋحانياتىندا وزىندىك قولتاڭباسى بار زاڭعار جازۋشى سوڭىنا مول مۇرا, ءورىستى ونەگە قالدىردى. شەرحان مۇرتازا قازاق جۋرناليستەرىنىڭ بىرنەشە بۋىنىن تاربيەلەگەن ۇلتتىق ءباسپاسوزدىڭ بيىك بايتەرەگى ەدى. قاشاندا ادىلدىك پەن اقيقاتتىڭ الداسپانى بولعانى ءۇشىن قارا ءسوزدىڭ زەرگەرى, شىندىقتىڭ شىراقشىسى اتانعان شەرحان مۇرتازانى حالقى «شەراعاڭ» دەپ قادىر تۇتتى. سوناۋ تەمىرتاۋداعى ەڭبەك جولىمنىڭ تىكەلەي كۋاسى بولعان ول تاۋەلسىز مەملەكەتتىڭ ىرگەسىن قالاعان جىلداردا دا جانىمدا ءجۇرىپ, ەلدى ىلگەرىلەتۋ ىسىنە زور ۇلەس قوستى».
ايتا كەتەيىك, قازاقستاننىڭ بەلگىلى جازۋشىسى, قوعام قايراتكەرى شەرحان مۇرتازا 9 قازان كۇنى 86 جاسىندا دۇنيەدەن ءوتتى.