كوكپەكتى اۋدانىنىڭ كوكجوتا اۋىلىندا ۇلتتىق ات سپورتى مەكتەبى قۇرىلدى. كوپ جىلدان بەرى شاعىن اۋىلدىڭ جاس شاباندوزدارىن شىنىقتىرىپ, اتتارىن باپتاپ, اۋدان نامىسىن وبلىستا ابىرويمەن قورعاپ جۇرگەن ارداگەر كوكپارشى قانات بيقاتوۆ اتالعان مەكتەپتىڭ تىزگىنىن ۇستادى.
جاقىندا اۋدان ورتالىعىندا بەكزادا ونەردىڭ كوكجيەگىن كەڭەيتەتىن تاعىلىمدى شارا وتكىزىلدى. جاستار ورتالىعىنىڭ مۇرىندىق بولۋىمەن 6 قازاندا ءار اۋىلدان جيناقتالعان 5 قۇراما اۋدان اكىمىنىڭ كۋبوگىن ساراپقا سالدى. «كوكپار ويىنى – ۇلتتىق مۇرامىز. جاستاردى ەپتىلىككە, توزىمدىلىككە, باتىلدىققا باۋليتىن سپورت بولعاندىقتان ونى دامىتۋعا اتسالىسۋ – ءبىزدىڭ مىندەتىمىز. اۋدانعا كەلگەن كۇننەن قامقورلىعىنا الىپ, جاعدايىمىزدى جاساپ, جۇمىستى جۇيەلى جولعا قويىپ جاتقان اسحات سايداحمەت ۇلىنا مىڭ العىس. بۇگىنگى كۇنى جاستار ورتالىعىنىڭ ديرەكتورى ازامات حالىق باستاپ قولعا الىپ جاتقان ازاماتتاردىڭ ءىسى قۋانتادى. ءار اۋىلدا, ءار وتباسىندا كوكپار وينايتىن بالۋاندار تاربيەلەسەك, ۇلتتىق نامىسىمىزدى مازداتامىز», – دەيدى يگى ءىستىڭ باسى-قاسىندا جۇرگەن كوكپارشى قانات بيقاتوۆ.
كىل مىقتىلار اراسىنان كاسىبيلىگىمەن باسىم تۇسكەن كوكجايىقتىڭ «ارداگەر» قۇراماسى اۋدان اكىمىنىڭ كۋبوگىن يەلەندى. جەڭىمپازدار قۇراماسىندا ويىن كورسەتكەن تاقىمى تاستاي بەرىك الىبەك ماۋلەن مەن ايگىلى اتبەگى نۇرجان سماعۇلوۆتىڭ ويىنى كورەرمەننىڭ ايىزىن قاندىردى. قۇرامىندا مۇراتقازى بەكىشەۆ, باتىر سماعۇل سىندى كوكجال ويىنشىلارى بار كوكپەكتى قۇراماسى 2-ورىندى يەلەنسە, تاسساي اۋىلىنىڭ كوكپارشىلارى 3-ورىندى ولجالادى. سونىمەن بىرگە ماماي اۋىلىنىڭ جانە اقوي جىگىتتەرىنەن جاساقتالعان كوكجايىقتىڭ ەكىنشى قۇرامالارىنىڭ كورسەتكەن ونەرى دە كورەرمەن كوڭىلىنەن شىقتى.
دارحان بەردىبەك,
شىعىس قازاقستان وبلىسى
كوكپەكتى اۋدانى