وبلىستىق ءماسليحاتتىڭ كەزەكتەن تىس سەسسياسىندا دەپۋتاتتار مەملەكەتتىك ساتىپ الۋدان ۇنەمدەلگەن 2 ملرد تەڭگەنىڭ قايدا جۇمسالاتىنىن ناقتىلادى. وسى قارجىنىڭ 452,6 ملن تەڭگەسى اۋليەكول اۋدانىنىنىڭ امانقاراعاي سەلوسىنداعى 240 ءۇيدى كوگىلدىر وتىنمەن قامتاماسىز ەتەتىن گاز تاراتۋ جەلىسى قۇرىلىسىنىڭ العاشقى ساتىسىنداعى جۇمىستارعا جانە گازدى پايدالانۋعا بەرۋگە ارنالعان تەحنيكالىق تولقۇجاتىن دايىنداۋعا جۇمسالاتىن بولدى. 404,5 ملن تەڭگە قوستاناي قالاسىنداعى كوشەلەر مەن ۇيلەردى, جاڭا تۇرعىن اۋدانداردى كوركەيتۋ جۇمىستارىنا باعىتتالادى.
ۇنەمدەلگەن قارجىدان 380,5 ملن تەڭگە «بينەستىڭ جول كارتاسى – 2020» باعدارلاماسى شەڭبەرىندە بەرىلەتىن نەسيەنىڭ ۇستەمە پروتسەنتىن سۋبسيديالاۋعا بولىنەدى. ول 101 كاسىپكەرگە قارجىلاي مەملەكەتتىك كومەك بەرۋگە جەتىپ ارتىلادى. تاران اۋدانىنداعى اۋىل مەكتەبىنە كۇردەلى جوندەۋ جۇمىسىن جۇرگىزۋگە 182,2 ملن, امانگەلدى اۋدانىنداعى جولداردى, كوشەلەردى ورتاشا جوندەۋگە جانە ارالىق-تورعاي جولىنىڭ اعىمداعى جوندەۋ جۇمىسىنا 133 ملن كەتەدى.
140 ملن تەڭگە ارقالىق قالاسىنىڭ قازاندىعى ءۇشىن 10 000 توننا مازۋتتى تاسۋعا بەرىلەدى. وبلىس اكىمى ارحيمەد مۇحامبەتوۆتىڭ ايتۋىنشا, بۇل مازۋتتىڭ قورىن جاساپ الۋعا, بيىل تۇرعىندار ءۇشىن جىلۋ ءتاريفىنىڭ كوتەرىلمەۋىنە كومەك بولادى. سونىمەن قاتار ۇنەمدەلگەن قارجىنى قوستاناي قالاسىنداعى شاعىن تۇرعىن اۋدان قازاندىعىنىڭ قۇرىلىسىن جالعاستىرۋعا, امانگەلدى اۋدانىنداعى 12 پاتەرلىك ءۇيدى ماماندارعا ارناپ قايتا جاڭعىرتۋعا, قوستاناي اۋدانىنداعى ءبىلىم سالاسىنىڭ قىزمەتكەرلەرىنىڭ ايلىق-جالاقىسىن كوتەرۋگە دە جەتكىزدى. قوستاناي قالاسىنداعى وبلىستىق تاريحي-ولكەتانۋ مۋزەيىنىڭ بالانسىنا وتكەن مەشىتتى ۇستاۋ, وبلىستىق فيلارمونيا ارتىستەرىنە ساحنالىق كيىم مەن كاچار كەنتىنىڭ مادەنيەت ءۇيىن جوندەۋ دە ۇنەمدەلگەن قارجىنىڭ موينىنا ءىلىندى.
ءنازيرا جارىمبەت,
«ەگەمەن قازاقستان»
قوستاناي