ءى.وماروۆ اتىنداعى وبلىستىق قازاق دراما تەاترىنىڭ شىعارماشىلىق ۇجىمى بيىلعى تەاتر ماۋسىمىن جاڭا باسشىلىقپەن باستادى. تەاتر ديرەكتورلاعىنا سابىرالى كەمەلباەۆ تاعايىندالدى. ال باس رەجيسسەر بولىپ ءاليا بايماحان كەلدى.
تەاتر استانا قالاسىنىڭ 20 جىلدىعىنا وراي ەلوردادا وتكەن شارالارعا بەلسەنە قاتىستى. 4-5 جىلدان بەرى رەسپۋبليكالىق تەاتر فەستيۆالدەرىنە قاتىسپاعان ۇجىم, كەلەر بايقاۋلارعا قويىلىمدار دايىنداۋدى كوزدەپ وتىر. تەاتردىڭ اشىلعانىنا 20 جىلعا جۋىق ۋاقىت بولدى. وسى جىلدار ىشىندە 15 جىل بويى ساحنادان تۇسپەي كەلە جاتقان, كورەرمەندەر سۇرانىسىمەن ءجيى قويىلاتىن شىعارمالار بار. دەگەنمەن وسى جىلدار ىشىندە ساحناداعى عۇمىرى ۇزاق بولماعان, تالعامسىز قويىلعان قويىلىمدار دا بولدى. تەاترعا جاڭا ديرەكتور, جاڭا كوركەمدىك جەتەكشىنىڭ كەلۋىنە بايلانىستى, ونەر ورداسىنىڭ شىعارماشىلىق ۇجىمى كورەرمەن كوڭىلىنەن شىعۋ ءۇشىن جۇمىستى بارىنشا شيراتىپ, جاڭاشا جوسپارلاۋعا, جۇرگىزۋگە بەتبۇرىس جاسادى.
«تەاتردىڭ ونەر ۇجىمىنىڭ شىعارماشىلىق الەۋەتى جوعارى, بارلىعى دا ءوز ءىسىنىڭ ماماندارى. رەپەرتۋار بارلىق تەاترلارداعى سەكىلدى بىزدە دە ىرىكتەۋدى, تاڭداۋدى قاجەت ەتەدى. ونى جاڭا رەجيسسەر الداعى ۋاقىتتا دامىتا تۇسەتىن بولادى. كورەرمەن كوڭىلىنەن شىعۋ ءۇشىن جۇمىستى ۇيىمداستىرۋدىڭ جاڭا ادىستەرىن, تسيفرلاندىرۋ جەتىستىكتەرىن, كورەرمەن سۇرانىسىن زەرتتەۋ سەكىلدى جان-جاقتى جۇمىس ىستەيمىز. تەاتر الداعى ۋاقىتتا گاسترولگە ءجيى شىعاتىن بولادى. سوندا ءبىز كورەرمەنگە جاقىن دا بولامىز, ءارى شىعارماشىلىق جاعىنان شىڭدالا دا تۇسەمىز» دەدى تەاتر ديرەكتورى سابىرالى كەمەلباەۆ وڭىرلىك كوممۋنيكاتسيا قىزمەتىنىڭ اقپاراتتىق الاڭىنا كەلىپ, جۋرناليستەرگە بەرگەن سۇحباتىندا.
ءنازيرا جارىمبەت,
«ەگەمەن قازاقستان»
قوستاناي