ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرىنە جانە حالىقتىڭ ءال-اۋقاتىن ودان ءارى ارتتىرۋ مىندەتتەرىنە ارنالعان ەلباسىنىڭ قازاقستان حالقىنا جولداۋى جاڭا بەلەستەرگە جول اشىپ وتىر.
بۇگىندە مادەني الەۋەتتى دامىتۋ الەمنىڭ كوپتەگەن مەملەكەتتەرىنىڭ نەگىزگى دامۋ باسىمدىقتارىنىڭ قاتارىنا جاتاتىنى بەلگىلى. استانا قالاسى سۋرەتشىلەر وداعىندا وتكەن القالى جيىندا ەل پرەزيدەنتىنىڭ جولداۋى اياسىنداعى اتقارىلاتىن شىعارماشىلىق جانە وندىرىستىك مۇمكىندىكتەر مەن مادەنيەتتىڭ ءرولىن ارتتىرۋ جونىندە ءسوز بولدى.
استانا قالاسى سۋرەتشىلەر وداعىنىڭ باسقارما توراعاسى جانۇزاق ءمۇساپىر جولداۋداعى شىعارماشىلىق قاۋىمعا قاراتا ايتىلعان مىندەتتەمەلەر جاڭا باعىت-باعداردى ايقىنداپ وتىرعانىن ايتتى. «قوعامنىڭ باستى بايلىعى – ادام بولسا, سول ادامدى تاربيەلەيتىن مادەنيەت پەن ونەر. مەملەكەت باسشىسىنىڭ جىل سايىنعى جولداۋلارى ەلىمىزدىڭ رۋحىن اسقاقتاتىپ, كۇش-قۋاتىن بىرىكتىرەتىن ماڭىزدى قۇجاتقا اينالدى», دەگەن باسقارما توراعاسى اتالعان رەفورمالاردى جۇزەگە اسىرۋدا اركىمنىڭ ءوز ءرولىن ايشىقتاۋدىڭ ماڭىزى تۋرالى ءسوز قوزعادى. ال قازاقستاننىڭ ەڭبەك سىڭىرگەن قايراتكەرى ەرلان ايتۋاروۆ ەلىمىزدەگى مادەنيەت سالاسىن دامىتۋدىڭ جالپى قاعيداتتارى مەن جەتىلدىرۋ جۇيەسى تۋراسىندا ايتىپ ءوتتى.
جيىنعا قاتىسۋشىلار الەۋمەتتىك-مادەني ورتا قالىپتاستىرۋ بويىنشا تىڭ ويلارىمەن ءبولىسىپ, حالىقارالىق كورمەلەر مەن سيمپوزيۋمدارعا قاتىسۋ, اسىرەسە جاستار ءۇشىن شىعارماشىلىق شەبەرحانا قۇرۋ جانە اعا ۇرپاقتى بىرىكتىرۋ سىندى ۇسىنىستارىن ورتاعا سالدى.
ايا ءومىرتاي,
«ەگەمەن قازاقستان»