ورتالىق كوممۋنيكاتسيالار قىزمەتىندە ەۋروپالىق وداقتىڭ «قازاقستانداعى قىلمىستىق ءادىل سوتتى جەتىلدىرۋ» جوباسىنىڭ (EUCJ) ۇشجىلدىق ناتيجەلەرىنە ارنالعان ءباسپاسوز ءماسليحاتى ءوتتى. شاراعا قازاقستان رەسپۋبليكاسىنداعى ەۋروپالىق وداق وكىلدىگىنىڭ ىنتىماقتاستىق ءبولىمىنىڭ باسشىسى يوحاننەس ستەنبەك مەدسەن, EUCJ جوباسىنىڭ باسشىلارى ساۋلە مەكتەپباەۆا جانە بيلل مەيزەر, سونىمەن قاتار تيلبۋرگ ۋنيۆەرسيتەتىنىڭ ۆيكتيمولوگيا پروفەسسورى يان ۆان دايك قاتىستى.
جيىن بارىسىندا ساۋلە مەكتەپباەۆا EUCJ جوباسىنىڭ نەگىزگى ماقساتى قازاقستان ۇكىمەتىنە حالىقارالىق ستاندارتتارعا سايكەس قىلمىستىق سوت تورەلىگىن رەفورمالاۋعا كومەكتەسۋ ەكەنىن العا تارتتى.
«جوبا شەڭبەرىندە جوسپارلانعان مىندەتتەردەن باسقا, ءبىز سەرىكتەستەرگە دامۋ ءۇشىن ءتيىمدى وزگەرىستەردى باسقارۋ ءادىسناماسى مەن جۇيەسىن ەنگىزۋگە كومەكتەستىك. EUCJ – باس پروكۋراتۋراعا, ىشكى ىستەر مينيسترلىگىنە جانە ءتيىستى اكادەميالارعا ينستيتۋتسيونالدىق وزگەرىستەر سالاسىندا ساراپتامالىق قولداۋ كورسەتەتىن العاشقى جوبا. جاڭا فورماتتاعى پروكۋراتۋرا قۇرۋعا ماقسات قويعان وزگەرىستەر باعدارلاماسى ناتيجەسىندە «پروكۋراتۋرا تۋرالى» جاڭا زاڭدا بەكىتىلگەن بىرقاتار ۇلكەن وزگەرىس ورىن الدى. «قۇقىق قورعاۋ قىزمەتتەرى ورتالىعى», «حالىق قاۋىپسىزدىگى مەن قۇقىق قورعاۋ ورگاندارىنا سەنىم» زەرتتەۋى, «ازاپسىز قوعام» ورتاق جوبالارى, كادرلىق جانە بايلانىستىق وزگەرىستەر جۇزەگە اسىرىلدى. EUCJ جوباسى ءىىم-گە پوليتسيا مودەرنيزاتسياسى ستراتەگياسىن قۇراستىرۋدا جانە 27 باس جوبانى انىقتاۋدا قولداۋ كورسەتتى. جوعارعى سوتپەن بىرلەسە اتقارىلعان ورتاق جۇمىستىڭ ناتيجەسىندە, سوت جۇيەسىنىڭ دامۋى جانە كوممۋنيكاتسيالىق ستراتەگيا بويىنشا 7 باعدارلاما ازىرلەندى. EUCJ-مەن سەرىكتەستىك بارلىق اتالعان ءۇش ورگانعا ءوز جوبالىق كەڭسەلەرىن اشۋعا مۇمكىندىك بەردى. قازاقستاندىق پروباتسيانىڭ ەڭ ۇزدىك مودەلدەرىن ىزدەستىرۋدە, قاجك زاڭ بۇزۋشىلاردان تۋىندايتىن قاتەردى باعالاۋ جۇيەسىن جانە پروباتسيا وفيتسەرلەرىنىڭ سوتپەن جۇمىس ىستەۋ مەحانيزمدەرىن العاش رەت EUCJ جوباسى قولداۋىمەن سىناقتان وتكىزدى. جالپى العاندا, مەملەكەتتىك ورگاندارداعى وزگەرىستەرگە قاتىستى باعدارلامالار مەن جوبالاردى ازىرلەۋگە 60-تان اسا جوعارى بىلىكتى EUCJ ساراپشىلارى قاتىستى. ءىرى سوتسيولوگيالىق جانە ەمپيريكالىق زەرتتەۋلەر جۇرگىزىلدى. سونداي-اق قاجك, قۇقىق قورعاۋ ورگاندارى اكادەمياسىنا جانە ىشكى ىستەر مينيسترلىگىنىڭ قوستاناي اكادەمياسىنا وقىتۋعا ارنالعان جاڭا جابدىقتار ساتىپ الىندى», دەدى جوبانىڭ وپەراتسيالىق جەتەكشىسى س.مەكتەپباەۆا.
ال EUCJ جوباسىنىڭ ستراتەگيالىق جەتەكشىسى بيلل مەيزەر قازاقستاندىق سەرىكتەستەرى – جوعارعى سوت, ىشكى ىستەر مينيسترلىگى, باس پروكۋراتۋرا, قۇقىق قورعاۋ ورگاندارى اكادەمياسىمەن جانە ىشكى ىستەر مينيسترلىگىنىڭ قوستاناي اكادەمياسىمەن كەلىسىلگەن جوبانىڭ بارلىق مىندەتتەرىن مەرزىمىنەن بۇرىن اياقتاعانىن جەتكىزدى.
ساراپشىلار EUCJ جوباسىنىڭ وسى جانە باسقا دا ناتيجەلەرىن, سوت جانە قۇقىق قورعاۋ جۇيەسىن ودان ءارى دامىتۋدىڭ ستراتەگياسىن 4 قازان كۇنى «قازاقستانداعى قىلمىستىق ءادىل سوت كەلەشەگى: ىزگىلەندىرۋدەن وزگەرىستەردى باسقارۋعا ءوتۋ» تاقىرىبىنداعى حالىقارالىق كونفەرەنتسيادا تالقىلايدى.
راۋان قايدار,
«ەگەمەن قازاقستان»