ۇلتتىق ۇلان باس قولباسشىسى رۋسلان جاقسىلىق باستاعان اسكەري دەلەگاتسيا وكىلدەرى رەسمي ساپارمەن ازەربايجانعا بارىپ قايتتى, دەپ حابارلايدى ۇلتتىق ۇلانىنىڭ ءباسپاسوز قىزمەتى.
ساپار بارىسىندا قازاستاندىق دەلەگاتسيا الدىمەن قۇرمەت اللەياسىنا تابان تىرەپ, ازەربايجان ەلىنىڭ كوسەمى گەيدار اليەۆتىڭ قابىرىنە گۇل شوقتارىن قويدى.
سونداي-اق قازاقستان ەلىنەن كەلگەن مەيماندار شەحيدتەر اللەياسىن ارالاپ, «ماڭگىلىك وت» مەماريالىنا گۇل شوقتارىن قويۋ ارقىلى ازەربايجاننىڭ تاۋەلسىزدىگى مەن اۋماق تۇتاستىعى جولىندا شەيت كەتكەن قاھارمانداردىڭ رۋحىنا تاعزىم ەتتى.
سودان كەيىن گەنەرال-لەيتەنانت ر.جاقسىلىقوۆ باستاعان دەلەگاتسياسى مۇشەلەرى الدىمەن ازەربايجان ىشكى ىستەر ءمينيسترى گەنەرال-پولكوۆنيك راميل ۋسۋبوۆپەن, كەيىن ازەربايجان ىشكى ىستەر ءمينيسترىنىڭ ورىنباسارى – ىشكى اسكەر قولباسشىسى گەنەرال-لەيتەنانت شاحين مامەدوۆپەن كەزدەسۋ وتكىزدى.
كەزدەسۋ اياسىندا ش.مامەدوۆ قازاقستان ۇلتتىق ۇلانى مەن ازەربايجان ىشكى اسكەرى اراسىنداعى قارىم-قاتىناستىڭ ماڭىزدىلىعىنا توقتالدى. سونىمەن قاتار, وسىنداي جىلى شىرايلى كەزدەسۋلەر ەكىجاقتى ىنتىماقتاستىقتى ودان ءارى كەڭەيتۋگە ىقپال ەتەتىنىنە سەنىم ءبىلدىردى.
تاراپتار ەكى ەلدىڭ ءار ءتۇرلى باعىتتاعى ءوزارا ءتيىمدى ىنتىماقتىستىعى ازەربايجان مەن قازاقستان مۇددەلەرىنە جۇمىس ىستەيتىنىن تىلگە تيەك ەتتى. سونداي-اق, مەيماندارعا ازەربايجان ىشكى اسكەرلەرىنىڭ قۇرىلىمى, دامۋى جانە جاۋىنگەرلىك جولى تۋرالى باياندالدى.
گەنەرال-لەيتەنانت ر.جاقسىلىقوۆ ءوز كەزەگىندە جوعارى دەڭگەيلى قابىلداۋعا العىسىن ءبىلدىرىپ, قازاقستان مەن ازەربايجان اراسىنداعى بايلانىستىڭ, ونىڭ ىشىندە قۇقىقتىق ءتارتىپ پەن قاۋىپسىزدىكتى قامتاماسىز ەتۋ ماسەلەسىندەگى قارىم-قاتىناستاردى نىعايتۋدىڭ ماڭىزدىلىعىنا تولقتالدى.
ەكىجاقتى كەزدەسۋ بارىسىندا باسقا دا ماسەلەلەر قاراستىرىلدى. سونىڭ ىشىندە, ازەربايجاندىق تاراپ جاۋىنگەرلەرىنىڭ قازاقستاندىق «كۇرەڭ بەرەت» كيۋ قۇقىعىنا ارنالعان بىلىكتىلىك سىناقتارىنا قاتىسۋى, ارنايى ماقساتتاعى بولىمشەلەردى جاۋىنگەرلىك جانە ادىستەمەلىك دايىنداۋ ورتالىعىندا وقىتۋ, تاۋلىق دايىندىقتا تاجىريبەمەن الماسۋ مەن نەسيەلىك باعدارلامالار ارقىلى ۇلتتىق ۇلان جاۋىنگەرلەرىنىڭ باسپانا ماسەلەسىن شەشۋگە باعىتتالعان تاجىريبەسىن زەرتتەۋ ماسەلەلەرى ءسوز ەتىلدى.
ساپار سوڭىندا, قازاقستاندىق دەلەگاتسيا ارنايى-تاكتيكالىق وقۋ-جاتتىعۋعا قاتىسىپ, ازەربايجان ىشكى اسكەرى جوعارى مەكتەبىن, باكۋ قالاسىنداعى اسكەري ءبولىمدى, گەيدار اليەۆ ورتالىعىن, ازەربايجان ەلىنىڭ تاريحي جانە مادەني ەسكەرتكىشتەرىن ارالادى.
شارا قورىتىندىسى بويىنشا 2019-2020 جىلدارعا ارنالعان ەكىجاقتى اسكەري ىنتىماقتاستىق جوسپارىن بەكىتۋ مەن جەتىلدىرۋ بويىنشا جانە قۇرىلۋى ءتيىس «قۇقىق قورعاۋ ورگاندارىنىڭ اسكەري ۆەدومستۆالارى جانە اسكەري مارتەبەسى بار قۇقىق قورعاۋ ورگاندارىنىڭ ەۋرازيالىق قاۋىمداستىعى» ۇيىمى اياسىندا جۇمىستى ودان ءارى جالعاستىرۋ بويىنشا كەلىسىمدەر ماقۇلداندى.