تۋريزم سالاسىنداعى ىنتىماقتاستىق تۋرالى مەموراندۋمعا قول قويىلدى

بۇگىنگى تاڭدا قازاقستان مەن گرەكيا اراسىنداعى ساۋدا-ەكونوميكالىق ىنتىماقتاستىقتىڭ ءوزارا ءتيىمدى الەۋەتى ءالى دە مول جانە كولىك, اۋىل شارۋاشىلىق, تۋريزم مەن قارجى سالالارىندا ايتارلىقتاي ءوسۋ كورسەتكىشتەرى بارشىلىق. اتالعان الەۋەتتى پايدالانۋدىڭ جولدارى تۋرالى افينادا وتكەن قازاقستان-گرەكيا ەكونوميكالىق جانە تەحنولوگيالىق ىنتىماقتاستىق جونىندەگى ۇكىمەتارالىق كوميسسياسىنىڭ (ۇاك) 4-ءشى وتىرىسى اياسىندا مۇددەلى سۇحبات بولدى.

كوميسسيانىڭ تەڭ-توراعالارى – قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو مەن گرەكيا سىرتقى ىستەر ءمينيسترىنىڭ ءبىرىنشى ورىنباسارى گەورگيوس كاترۋگالوس - بىرلەسە اتقاراتىن جۇمىستىڭ باعىتتارىن ايقىنداپ, ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋ تاقىرىپتارىنا جان-جاقتى توقتالدى. سونداي-اق گرەكيانىڭ قازاقستاننىڭ مەملەكەتتىك باعدارلامالارىنا قاتىسۋ مۇمكىندىگى تالقىلانىپ, گرەكيالىق قارجى ينستيتۋتتاردىڭ «استانا» حالىقارالىق قارجى ورتالىعىمەن تىعىز ىنتىماقتاستىعى جونىندەگى پەرسپەكتيۆالارى قاراستىرىلدى.

سوڭعى ەكى جىلدا, ياعني 2015-16 جىلدارى بەلگىلى ءبىر قۇلدىراۋدان كەيىن, ەكىجاقتى ساۋدادا وڭ ۇدەرىس بايقالادى. 2017 جىلى تاۋار اينالىمى 2016 جىلمەن سالىستىرعاندا 10,5 پايىزعا, ياعني 980,6 ملن. دوللارعا (ونىڭ ىشىندە قازاقستاندىق ەكسپورت – 964 ملن. دولل.) ۇلعايسا, ال 2018 جىلعى قاڭتار-شىلدە ايلارىندا, وتكەن جىلدىڭ ۇقساس كەزەڭىمەن سالىستىرعاندا, 20 پايىزعا ءوستى (ساۋدا كولەمى – 750 ملن. دولل., قر-دان ەكسپورت – 737,6 ملن. دولل.). سونداي-اق, جۋىردا قازاقستاندا كۇن ەلەكتر ستانتسيالارىنا ارنالعان فوتوەلەكتريكالىق كەشەندەردى دايىنداۋ, تەڭىز كەن ورىندارىن وڭدەۋ بويىنشا ينجينيرينگ جانە كىرپىش شىعارۋ سياقتى سالالاردا بىرقاتار جاڭا بىرلەسكەن قازاق-گرەك وندىرىستەرى ىسكە قوسىلدى.

افينادا وتكەن كەلىسسوزدەردە ەكىجاقتى شارتتار بازاسىنىڭ بۇگىنگى كۇيى مەن ونى بارىنشا كەڭەيتۋ ماسەلەسىنە ماڭىزدى كوڭىل ءبولىندى.

سونىمەن قاتار, وتكەن ءىس-شارادا قازاقستاننىڭ ەۋرازيالىق ەكونوميكالىق وداعىنداعى مۇشەلىگىن ەسكەرە وتىرىپ, ەكى ەل اراسىنداعى ىنتىماقتاستىقتىڭ پەرسپەكتيۆالارى, سونداي-اق تاراپتاردىڭ «بەلدەۋ مەن جول» باستاماسىن جۇزەگە اسىرۋ تۇرعىسىنان ءوزارا ءىس-قيمىلدى ىسكە اسىرۋ ماسەلەلەرى جان-جاقتى تالقىلاندى.

كوميسسيا وتىرىسىنا قازاقستاننىڭ مادەنيەت جانە سپورت, اۋىل شارۋاشىلىعى, ينۆەستيتسيالار جانە دامۋ مينيسترلىكتەرىنىڭ لاۋازىمدى تۇلعالارى قاتىستى.

وتىرىستىڭ قورىتىندىسى بويىنشا تاراپتاردىڭ قول جەتىزگەن نەگىزگى ۋاعدالاستىقتارى بەكىتىلگەن, ونىڭ ىشىندە جاقىن ارادا قىزمەتتىك پاسپورت يەلەرىن ۆيزالىق تالاپتاردان بوساتۋ تۋرالى كەلىسىمگە قول قويۋ ماسەلەسى دە ەنگىزىلگەن ۇكىمەتارالىق كوميسسيانىڭ حاتتاماسىنا قول قويىلدى.

گرەكيانىڭ تۋريزم سالاسىنداعى مول تاجىريبەسى مەن قازاقستاندا ءتۋريزمدى دامىتۋدىڭ 2025 جىلعا دەيىنگى مەملەكەتتىك باعدارلامانىڭ, سونىمەن قاتار تۋريستىك قىزمەتتى دامىتۋ تۋرالى جاڭا زاڭنىڭ ازىرلەنۋ ۇستىندە ەكەنىن نازارعا الا وتىرىپ, ەكى ەلدىڭ قۇزىرەتتى مينيسترلىكتەرى اراسىندا قول قويىلعان تۋريزم سالاسىنداعى ءوزارا تۇسىنىستىك پەن ىنتىماقتاستىق تۋرالى مەموراندۋم اتالعان ءىس-شارانىڭ تاعى ءبىر پراكتيكالىق ناتيجەسىنە اينالدى.

كەلىسسوزدەر قورىتىندىسى بويىنشا ەكى مەملەكەتتىڭ رەسمي تۇلعالارى قازاقستان مەن گرەكيا اراسىنداعى ساياسي جانە ەكونوميكالىق قارىم-قاتىناستاردا تولىق ءوزارا تۇسىنۋشىلىكتىڭ بار ەكەنىن ايرىقشا اتاپ ءوتىپ, ورتاق ىنتىماقتاستىقتى بارىنشا ارتتىرۋ مەن كەڭەيتۋگە ءوزارا قىزىعۋشىلىقتىڭ بارىن راستادى.