قوستانايداعى مارال يشان اتىنداعى اق مەشىت وبلىستاعى مادەني مۇرا, ساكرالدى ورىنداردىڭ ءبىرى بولىپ سانالادى. سالىنعانىنا 125 جىل بولعان مەشىت قازىر توزىپ, جوندەۋدى قاجەت ەتىپ تۇر. قوستاناي قالاسىندا وسىدان ءبىر جارىم جىل بۇرىن 3 مىڭ ادام سياتىن جاڭا مەشىتتىڭ پايدالانۋعا بەرىلۋىنە بايلانىستى ءارى جوندەۋدى قاجەت ەتكەندىكتەن ەسكى مەشىت جۇمىسىن توقتاتقان بولاتىن. قوستاناي قالاسىندا قازىر ەكى جاڭا مەشىت جۇمىس ىستەپ تۇر. بۇل تۋرالى جۇرتشىلىق تاراپىنان دا, كەيبىر بۇقارالىق اقپارات قۇرالدارىندا دا «مارال يشان اتىنداعى مەشىت عيماراتى ەندى ءدىني ورىن بولمايدى ەكەن» دەگەن قاڭقۋ اڭگىمەلەر شىعا باستاعان. وبلىس اكىمى ارحيمەد مۇحامبەتوۆ اپپاراتتىڭ كەڭەيتىلگەن ماجىلىسىندە مەشىتكە بايلانىستى جاعدايدىڭ انىق-قانىعىن ايتتى.
«قوستانايداعى مارال يشان اتىنداعى ەسكى مەشىت جوندەۋدى قاجەت ەتەدى. ءبىز وسى ۋاقىتقا دەيىن وعان جوندەۋ جۇرگىزە المادىق, سەبەبى ول قازاقستان مۇسىلماندارى ءدىني باسقارماسىنا قاراستى بولدى. ءدىني باسقارما ونى ءبىر جىل بويىنا قوستاناي وبلىسىنىڭ كوممۋنالدىق مەنشىگىنە بەردى, جۇمىس ۇدەرىسى وسى ۋاقىتقا دەيىن سوزىلدى. ەندى وعان قارجى تاۋىپ, جوندەۋ جۇمىسىن باستايمىز. الدىمەن جوندەۋ-سمەتالىق قۇجاتتارى دايىندالادى. كەلەسى جىلدىڭ اياعىنا دەيىن جوندەۋ جۇمىستارى اياقتالىپ, عيمارات جاڭارادى. بىراق ونى كەلەشەكتە قانداي ماقساتقا پايدالانۋ كەرەىگىن ءبىز قازاقستان مۇسىلماندارى ءدىني باسقارماسىمەن كەلىسە وتىرىپ شەشەتىن بولامىز» دەدى ارحيمەد بەگەجان ۇلى.
وبلىس اكىمى الەۋمەتتىك ماسەلەلەر جونىندەگى ورىنباسارىنا مەشىتتى جوندەۋ جۇمىستارىنىڭ «جول كارتاسىن» جاساپ, قانداي جۇمىستار جۇرگىزىلەتىنىن بۇگە-شىگەسىنە دەيىن انىقتاۋدى, ونى جۇرگىزۋ جوسپارىن جاساۋدى تاپسىردى.
ءنازيرا جارىمبەت,
«ەگەمەن قازاقستان»
قوستاناي