ماقتاارال اۋدانىنىڭ اكىمى باقىت اسانوۆ ءيىرجار اۋىلدىق وكرۋگى «ديقان» اۋىلىنداعى 600 ورىندىق قاجىمۇقان اتىنداعى جالپى ورتا مەكتەبىنىڭ قۇرىلىس بارىسىمەن تانىستى, دەپ حابارلايدى ماقتاارال اۋدانى اكىمىنىڭ ءباسپاسوز قىزمەتى.
مەردىگەر «كورپوراتسيا سيتي ستروي» جشس-ءى قۇرىپ جاتقان نىساننىڭ جالپى قۇنى 1 ميلليارد 107 ميلليون تەڭگەدەن استام. ءوڭىر باسشىسى نىسان قۇرىلىسىنىڭ وندىرىستىك جۇمىس كەستەسىنە سايكەس جۇرگىزىلۋىن تەكسەرىپ, بىرنەشە كەمشىلىكتەردى انىقتادى. سونداي-اق, اعىمداعى جىلدىڭ جەلتوقسان ايىندا پايدالانۋعا بەرىلەتىن نىساندى ءوز ۋاقىتىندا تاپسىرۋ جانە ورىن الىپ جاتقان كەمشىلىكتەردى دەرەۋ تۇزەتۋ ءۇشىن مەردىگەر مەكەمەنىڭ باسشىسىنا ارنايى تاپسىرما بەردى.
«ماقتاارال اۋدانىندا قازىرگى تاڭدا 3 مەكتەپتىڭ جانە 2 ەمحانانىڭ قۇرىلىسى ءجۇرىپ جاتىر. ءبىز جاڭا اۋداندا ءبىلىم سالاسىنا جاعداي جاساۋ ءۇشىن مەكتەپ سالۋدى توقتاتپايمىز. سونداي-اق, اۋدان ورتالىعىندا كوپ قاباتتى تۇرعىن ۇيلەردى تۇرعىزاتىن جەرلەردى انىقتاۋدامىز. مەملەكەتتىڭ التىن قورى سانالاتىن سۋارمالى جەرلەرىمىزدى ساقتاپ, حالقى تىعىز ورنالاسقان ماقتالى ولكەدە كوپ قاباتتى تۇرعىن ۇيلەردىڭ, الەۋمەتتىك نىسانداردىڭ سانىن كوبەيتۋىمىز كەرەك. وسىلايشا كيەلى ماقتاارالدى اۋىل شارۋاشىلىعىمەن عانا ەمەس, قۇرىلىس سالاسىمەن دە تانىمال ەتەتىن بولامىز» - دەدى باقىت ءناسىرحان ۇلى.
جالپى ماقتاارال اۋدانىندا بيىل 4 مەكتەپ پايدالانۋعا بەرىلسە, تاعى 3 مەكتەپتىڭ قۇرىلىسى ءجۇرىپ جاتىر. قاجىمۇقان اتىنداعى جالپى ورتا مەكتەپتەن بولەك, قۇرىلىسى ءجۇرىپ جاتقان ق.ۇكىباەۆ اتىنداعى 300 ورىندىق جانە ق.قايسەنوۆ اتىنداعى 300 ورىندىق مەكتەپتەر كەلەسى جىلى پايدالانۋعا بەرىلەدى دەپ كۇتىلۋدە.
ايتا كەتەيىك, مىرزاكەنت پەن اتاكەنت كەنتتەرىندە 250 ورىندىق 2 ەمحانانىڭ بوي كوتەرۋى دە ماقتالى ولكەدە قۇرىلىس سالاسىنىڭ قارقىنداعانىن كورسەتەدى.