بولليۆۋدتىڭ جارىق جۇلدىزدارىنىڭ ءبىرى, اۋلەتىمەن ومىرلەرىن ونەرگە ارناعان ءۇندى اكتريساسى راني مۋكەردجي قازاقستان حالقىنا بەينە-سالەم جولدادى. ويتكەنى ءدال وسى كۇندەرى ەلىمىزدە «مەن – وقىتۋشىمىن» ءفيلمى پروكاتقا شىعادى. ال راني مۋكەردجي اتالمىش كارتينادا باستى ءرولدى سومدايدى.
Filmfare Awards جۇلدەسىن ايەلدەر رولىندە جەتى رەت قاتارىنان جەڭىپ العان تانىمال اكتريسانىڭ سوڭعى ستاتۋەتكاسى «دجەسسيكانى ەشكىم دە ولتىرگەن جوق» ءفيلمى ارقىلى كەلگەن.
تالاي تانىمال رولدەرى ارقىلى شىعارماشىلىق تالانى جانعان اكتريسا ءۇش جىل قاتارىنان «بولليۆۋدتىڭ ۇزدىك اكتريسالارى» وندىعىن باستاعان. سول سياقتى Filmfare جۋرنالىنىڭ «بولليۆۋدتىڭ ون ۇلى ەسىمى» جوباسىنان ءوزىنىڭ ويىپ تۇرىپ ورنىن العان ول وسى ۋاقىتقا دەيىن 50-دەن استام فيلمگە ءتۇسىپ ۇلگەرگەن.
قىسقاسى بارىنشا تانىمال بولليۆۋد جۇلدىزى ءبىرىنشى رەت باعىن قازاق كارتيناسىندا سىناپ وتىر.
ايتقانداي, راني مۋكەردجي كينەماتوگافيستەر اۋلەتىنە شىققان رەجيسسەر اديتيا چوپرانىڭ جۇبايى. ەكەۋىنىڭ اديرا ەسىمدى 3 جاستاعى قىزدارى بار.
«مەن – وقىتۋشىمىن» كارتيناسى تۋرەتتا سيندرومىنا (ورەسكەل قيمىل, بەتتىڭ بۇلشىق ەتتەرىنىڭ قيساڭداۋى, ايعايعا باقىلاۋ جاسايتىن جۇيكە جۇيەسىنىڭ بۇزىلۋى) شالدىققان ۇستازدىڭ ومىرىنەن سىر شەرتەدى.
مۇعالىم بولۋدى ارماندايتىن نەنانىڭ دەرتى كەرىسىنشە ونى ادامداردان الشاقتاتىپ, كىسىكيىك تاعدىر كۇن كەشتىرۋى ءتيىس ەدى. الايدا كوكسەگەن ماقساتقا دەگەن قۇشتارلىق بۇل اۋرۋدىڭ كەسىرىنەن دە كۇشتى بولىپ شىعادى.
دەرتتى جەڭىپ, جۇرتتىڭ الدىنا شىعىپ ءدارىس بەرۋ ءۇشىن جانە ءوزىنىڭ بولمىسىنان ۇستاز بولۋعا جاراتىلعانىن دالەلدەۋ ءۇشىن نەنا قانداي شىرعالاڭداردى باسىنان كەشپەدى دەيسىز؟!
سونىمەن جازمىشتىڭ دەگەنىنە كونە سالماي, تاعدىر تالكەگىن جەڭۋ جولىنا تۇسكەن نەنا رولىندەگى راني مۋكەردجيدىڭ وتانداستارىمىزعا جولداعان سالەمدەمەسى تومەندەگىدەي: «سالەم, قازاقستان! مەن 20 قىركۇيەكتە «مەن – وقىتۋشىمىن» ءفيلمىنىڭ قازاقستاندا ۇلكەن ەكرانعا جولداما الاتىنىنا بەك قۋانىشتىمىن. بۇل كارتينا سىزدەرگە ۇنايدى دەپ ۇمىتتەنەمىن!».
ايناش ەسالي,
«ەگەمەن قازاقستان».
الماتى