قازاقتىڭ كورنەكتى كومپوزيتورى يليا جاقانوۆتىڭ «ەدىل مەن جايىق» ءانىن بىلمەيتىن, ونىڭ اسەم اۋەنىنە ەلتىمەيتىن جان كەم دە كەم شىعار. ساعىنىش پەن مۇڭعا, وتانشىلدىق سەزىمگە تولى, ەلدىك پەن ورلىككە, تۋعان جەردى شەكسىز سۇيە بىلۋگە ۇندەيتىن بۇل تاماشا ءاننىڭ ءسوزىن جازعان مەملەكەتتىك سىيلىقتىڭ لاۋرەاتى, اقىن جۇبان مولداعاليەۆ. وسىناۋ وشپەس ونەر تۋىندىسىنىڭ ومىرگە كەلگەنىنە بيىل وتىز جىل تولىپ وتىر.
وسى داتاعا بايلانىستى اتىراۋ مەن باتىس قازاقستان وبلىستارىنىڭ تۇيىسكەن تۇسىندا, اتالعان ەكى ءوڭىردى جالعاستىراتىن كۇرە جولدىڭ بويىندا ەڭسەلى دە بيىك باننەر قويىلدى. اقجايىق اۋدانىنىڭ ورتالىعى چاپاەۆ كەنتىندە دە ءدال وسىنداي باننەر ورناتىلدى.
ءسويتىپ, ەگەمەن قازاقستاننىڭ جيىرما جىلدىق تاريحىندا تۇڭعىش رەت ادامعا ەمەس, انگە ەسكەرتكىش قويىلدى. مۇنىڭ ءمانىسى دە وتە قاراپايىم دەۋگە بولادى. ويتكەنى, «ەدىل مەن جايىق» انىندە تۇتاستاي قازاق ەلىنە دەگەن تەرەڭ تولعانىستى سەزىم, اتا-بابا اماناتتارىنا ادالدىق سارىنى بار. وسى تۋىندىداعى اسقاق تا ارىندى ازاماتتىق اۋەن – ەگەمەندىك پەن ەلدىككە ۇندەۋدىڭ جارقىن كورىنىسى ىسپەتتەس.
قازاقتىڭ كەڭ دالاسى مەن ايدىنى شالقىعان وزەنىنە ارنالعان ءان مەن ونىڭ ءماتىنى ەگەمەندىكتىڭ قادىر-قاسيەتىن ودان ءارى تەرەڭ زەردەلەي تۇسۋگە قىزمەت ەتەرى كامىل. تاۋەلسىزدىكتىڭ جيىرما جىلدىعى قارساڭىندا حالقىمىزدىڭ رۋحىن كوتەرۋگە سەپتىگىن تيگىزە الاتىن ونەر تۋىندىسىنا ەسكەرتكىش قويىلۋىنىڭ وسىنداي سيمفوليكالىق ءمانى بار دەپ بىلەمىز.
تەمىر قۇسايىن,
ورال – اتىراۋ – ورال.