«استانا بالەت» تەاترى 9-10 قىركۇيەكتە ميلان قالاسىنىڭ ورتالىعىنداعى «Teatro Nuovo» ساحناسىندا ونەر كورسەتەدى, دەپ حابارلايدى تەاتردىڭ ءباسپاسوز قىزمەتى.
مادەنيەت جانە سپورت مينيسترلىگىنىڭ قولداۋىمەن تەاتر گاسترولدىك ساپارمەن ءتۇرلى شەت ەلدە ونەر كورسەتىپ ءجۇر. «استانا بالەت» تەاترىنىڭ ۇجىمى «جاھانداعى زاماناۋي قازاقستان مادەنيەتى» جوباسىن جۇزەگە اسىرۋعا ات سالىسىپ, وتاندىق ونەردىڭ جايھارلارىن الەم ساحنالارىندا تانىتىپ كەلەدى.
«بيىل استانانىڭ 20 جىلدىعى اتالىپ وتۋدە. وسى وقيعانىڭ اياسىندا, ءبىز, استانانىڭ ەڭ جاس تەاترىنىڭ شىعارماشىلىق ىزدەنىستەرىن يتالياندىق كورەرمەن نازارىنا ۇسىنباقشىمىز. ترۋپپامىز ءۇشىن, گاسترول - شىعارماشىلىقتى ىنتالاندىرۋدىڭ كىلتى, الەمنىڭ داڭقتى قالاسىنىڭ اۋديتورياسى الدىندا كۇشىمىزدى سىناپ كورۋدىڭ مۇمكىندىگى. تالعامپاز كورەرمەن بىزگە قوشەمەت بىلدىرەر, دەگەن ۇمىتتەمىز», - دەيدى, تەاتر ديرەكتورى ۆالەري كۇزەمباەۆ.
ونىڭ ايتۋىنشا, تەاتر وزىندىك ونەر تۋىندىلارىن ۇلتتىق مول مۇراعا سۇيەنە وتىرىپ, الەمدىك مادەنيەت اسەرىمەن دۇنيەگە اكەلەدى. قازاقستاننىڭ بالەت ۇجىمى «استانا بالەت گالا» اتتى مازمۇنى بىرەگەي كونتسەرتتىك باعدارلامانى ۇسىنادى. ونىڭ ىشىنە ۇلتتىق حورەوگرافيانىڭ جاۋھارلارىمەن قاتار, ترۋپپا رەپەرتۋارىنداعى نەوكلاسسيكالىق مينياتيۋرالار دا بار.
باعدارلاماعا ۇلتتىق بوياۋى قانىق حورەوگرافيالىق مينياتيۋرالار مەن بالەت ۇزىندىلەرى ەنگەن. بۇل كومپوزيتسيالاردىڭ ءبارى باي حالىق داستۇرىمەن, سان-قارلىلىعى جانە مول قۋاتىمەن ەرەكشەلەنەدى. عاجاپ مۋزىكا, قايتالانباس كوركەم بەينەلەر كورەرمەن كوڭىلىن باۋراپ الادى. ۇلتتىق تاقىرىپتان بولەك, كورەرمەن قاۋىم تەاتر رەپەرتۋارىنداعى ريكاردو امارانتە قويعان نەوكلاسسيكالىق سپەكتاكلدەردىڭ ۇزىندىلەرىن تاماشالاي الادى. ونىڭ «Love Fear Loss, «A fuego lento» بالەتتەرى كورەرمەننىڭ ىستىق ىقىلاسىنا بولەنىپ كەلەدى.