قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «اۋعانستانداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ» اتتى وڭىرلىك كونفەرەنتسياعا قاتىستى.
مەملەكەتتىك حاتشى گۇلشارا Əبدىقالىقوۆا مەملەكەت باسشىسى نۇرسۇلتان نازارباەۆتىڭ كونفەرەنتسيا قاتىسۋشىلارىنا ارناعان قۇتتىقتاۋ ءسوزىن وقىپ بەردى. وندا قازاقستاننىڭ اۋعانستانداعى بەيبىتشىلىككە تەزىرەك قول جەتكىزۋگە كومەكتەسۋدى جاقتايتىنى ايتىلعان, سونداي-اق ايەلدەردىڭ جاعدايىن جاقسارتۋ, گەندەرلىك تەڭدىكتى قامتاماسىز ەتۋ جانە اۋعان جەرىندە تىنىشتىق ورناتۋ جولىنداعى اۋعان ۇكىمەتىنىڭ قادامدارى جوعارى باعالانعان.
گ.ابدىقالىقوۆا اۋعانستاندى ورتالىق ازيا ەلدەرىمەن ەكونوميكالىق بايلانىسقا تارتۋدىڭ ماڭىزدىلىعىن اتاپ ءوتتى. وسى ورايدا مەملەكەتتىك حاتشى اۋعانستانداعى جانە تۇتاس وڭىردەگى ناقتى ەكونوميكالىق جوبالاردى جۇزەگە اسىرۋعا حالىقارالىق بيزنەستى كەڭىنەن تارتا وتىرىپ, ايەلدەر كاسىپكەرلىگىن دامىتۋدىڭ كەشەندى باعدارلاماسىن ازىرلەۋدى ۇسىندى. بۇل, ءوز كەزەگىندە, اۋعانستان ايەلدەرىنىڭ الەۋمەتتىك-ەكونوميكالىق مۇمكىندىكتەرىن كەڭەيتە تۇسەدى.
سونىمەن بىرگە اقش پرەزيدەنتىنىڭ كەڭەسشىسى يۆانكا ترامپ تا ايماقتىق كونفەرەنتسياعا بايلانىستى ۆيدەوۇندەۋىن جولدادى. اۋعانستاننىڭ ايەلدەر ءىسى جونىندەگى ءمينيسترى ديلبار نازاري قازاقستان باستاماسىنا العىسىن ءبىلدىردى. ونىڭ ايتۋىنشا, بۇگىندە اۋعان ايەلدەرىنىڭ ومىرىندە كوپتەگەن وزگەرىستەر بار. اۋعانستاننىڭ مينيستر ايەلدەرى, جەرگىلىكتى بيلىك وكىلدەرى اۋعان ايەلدەرىنىڭ قۇقىعىن قورعاۋعا بارىنشا اتسالىسۋدا.
وڭىرلىك كونفەرەنتسيانى وتكىزۋ باستاماسى جاھاندىق دەڭگەيدە گەندەرلىك تەڭدىك قاعيداتتارىن ىلگەرىلەتۋ شەڭبەرىندە كوتەرىلىپ وتىر. وعان اۋعانستان, ارمەنيا, ازەربايجان, قىرعىزستان, تاجىكستان, تۇرىكمەنستان, وزبەكستان, ەۋروپالىق وداق, قىتاي, رەسەي, ءۇندىستان جانە بۇۇ-دان جوعارى دەڭگەيدەگى دەلەگاتسيالار قاتىسۋدا. كونفەرەنتسيا قازاقستاننىڭ بۇۇ قاۋىپسىزدىك كەڭەسىندە مۇشە بولۋى اياسىندا وتكىزىلۋدە. شارا شەڭبەرىندە اۋعانستان پروبلەماسىنا ەرەكشە نازار اۋدارىلدى. اۋعانستانعا حالىقارالىق نازاردى ەسكەرە وتىرا, قازاقستان وسى ەلدەگى ۇزاق مەرزىمدى بەيبىتشىلىككە جانە تۇراقتى دامۋعا قول جەتكىزۋ ماقساتىندا, حالىقارالىق قوعامداستىقتىڭ ەلدەگى احۋال تۋرالى اقپاراتىن ارتتىرۋعا جانە اۋعانستان ايەلدەرى مەن قىزدارىن قولداۋعا, ولاردىڭ قۇقىقتارى مەن مۇمكىندىكتەرىن ىلگەرىلەتۋگە جانە كەڭەيتۋگە تالپىنۋدا. شەتەلدىك قوناقتار اراسىندا – ارمەنيانىڭ ءبىرىنشى حانىمى نۋنە ساركيسيان, قىرعىزستاننىڭ ۆيتسە-پرەمەر-ءمينيسترى التىناي ومۋربەكوۆا, وزبەكستان پرەمەر-ءمينيسترىنىڭ ورىنباسارى تانزيلا نارباەۆا, وزبەكستان ولي ءماجىلىس سەناتى توراعاسىنىڭ ورىنباسارى سۆەتلانا ارتيكوۆا, وزبەكستاننىڭ مەكتەپكە دەيىنگى ءبىلىم بەرۋ ءمينيسترى اگرەپينا شين, ازەربايجاننىڭ ەڭبەك جانە الەۋمەتتىك قورعاۋ ءمينيسترى ساحيل باباەۆ, اۋعانستاننىڭ ايەلدەر ىستەرى جونىندەگى ءمينيسترى ديلبار نازاري, اۋعانستاننىڭ مادەنيەت جانە اقپارات ءمينيسترى حاسين سافي, رەسەيدەگى ادام قۇقىقتارى جونىندەگى ۋاكىلەتتى وكىلى تاتيانا موسكالكوۆا, بۇۇ باس حاتشىسىنىڭ ارنايى وكىلى, بۇۇ-نىڭ ورتالىق ازيا ءۇشىن پرەۆەنتيۆتى ديپلوماتيا جونىندەگى وڭىرلىك ورتالىعىنىڭ باسشىسى ناتاليا گەرمان, اقش مەملەكەتتىك حاتشىسىنىڭ ستراتەگيالىق جانە كريزيستىك كوممۋنيكاتسيالار ماسەلەلەرى جونىندەگى كومەكشىسىنىڭ ورىنباسارى ەدريەنن روسس جانە باسقا ەلدەردەن دەلەگاتسيالاربار. يەمەندىك قۇقىق قورعاۋشىسى, جۋرناليست جانە ساياساتكەر, بەيبىتشىلىك بويىنشا نوبەل سىيلىعىن العان تۇڭعىش اراب ايەلى تاۆاكۋل كارمان بار.
مەملەكەتتىك حاتشى كونفەرەنتسيا اياسىندا وزبەكستان رەسپۋبليكاسى پرەمەر-ءمينيسترىنىڭ ورىنباسارى – ايەلدەر كوميتەتىنىڭ ءتورايىمى ت.نارباەۆامەن, سونداي-اق اۋعاندىق دەلەگاتسيا باسشىسى – اۋعانستان يسلام رەسپۋبليكاسىنىڭ ايەلدەر ىستەرى جونىندەگى ءمينيسترى د. نازاريمەن ەكىجاقتى كەزدەسۋلەر وتكىزدى. كەزدەسۋلەر بارىسىندا قازاقستاننىڭ وزبەكستانمەن, اۋعانستانمەن ىنتىماقتاستىعىنىڭ قازىرگى احۋالى جانە پەرسپەكتيۆالارى تالقىلاندى.