باتىس قازاقستان وبلىسىندا ەكى مەكتەپ اشىلدى

باتىس قازاقستان ءبىلىم باسقارماسىنىڭ باسشىسى شولپان قادىروۆا بۇگىن اقجايىق اۋدانى تايپاق اۋىلدىق وكرۋگىنە قاتىستى شابدارجاپ اۋىلىندا اشىلعان جاڭا مەكتەپتىڭ العاشقى قوڭىراۋ سالتاناتىنا ارنايى قاتىستى. وبلىس ورتالىعىنان شالعاي جاتقان شاعىن اۋىل مەكتەبىنىڭ ءبىلىم جەتىستىگى ەرەكشە – بىلتىر مەكتەپ بىتىرگەن 8 وقۋشىنىڭ ۇشەۋى – «التىن بەلگىگە» يە بولسا, جەتەۋى – مەملەكەتتىك گرانت ۇتىپ, ستۋدەنت اتانعان. وسىنداي بىلىمقۇمار بالالارى بار اۋىلعا «قاراشىعاناق پەترولەۋم وپەرەيتينگ» بۆ كومپانياسىنىڭ قولداۋىمەن 198 ورىندىق جاڭا مەكتەپ عيماراتى سالىنىپ, بۇگىن العاشقى قوڭىراۋ كۇمبىرلەدى. اۋىلدىڭ بولاشاعى بار ەكەنى كورىنىپ تۇر, وقۋشى سانى دا كوبەيىپ كەلەدى. مىسالى, بيىل ءبىرىنشى سىنىپقا 13 ءبۇلدىرشىن كەلىپتى. ايتا كەتەيىك, اتالمىش مەكتەپ وڭىردەگى وزگە دە شالعاي اۋىل مەكتەپتەرى سەكىلدى «Bilimbook» جابدىعىمەن تولىق قامتىلعان.

- ءبىز جىل سايىن ءبىلىم سالاسىن جەتىلدىرۋ ماقساتىندا ءبىلىم وشاقتارىنىڭ ماتەريالدىق نەگىزىن جاقسارتىپ قانا قويماي, اۋدان مەكتەپتەرىن كۇردەلى جوندەۋ جانە جاڭا عيمارات سالۋدى كەزەڭ كەزەڭىمەن جۇزەگە اسىرىپ كەلەمىز. بۇگىن مىنە, جاڭا مەكتەپتىڭ اشىلۋىنا كۋا بولىپ وتىرسىزدار. سونداي-اق, اۋدان ورتالىعىندا اباي اتىنداعى مەكتەپ گيمنازياسىنىڭ 300 ورىندىق عيماراتى جانە 100 ورىندىق ينتەرناتى سالىنادى. بيىل اقجايىق اۋدانى بويىنشا 664 ءبۇلدىرشىن مەكتەپ تابالدىرىعىن العاش اتتاپ وتىر, - دەدى اقجايىق اۋدانىنىڭ اكىمى ءادىل جولامانوۆ شابدارجاپ مەكتەبىنىڭ اشىلۋ سالتاناتىندا.

باتىس قازاقستان وبلىستىق ءبىلىم باسقارماسىنىڭ باسشىسى شولپان قادىروۆانىڭ مالىمەتىنشە, وڭىردە 380 مەملەكەتتىك مەكتەپ بار. جىلما-جىل وقۋشى سانى ءوسىپ كەلەدى. وقۋشى سانى وسۋىنە بايلانىستى تەرەكتى اۋدانىنداعى ەڭبەك ورتا مەكتەبى مەن قازتالوۆتاعى كوپكۇتىر باستاۋىش مەكتەبى بيىل نەگىزگى مەكتەپ بولىپ قايتا قۇرىلعان. ال سىرىم اۋدانىندا ءجاڭاومىر باستاۋىش مەكتەبى بالا سانى ازايۋىنا بايلانىستى جابىلدى. شولپان ماراتقىزى شەكارالىق وڭىردەگى مەكتەپتەردى ساقتاپ قالۋعا ەرەكشە كوڭىل ءبولىنىپ وتىرعانىن جەتكىزدى. باسشىنىڭ ايتۋىنشا, قاجەتتى مەكتەپ وقۋلىعى وبلىسقا تولىق كولەمدە جەتكىزىلگەن.

ءدال وسى كۇنى باتىس قازاقستان وبلىسىندا زەلەنوۆ اۋدانىنا قاراستى داريان اۋىلىندا جاڭا مەكتەپ ينتەرناتىمەن, بوكەي ورداسى اۋدانىنىڭ سايحىن اۋىلىندا مەكتەپ ينتەرناتىنىڭ جاڭا عيماراتى, قازتالوۆ اۋدانىندا ساز مەكتەبىنىڭ عيماراتى پايدالانۋعا بەرىلدى. شولپان ماراتقىزى جىل سوڭىنا دەيىن ورال قالاسىندا تاعى ءبىر مەكتەپ عيماراتى اشىلاتىنىن ايتادى.

باتىس قازاقستان وبلىسى مەكتەپتەرىندە بىلتىر 12 260 مۇعالىم ساباق بەرسە, بيىل جاڭادان 248 جاس مامان جۇمىسقا قابىلدانعان. وڭىردە مۇعالىم تاپشىلىعى ءالى بار – تاعى 205 پەداگوگ قاجەت. وڭىردەگى مامان تاپشىلىعىن جويۋ ءۇشىن جەرگىلىكتى بيۋدجەتتەن قارجى ءبولىنىپ, بيىل 100 جاس وبلىس اكىمىنىڭ گرانتىنا يە بولدى. ولاردىڭ ءبىراز بولىگى – بولاشاق مەكتەپ مۇعالىمى.

اقجايىق اۋدانىنىڭ اكىمى ءادىل جولامانوۆتىڭ ايتۋىنشا, وڭىردە «بالاپان» باعدارلاماسى بويىنشا 0-6 جاس ارالىعىنداعى بالالاردىڭ 99,9 پايىزى وقۋ جانە تاربيەمەن قامتىلىپ وتىر. بيىلدىڭ وزىندە «ديپلوممەن اۋىلعا» باعدارلاماسى اياسىندا اۋدانعا 15 جاس مۇعالىم جۇمىسقا ورنالاسقان. بالالاردىڭ جازعى دەمالىسىن ۇيىمداستىرۋعا جەرگىلىكتى بيۋدجەتتەن بولىنگەن قارجى 11 پايىزعا كوبەيىپ, وقۋشىلاردىڭ 100 پايىزى جازعى دەمالىسپەن قامتىلعان. ۇلتتىق بىرىڭعاي تەستىلەۋ ناتيجەسىندە اقجايىق اۋدانى بويىنشا ورتاشا بالل 76,96 پايىزدى قۇراپ, 131 وقۋشى مەملەكەتتىك گرانتقا يە بولدى. ونىڭ ىشىندە 22 تۇلەك «التىن بەلگىگە», 6 وقۋشى «ەرەكشە اتتەستاتقا» ءبىتىردى.

- تابيعي گازگە قوسىلعان 9 مەكتەپ جانىنان جىلىجاي اشىپ, بالالارىمىزدى ارزان, ءارى ساپالى باۋ-باقشا ونىمدەرىمەن قامتىپ, ءارى ەڭبەككە باۋلىپ جاتىرمىز. 24 مەكتەپتە وقۋشىلاردىڭ وندىرىستىك بريگاداسى بار. «مەكتەپكە جول» رەسپۋبليكالىق اكتسياسى اۋداندا كەڭ كولەمدە ۇيىمداستىرىلىپ, 680 وقۋشىعا كاسىپكەرلەر ارقىلى 3 ملن 200 مىڭنان استام تەڭگەنىڭ كومەگى كورسەتىلدى. اۋدانىمىزدا 14 مەكتەپ جانىندا مۇراجاي جۇمىس جاسايدى. تاياۋ بولاشاقتا ق.بايسىقوۆ اتىنداعى, تالاپ, المالى مەكتەپتەرىندە مۋزەي اشىلادى, - دەيدى ءادىل تاۋفيق ۇلى.

قازبەك قۇتتىمۇرات ۇلى

«ەگەمەن قازاقستان»

باتىس قازاقستان وبلىسى