بۇل تۋرالى ۇكىمەتتىڭ ءباسپاسوز ورتالىعىندا وتكەن ءباسپاسوز كونفەرەنتسياسىندا ءبىلىم جانە عىلىم ۆيتسە-ءمينيسترى اسحات ايماعامبەتوۆ مالىمدەدى.
ەسكە سالا كەتەيىك, بۇگىن قر ۇكىمەتىنىڭ وتىرىسىندا ءبىلىم جانە عىلىم ءمينيسترى ەرلان ساعاديەۆ قىركۇيەك ايىنان باستاپ جاڭارتىلعان ءبىلىم بەرۋ مازمۇنىنا كوشەتىن 3, 6, 8 سىنىپتارعا وقۋلىقتار ساتىپ الۋ ءۇشىن 28,6 ملرد تگ بولىنگەنىن ايتتى. مينيسترلىك وقۋلىقتاردىڭ جەتكىزىلۋىنە كۇن سايىن مونيتورينگ جۇرگىزۋدە.
ءوز كەزەگىندە ۆيتسە-مينيستر اسحات ايماعامبەتوۆ باق وكىلدەرىنىڭ سۇراقتارىنا جاۋاپ بەرە وتىرىپ, ەلىمىزدە بۇگىندە وقۋلىقتاردى جەتكىزۋ بويىنشا بەلسەندى ناۋقان جۇرگىزىلىپ جاتقانىن ايتتى. جالپى, جاڭا وقۋ جىلىنا دايىندىق كەزىندەگى ەڭ باستى ماسەلەلەردىڭ ءبىرى — مەكتەپتەردى قاجەتتى ماتەريالدارمەن قامتاماسىز ەتۋ. وقۋلىقتاردى جەتكىزۋ قارقىنى جامان ەمەس. بۇگىنگى كۇنى وقۋلىقتاردىڭ 91% جەتكىزىلگەن. وسى اپتانىڭ سوڭىنا دەيىن بۇل كورسەتكىشتى 100%-عا جەتكىزۋ كوزدەلگەن.
سونداي-اق, ا. ايماعامبەتوۆ استانادا وقۋلىقتاردى ۋاقىتىلى جەتكىزبەۋ ماسەلەسى شەشىلگەنىن ايتتى. ءبىر اپتا ىشىندە مۇندا وقۋلىقتاردىڭ 50% جەتكىزىلدى. وسى اپتانىڭ سوڭىنا دەيىن قالعان بولىگىن جەتكىزۋ جوسپارلانعان.
بۇدان وزگە, ءبىلىم جانە عىلىم مينيسترلىگىندە مۇعالىمدەر تولتىرۋى ءتيىستى بەس قۇجات انىقتالعان.
«بيىل مينيسترلىكتە مۇعالىمدەر تولتىرۋى ءتيىستى تەك بەس قۇجات انىقتالعان بۇيرىق قابىلداندى. بۇل: كۇنتىزبەلىك-تاقىرىپتىق جوسپار, ءار ساباقتىڭ جوسپارى, كريتەريلىك باعالاۋ, كۇندەلىك جانە سىنىپ جۋرنالى», — دەدى ا. ايماعامبەتوۆ.
سونىمەن قاتار, ۆيتسە-مينيستر باسقا قۇجاتتاردى تولتىرۋعا قاتاڭ تىيىم سالىنعانىن جانە قر بعم بۇنى قاداعالايتىنىن اتاپ ءوتتى.
«ەگەر مەكتەپ ديرەكتورى, ءبىلىم بەرۋ باسقارماسى باسقا قۇجاتتاردى تولتىرۋدى تالاپ ەتسە, ءبىلىم جانە عىلىم مينيسترلىگىنىڭ باقىلاۋ دەپارتامەنتىنە جۇگىنۋگە بولادى. ءبىز شارا قابىلدايمىز», — دەدى ا. ايماعامبەتوۆ.