ءوزارا تۇسىنىستىك قاجەت
جاڭاوزەن قالاسىندا بولعان ءبىزدىڭ قوعامىمىز ءۇشىن وتە قولايسىز, جاعىمسىز جاعداي بارشامىزدىڭ جۇرەگىمىزگە اۋىر ءتيدى. مەن وسى قالادا وتكەن عاسىردىڭ 70-ءشى جىلدارىنىڭ باسىندا ەڭبەك جولىمدى مۇناي كاسىپشىلىگىندە ينجەنەر بولىپ باستاعان ەدىم.
سودان بەرى جاستىق جىگەرمەن ەڭبەك ەتىپ, ءار كەزەڭدە ءارتۇرلى قىزمەتتەر اتقارىپ, وسى قالانىڭ ىستىعىنا كۇيىپ, سۋىعىنا ءبىر كىسىدەي توڭعان اداممىن. سوندىقتان وسىندا ورىن العان كەلەڭسىز جاعداي توبەمىزدەن جاي تۇسكەندەي مەنىڭ دە قابىرعامدى قايىستىردى.
بۇل قالا جاسامپاز ەڭبەكتىڭ, باۋىرمال دوستىقتىڭ, بەرەكە-ءبىرلىكتىڭ قالاسى بولاتىن. قازىرگىدەن اناعۇرلىم قيىن كەزدە دە تۇيىققا تىرەلگەن بارلىق ماسەلەلەردىڭ شەشىمى تابىلىپ, ءتۇيىندەرى ءتۇسىنىستىكپەن تارقاتىلاتىن. ءبىزدىڭ الدىمىزداعى اعا ۇرپاق, ولاردىڭ ءىزىن باسقان بىزدەر بارلىعىن ءوز قولىمىزبەن تۇرعىزدىق. مۇناي كاسىپشىلىكتەرى يگەرىلدى, جولدار سالىندى, زاۋىتتار تۇرعىزىلدى, جاپان دالادا قالا كوتەرىلدى.
ونىڭ بەر جاعىندا, ءتاڭىردىڭ بەرگەن سىيى قازاقستاننىڭ تاۋەلسىزدىگىنە قول جەتكىزدىك. ەگەمەن ەل بولدىق. ەلباسىمىز ەل ءتىزگىنىن قولىنا الدى. ەڭسەمىزدى كوتەردىك. ءبۇگىندە كوزىمىزبەن كورىپ, قولىمىزبەن ۇستاپ وتىرعانداي وتانىمىز قازاقستان بۇكىل الەمگە تانىلىپ, دامۋدىڭ داڭعىل جولىنا شىقتى.
بارلىق ەلىمىزبەن بىرگە جاڭاوزەندە دە جاسالىپ جاتقان يگى ىستەر از ەمەس. وتكەن ەكى شاقىرىلىمنىڭ دەپۋتاتى رەتىندە جاستىق شاعىمنىڭ قالاسى جاڭاوزەننىڭ تالاي الەۋمەتتىك ماسەلەلەرىن شەشۋگە اتسالىستىم.
ارينە, قانداي دامىعان قوعامدا بولسا دا شەشىمى تابىلۋعا ءتيىس پروبلەمالار از بولمايدى. ەڭبەك داۋى قاي جەردە دە بار. بىراق ول قانتوگىس جولىمەن شەشىلمەۋى ءتيىس. ادامي پاراسات, تۇسىنىكتى نەگىزدە, زاڭ جولىمەن عانا شەشىلۋى كەرەك. وسى داعدارىستاعى ەڭ ءبىر قيىن جاعداي – قان توگىلدى, ادام ولىمىنە جول بەرىلدى. مارقۇم بولعان وتانداستارىمىزدىڭ جاقىن-تۋىستارىنا كوڭىل ايتا وتىرىپ, وسى الەۋمەتتىك داعدارىستان شىعۋدىڭ بىردەن-ءبىر جولى ەلىمىزدىڭ زاڭناماسىن باسشىلىققا الۋ, سابىرلىلىق, اقىلعا جەڭدىرۋ ءجانە ءوزارا تۇسىنىستىك دەگىم كەلەدى.
ەلباسىمىز ن.ءا.نازارباەۆ ەلىمىزدى وتكەن جيىرما جىلدا نەبىر قيىن-قىستاۋ جولداردان الىپ وتكەن, باسىمىزعا تۇسكەن وسى قيىنشىلىقتان دا الىپ وتەتىندىگىنە, ءتۇيىندى تورەلىگىن ايتاتىندىعىنا ەش كۇمان جوق.
زەينوللا الشىمباەۆ, 3, 4-ءشى شاقىرىلعان پارلامەنت ءماجىلىسىنىڭ دەپۋتاتى.
استانا.