قازىرگى تاڭدا ەلىمىزدە سايلاۋ دوداسىنا ءتۇسىپ جاتقان ساياسي كۇشتەر وزدەرىنىڭ سايلاۋالدى باعدارلامالارىن ناسيحاتتاۋ ءۇشىن قارجىلىق قيىندىقتارعا قاراماستان, بارلىق امالداردى قولدانىپ باعۋدا. جانە ونىسى ناتيجەسىز دە ەمەس. ماسەلەن, قازاقستان پاتريوتتارى پارتياسىنىڭ بەلدى مۇشەلەرى قالالىق قوعامدىق كولىكتەردى ءوز مۇددەلەرىنە ۇتىمدى پايدالانا باستادى. قوعامدىق كولىكتەردە جولاۋشىلارعا ءان ايتۋ ارقىلى وزدەرىنىڭ جەتىستىكتەرىن دە ناسيحاتتاپ وتىر. ماسەلەن, كەشە الماتىدا پاتريوتتىقتار ترامۆاي كولىگىمەن «وربيتا» شاعىن اۋدانىنان كوكبازارعا دەيىنگى ارالىقتى ءجۇرىپ ءوتىپ, ناسيحات جۇمىستارىن كەڭىنەن جۇرگىزۋگە مۇمكىندىك الدى. سونداي-اق بۇدان باسقا دا شارالار وڭتۇستىك استانامىزدىڭ بىرقاتار جەرلەرىندە ۇيىمداستىرىلعاندىعىن ايتا كەتۋ كەرەك.
مەلس ەلەۋسىزوۆ, اللا رىجكوۆا باستاعان پارتيا بەلسەندىلەرى كەشە ءال-فارابي اتىنداعى قازاق مەملەكەتتىك ۋنيۆەرسيتەتىنىڭ گەوگرافيا فاكۋلتەتىندە ستۋدەنتتەرمەن كەزدەسۋ وتكىزدى. اتالعان كەزدەسۋ بارىسىندا جاستار ماسەلەسى, سونىڭ ىشىندە, ستۋدەنتتەردىڭ الەۋمەتتىك-تۇرمىستىق جاعدايى كەڭىنەن ءسوز بولدى. اسىرەسە, ستۋدەنتتەر جاتاقحاناسىنىڭ جەتىسپەۋشىلىگى, ولاردىڭ جوعارى وقۋ ورنىن بىتىرگەننەن كەيىنگى جۇمىسقا ورنالاسۋى پروبلەمالارى سياقتى بىرقاتار ماسەلەلەر ورتاعا سالىندى.
پارتيا نەگىزىنەن كەدەيشىلىكتى ەڭسەرۋ جانە ازاماتتاردى الەۋمەتتىك قورعاۋدىڭ مەملەكەتتىك جۇيەسىن ودان ءارى دامىتۋ ساياساتىن جۇرگىزىپ كەلە جاتقانى بەلگىلى. بۇدان باسقا, ەكولوگيا پروبلەماسى كەڭىنەن ءسوز بولدى. اسىرەسە, ارال تەڭىزى, سەمەي پوليگونى, بايقوڭىر عارىش ايلاعى پروبلەمالارىن شەشۋگە ەرەكشە دەن قويىلىپ, ولارعا الەمدىك قوعامداستىقتىڭ نازارىن اۋدارۋعا كۇش سالۋ قاجەتتىگى ايتىلدى. وسى رەتتە پارتيا كاسپي تەڭىزى شەلفى مەن ەلدىڭ بارلىق اۋماعىندا جۇمىس ىستەيتىن شەتەلدىك ينۆەستورلاردىڭ ەكولوگيالىق ستاندارتتارىن قايتا قاراۋعا قول جەتكىزۋدى دە نازاردا ۇستاۋدى وزدەرىنىڭ باستى قاعيداتتارى رەتىندە قاراستىرىپ وتىر.
ال استانادا قازاقستان پاتريوتتارى پارتياسىنىڭ جەتەكشىلەرى ەقىۇ بايقاۋشىلارى ميسسياسى وكىلدەرىمەن كەزدەسىپ, الداعى سايلاۋ بارىسىن اڭگىمە وزەگىنە اينالدىردى. ۇيىم وكىلدەرىن, اسىرەسە, اسكەريلەردىڭ, جاستاردىڭ جانە مەملەكەتتىك قىزمەتشىلەردىڭ سايلاۋ بارىسىنا قاندايلىق قاتىساتىندىعى قىزىقتىرعان كورىنەدى.
اسقار تۇراپباي ۇلى.