الەمدىك وركەنيەتتىڭ كوشىندە كوشباستاۋشى ەلدەر قاتارىنا لايىقتى كىرىگە العان قازاقستان تابيعي بايلىققا دا, دارىندى ۇرپاققا دا كەندە ەمەس. ەلىنىڭ كەلەشەگىن الىستان ويلاپ, تەرەڭنەن پىشەتىن كەمەڭگەر تۇلعانىڭ ءبىرى – تۇڭعىش پرەزيدەنتىمىز نۇرسۇلتان نازارباەۆ. تاۋەلسىزدىك جىلدارىندا بۇعان كوزىمىز انىق جەتتى. كوزدى اشىپ-جۇمعانداي وتە شىققان وسىناۋ مەرزىمدە ەل ەكونوميكاسى وركەندەدى, حالىقتىڭ الەۋمەتتىك تۇرمىسى جاقساردى. ءبىر كەزدەرى ۇمىتىلا باستاعان انا ءتىلىمىز مەملەكەتتىك دەڭگەيگە كوتەرىلدى. جاس ۇرپاق تۇگىلى اعا بۋىننىڭ وقۋىنا تىيىم سالىنعان تاريحىمىزدىڭ اقتاڭداق بەتتەرى اشىلدى. ايتا بەرسەك, تاۋەلسىزدىكتىڭ 20 جىلىندا قول جەتكەن جەتىستىگىمىزگە دە, شىققان بيىگىمىزگە دە جاھان جۇرتى تامسانا قارايتىن بولدى.
تاۋەلسىز قازاقستاننىڭ الەمدەگى جۇلدىزى جارىق, ابىرويى بيىك بولعانىن قالايتىن ەلباسى نۇرسۇلتان نازارباەۆ ەنشىمىزگە بۇيىرعان ەرەن باقىتقا مالدانىپ, ءبىر ورىندا تۇرىپ قالماۋدىڭ قاجەتتىلىگىن ۇدايى ايتىپ كەلەدى. تاۋەلسىزدىكتىڭ 20 جىلدىعىنا ارنالعان مەرەيتوي سالتاناتىندا بۇعان جانە ءبىر رەت توقتالىپ ءوتتى. ەلباسى ءوز بايانداماسىندا قازاقستاننىڭ كەلەشەكتەگى دامۋى يندۋستريا مەن يننوۆاتسياعا تىكەلەي بايلانىستى ەكەنىمەن ءوربىتۋى وتە ورىندى. ويتكەنى, جاپونيا مەن وڭتۇستىك كورەيا, قىتاي مەن مالايزيا, گەرمانيا مەن يتاليا, فرانتسيا جانە اقش سەكىلدى كوپتەگەن ەلدەردىڭ وركەندەۋ ەرەكشەلىگىنە نازار اۋدارساق, ءبىرىنشى كەزەكتە يننوۆاتسيالىق جوبالاردى ىسكە اسىرۋ ارقىلى يندۋستريالاندىرۋ ۇدەرىسىن باستاعانى داۋسىز.
ال قازاقستاننىڭ ەكپىنى الەمدەگى ەشبىر ەلدەن كەم ەمەس. ءبىزدىڭ دارىندى عالىمدارىمىزدىڭ عىلىمي الەۋەتى دە جوعارى ەكەنىن بىلەمىز. حالىقارالىق «بولاشاق» باعدارلاماسىمەن الەمدەگى ەڭ وزىق ءبىلىم وردالارىندا ءبىلىم جەتىلدىرگەن, نارىقتىڭ قىر-سىرىنا قانىققان ۇشقىر ويلى جاستارىمىز دا جەتەدى. دەمەك, قازاقستان عىلىمىندا ەلباسى نۇرسۇلتان نازارباەۆ ايتقانداي, ءححى عاسىرداعى الەمدىك دامۋدان قالىپ قويماۋدىڭ بىردەن-ءبىر جولى – يننوۆاتسياعا دەن قويۋعا تولىق نەگىز بار. يننوۆاتسيالىق جوبالار اسىرەسە, ماشينا جاساۋ مەن اۆياتسيا قۇرىلىسىنا, ەلەكترونيكا مەن اقپاراتتىق تەحنولوگيالاردى دامىتۋعا, لوكوموتيۆتەر مەن ۆاگوندار ءوندىرىسىنە اسا قاجەت. ءىلىم-بىلىمگە ۇمتىلعان جاستار يننوۆاتسيالىق جوبالار ەلدى وركەندەتۋدىڭ كەپىلى بولاتىنىن ۇعىنعانىن قالار ەدىك. ويتكەنى, ەندى مەملەكەت «ءجۇز يننوۆاتسيا» باعدارلاماسىن ىسكە اسىرۋدى كوزدەپ وتىر.
نۇرباي سۇيىنباەۆ, جىلىوي اۋداندىق مادەنيەت جانە تىلدەردى دامىتۋ ءبولىمىنىڭ مەڭگەرۋشىسى.
اتىراۋ وبلىسى.