كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى قانات ساۋداباەۆتىڭ توراعالىق ەتۋىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ قورىتىندى ءماجىلىسى ءوتتى.
وتىرىستى ءسوز سويلەپ اشقان ق.ساۋداباەۆ: «ەلباسى باعدارلاماسىنىڭ ەڭ ماڭىزدى باسىمدىعىنا يە بولعان جاستاردىڭ ءبىلىم دەڭگەيى مەن ساپاسىن ارتتىرۋ ماقساتىندا كوپتەگەن جۇمىستار اتقارىلدى. تاۋەلسىزدىكتىڭ 20 جىلىندا ءبىلىم مەن عىلىمنىڭ قارجىلاندىرىلۋى ەداۋىر ارتتى, جىل سايىن مەكتەپتەردىڭ جۇيەسى كەڭەيتىلۋدە, وسىنىڭ ناتيجەسىندە ەلىمىزدە ەڭ جوعارى حالىقارالىق ستاندارتتارعا جاۋاپ بەرەتىن «نازارباەۆ ۋنيۆەرسيتەتى» اشىلعانىن اتاپ وتكەن ءجون. ەكونوميكالىق قيىندىققا قاراماستان تاۋەلسىزدىكتىڭ العاشقى جىلدارىنان-اق پرەزيدەنتتىڭ باستاماسىمەن تاعايىندالعان «بولاشاق» باعدارلاماسى شەت ەلدەگى الدىڭعى قاتارلى جوعارى وقۋ ورىندارىندا كادر دايارلاۋدا ەرەكشە ورىن الدى. قازىرگى تاڭدا «بولاشاق» تۇلەكتەرى الەۋمەتتىك-ەكونوميكالىق, يندۋستريالدى-يننوۆاتسيالىق دامۋعا ءۇلكەن ۇلەس قوسۋدا. سول سەبەپتى ءبىز مەملەكەتىمىزدىڭ ۇدەمەلى دامۋىنا قاجەتتى جوعارى بىلىكتى, باسەكەگە قابىلەتتى مامانداردى دايارلايتىن پرەزيدەنتتىك باعدارلامانىڭ ءمۇمكىنشىلىگىن ءارى قاراي بارىنشا قولدانا ءتۇسۋىمىز كەرەك», – دەپ اتاپ ءوتتى.
قورىتىندى ماجىلىستە ءبىلىم جانە عىلىم ءمينيسترى ب.جۇماعۇلوۆتىڭ بايانداماسى تىڭدالدى. 2011 جىلعى 1 قىركۇيەك پەن 8 جەلتوقسان ارالىعىندا وتكىزىلگەن كونكۋرستىق ىرىكتەۋدىڭ ءبىرىنشى جانە ەكىنشى كەزەڭدەرىنىڭ ناتيجەلەرى بويىنشا شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ قاراۋىنا «بولاشاق» حالىقارالىق ستيپەندياسىن تاعايىنداۋ ءۇشىن 389 ۇمىتكەردىڭ جەكە ىستەرى شىعارىلدى. ولاردىڭ ىشىندە كونكۋرستىق ىرىكتەۋگە 67 ۇمىتكەر شەتەلدىڭ جوعارى وقۋ ورىندارىنا ءوز بەتىمەن تۇسكەن ۇمىتكەر رەتىندە, ال 322 جاس جالپى كونكۋرس بويىنشا قاتىسقان ەدى. ۇمىتكەرلەردىڭ سانى مەن وقىتۋ باعدارلامالارى بويىنشا وتىنىمدەرگە كەلسەك, ماگيستراتۋراعا – 328, دوكتورانتۋراعا – 2, عىلىمي تاعىلىمدامالارعا 59 ۇمىتكەر ءتۇسىپ وتىر. جاستاردىڭ كوپشىلىگى قۇجاتتارىن ۇلىبريتانيا (159 ادام), اقش (91 ادام), رەسەي (34 ادام), گەرمانيا (19 ادام) سياقتى وركەنيەتتى ەلدەردىڭ جوعارى وقۋ ورىندارىنا تاپسىرسا, مۇنان باسقا تاعى دا فرانتسيا, يتاليا, اۆستراليا, قىتاي, نيدەرلاندى, نورۆەگيا, چەحيا, كانادا, سلوۆاكيا, اۆستريا, شۆەيتساريا ەلدەرىندە ءبىلىم الۋدى ءجون ساناعاندار بارشىلىق. ۇمىتكەرلەردىڭ دەنى «مەملەكەتتىك باسقارۋ», «ءبىلىم سالاسىنداعى باسقارۋ», «قۇقىق», «ەكونوميكا», «اقپاراتتىق تەحنولوگيالار مەن جۇيەلەر» ماماندىقتارىن تاڭداعان.
شەتەلدە كادرلار دايارلاۋ ءجونىندەگى رەسپۋبليكالىق كوميسسيا وتىرىسىنىڭ قورىتىندىسى بويىنشا 216 ۇمىتكەرگە «بولاشاق» حالىقارالىق ستيپەندياسىن تاعايىنداۋ تۋرالى شەشىم قابىلداندى. كوميسسيا 2012 جىلعا ارنالعان باسىم ماماندىقتار تىزبەسىن بەكىتتى. تىزبە بويىنشا 74 ماماندىق بار. تاعى ءبىر ەسكەرە كەتەتىن ءجايت, مامانداردى دايارلاۋ تەك ماگيستراتۋرا مەن دوكتورانتۋرا (PhD) باعدارلاماسى شەڭبەرىندە عانا ىسكە اسىرىلماق.
كوميسسيا وتىرىسىنىڭ قورىتىندىسى تۋرالى بايانداعان ءبىلىم سالاسى وكىلىنىڭ ايتۋى بويىنشا, 2011 جىلعى «بولاشاق» باعدارلاماسى شەڭبەرىندە اتقارىلعان جۇمىستار قورىتىندىلاندى. تۇلەكتەردى جۇمىسقا ورنالاستىرۋ ءماسەلەسى ءسوز بولدى. ءبىلىم تۋرالى زاڭعا ەنگىزىلگەن وزگەرىستەر مەن تولىقتىرۋلار بويىنشا «بولاشاق» باعدارلاماسى شەڭبەرىندە كەلەسى جىلدان باستاپ تەك پەداگوگيكالىق كادرلاردىڭ عانا ەمەس, سونىمەن قاتار تەحنيكالىق كادرلاردىڭ, مەديتسينا سالاسى ماماندارىنىڭ تاعىلىمدامادان وتۋىنە مۇمكىندىك تۋعىزىلماق دەسەك, رەسپۋبليكالىق كوميسسيانىڭ قورىتىندىسى بويىنشا جالپى كەلەسى جىلدان باستاپ «بولاشاق» ستيپەندياسىنا يە بولۋعا ۇمىتكەردەن مىندەتتى تۇردە جۇمىس بەرۋشى جاقتىڭ كەپىلدىك حاتى تالاپ ەتىلەدى. ستيپەنديا تاعايىندالعاننان كەيىن ستيپەنديا يەگەرى جۇمىس بەرۋشى جانە حالىقارالىق باعدارلامالار ورتالىعى اراسىندا ءۇش جاقتى كەلىسىم-شارت جاسالىنباق. دەمەك, مۇنان بىلايعى ۋاقىتتا شەتەلدە ءبىلىم الىپ جۇرگەن جاستار ءوزىنىڭ جۇمىس بەرۋشىسىنىڭ كىم ەكەنىن الدىن الا ءبىلۋى شارت. سوندىقتان دا كوميسسيا كەلەسى جىلدان باستاپ ستيپەنديانى تەك جۇمىس ءوتىلى بار ازاماتتارعا عانا بەرۋدى ۇيعاردى.
قاراشاش توقسانباي.