كوپتەگەن شەتەلدىك ازاماتتار ءۇشىن قازاقستانداعى ءبىلىم نارىعى تارتىمدىلىعىمەن ەرەكشەلەنەدى. وسى ورايدا ءال-فارابي اتىنداعى قازۇۋ جوعارى وقۋ ورىندارىنىڭ رەيتينگى بويىنشا وتاندىق ءبىلىم بەرۋدىڭ كوش باسىندا تۇر دەۋگە نەگىز بار. اتالعان ۋنيۆەرسيتەتتە اعىلشىن تىلىندە ءبىلىم بەرۋمەن قاتار 70-تەن استام قوس ديپلومدى باعدارلامالار جۇزەگە اسىرىلىپ كەلەدى.
بۇگىندە الىس جانە جاقىن شەت ەلدەردەن 150-دەن استام تالاپكەر ۇلتتىق ۋنيۆەرسيتەتكە ءتۇسۋ ءۇشىن ونلاين جۇيە ارقىلى تىركەلىپ, قۇجاتتارىن تاپسىردى. قازىر ولاردىڭ وتىنىشتەرى قابىلدانىپ, ەندىگى كەزەكتە وقۋ ورنىنا تالاپقا سايكەس قاشىقتىقتان قابىلدانا الادى. برازيليا, اقش, فرانتسيا, گەرمانيا, يندونەزيا, وڭتۇستىك كورەيا, تۇركيا, ءۇندىستان جانە تاعى باسقا مەملەكەتتەردىڭ ازاماتتارى وسى جۇيە ارقىلى وتىنىشتەرىن ءبىلدىرىپ وتىر.
ۋنيۆەرسيتەتتىڭ وقۋ ءىسى جونىندەگى پرورەكتورى اسقار حيكمەتوۆ بيىل شەتەلدىك ستۋدەنتتەردىڭ ۇلكەن لەگى قابىلداناتىنىن جەتكىزدى. جوعارى حالىقارالىق ستاندارتتارعا ساي كەلەتىن ءبىلىم بەرۋ باعدارلامالارى, سونداي-اق اعىلشىن تىلىندە وقۋ مۇمكىندىگى, زاماناۋي كىتاپحانا, ستۋدەنتتەرگە قىزمەت كورسەتۋ ورتالىعى, سپورت كەشەنى جانە جايلى جاتاقحانالار ورنالاسقان بىرەگەي ۋنيۆەرسيتەت كەشەنى تالاپكەرلەردىڭ قىزىعۋشىلىعىن تۋعىزۋدا. ۇلتتىق ۋنيۆەرسيتەتتە ولار ساپالى ءبىلىم الۋمەن قاتار عىلىمي جانە شىعارماشىلىق الەۋەتىن جۇزەگە اسىرۋعا مۇمكىندىك الادى.
جاڭا وقۋ جىلىندا 600 شەتەلدىك ستۋدەنت قابىلدانادى دەپ جوسپارلانعان. جالپى مەديتسينا, اقپاراتتىق جۇيەلەر, حالىقارالىق قاتىناستار, مەنەدجمەنت, بيوتەحنولوگيا, قازاق جانە ورىس تىلدەرىن وقۋ سياقتى ماماندىقتار جوعارى سۇرانىسقا يە بولىپ وتىر.
ەلۆيرا سەرىكقىزى, «ەگەمەن قازاقستان»