قازاقستاننىڭ ەڭبەك ەرى – تاۋەلسىز قازاقستاننىڭ سوڭعى جىلدارى تاعايىندالعان جوعارى اتاعىنىڭ ءبىرى. وعان ەلىمىزدە ساناۋلى ادام عانا يە بولدى. سونىڭ ەكەۋى قوستاناي وبلىسىنان. «قارقىن» جاۋاپكەرشىلىگى شەكتەۋلى سەرىكتەستىگىنىڭ ديرەكتورى سايران بۇقانوۆ وبلىستاعى بەلگىلى كاسىپكەر, اۋىل شارۋاشىلىعىن ۇيىمداستىرۋشى. ال «زارەچنىي» اۋىل شارۋاشىلىعى عىلىمي-زەرتتەۋ ينستيتۋتىنىڭ ديرەكتورى ۆالەنتين دۆۋرەچەنسكيدىڭ ەسىمى ەلىمىزدەن سىرت جەرلەرگە دە بەلگىلى. ول اۋىل شارۋاشىلىعىنا ەنگىزگەن جاڭا تەحنولوگيانى جاقىن جانە الىس شەت ەل ديقاندارى دا ءبىلىپ, قولدانا باستادى. ىلعال ساقتاۋ تەحنولوگياسىنىڭ بارلىق ەلەمەنتتەرىن تولىق پايدالانعان «زارەچنىي» جاۋاپكەرشىلىگى شەكتەۋلى سەرىكتەستىگى بيىل ءار گەكتاردان 37 تسەنتنەردەن التىن ءدان جينادى. تاياۋدا عانا وتكەن اۋىل شارۋاشىلىعى قىزمەتكەرلەرىنىڭ رەسپۋبليكالىق فورۋمىندا ەلباسى نۇرسۇلتان نازارباەۆ ۆالەنتين ءيۆانوۆيچتىڭ كەۋدەسىنە التىن جۇلدىز تاقتى.
باسقوسۋدا ۋنيۆەرسيتەت قوناقتارى مەن ستۋدەنتتەر, وقىتۋشىلار, عالىمدار اراسىندا ەمەن-جارقىن اڭگىمە بولدى. نارىق كەلگەن كەزدە ءبىر شارۋاشىلىقتى شايقالتپاي, ادامدارىن شاشىراتپاي ءبۇتىن ساقتاپ قالىپ, قازىر قۋاتتى اگروونەركاسىپكە اينالدىرىپ وتىرعان سايران بالكەن ۇلى جاستارعا ىزدەنۋ, ەڭبەكتەنۋ, ءبىلىم الۋ قاجەتتىگىن ايتتى. ال ۆالەنتين يۆانوۆيچ ءوزىنىڭ زەرتتەپ, تاجىريبەدەن وتكىزىپ, وندىرىسكە قوسقان, قازىر مول تابىس كوزىنە اينالىپ وتىرعان ىلعال ساقتاۋ تەحنولوگياسىنا كوبىرەك توقتالدى. بۇگىندە سايران بۇقانوۆتىڭ شارۋاشىلىعىنداعى مامانداردىڭ بارلىعى دەرلىك جاستار. ولار قوستانايداعى جوعارى وقۋ ورنىن ءبىتىرىپ, اۋىل شارۋاشىلىعىنا قاجەتتى ماماندىقتاردى يگەرگەن. كەزدەسۋدە ەڭبەك ەرى اۋىلدا الەۋمەتتىك جاعدايدى دۇرىستاۋ, جاستارعا ارناپ باسپانا سالۋ قاجەتتىگىن دە تىلگە تيەك ەتتى. ول بيىلدىڭ وزىندە جاس ماماندارعا ارناپ ەكى ءۇي تۇرعىزدى. ستۋدەنت جاستار كەزدەسۋ كەزىندە ول باسقاراتىن «قارقىن» شارۋاشىلىعىنا تاجىريبەدەن وتۋگە جانە جۇمىسقا ورنالاسۋعا تىلەك ءبىلدىردى.
ەڭبەك ەرلەرى مەن ستۋدەنتتەر اراسىنداعى اڭگىمەدە اۋىل شارۋاشىلىعىنىڭ بۇگىنگى وزەكتى ماسەلەلەرى دە قوزعالدى. جاستار بيىلعى مول استىقتىڭ باعاسى, اۋىلشارۋاشىلىعى بيزنەسى تۋرالى سۇرادى. سايران بۇقانوۆ قارقىندى دامىپ وتىرعان اۋىل شارۋاشىلىعىنا بولاشاقتا ماماندار كوپ قاجەت بولاتىنىن, سوندىقتان ءبىزدىڭ جاستار بىلىمگە وتە دەن قويۋى كەرەكتىگىن ايتىپ ءوتتى. كەزدەسۋدە ۋنيۆەرسيتەت رەكتورى اسقار نامەتوۆ ءبىلىم ورداسى اۋىل شارۋاشىلىعىنا ارناپ بىرنەشە ماماندىق تۇرلەرىن دايىنداعاندىقتان, ءوندىرىس پەن وقۋ ورنىنىڭ تىعىز بايلانىستا بولۋ كەرەكتىگىنە جانە سونداي جۇمىستىڭ جۇرگىزىلىپ وتىرعانىنا توقتالدى. قوس ەڭبەك ەرى ستۋدەنتتەردىڭ تاعى كوپتەگەن سۇراقتارىنا جاۋاپ بەردى.
ءنازيرا جارىمبەتوۆا.
قوستاناي.