تورتكۇل دۇنيەنى تۇگەل مويىنداتقان استانا قالاسى تاۋەلسىزدىگىمىزدىڭ 20 جىلدىق تورقالى تويى ءوتىپ جاتقاندا تاعى دا ءبىر ۇلكەن جەتىستىككە جەتتى. 2011 جىلدىڭ 19 جەلتوقسانىندا بريۋسسەل قالاسىندا ورنالاسقان ەۋروپالىق ساپا مەنەدجمەنتى قورىنىڭ شتاب-پاتەرىندە استانا قالاسى مۋنيتسيپاليتەتىنە (اكىمدىگىنە) «تانىلعان جەتىستىك» سەرتيفيكاتىن تاپسىرۋ ءراسىمى بولىپ ءوتتى.
وسى ءراسىم بارىسىندا ەFQM-ءنىڭ باس ديرەكتورى پەر كاشە استانا قالاسى اكىمىنىڭ ورىنباسارى ەرلان قوجاعاپانوۆقا سالتاناتتى جاعدايدا اتالمىش سەرتيفيكاتتى تاپسىردى. ول ءوز سوزىندە ەFQM-ءنىڭ «تانىلعان جەتىستىك» اتتى سەرتيفيكاتى قازاقستان ەلورداسى اكىمدىگىنىڭ ەۋروپادا كەڭىنەن تانىلعان باسقارۋ ساپاسىنىڭ ستاندارتتارىنا ساي جۇمىس جۇرگىزۋ جونىندەگى ۇمتىلىسىن ايعاقتايدى دەپ اتاپ كورسەتتى.
ءسويتىپ, استانا قالاسىنىڭ اكىمدىگى قازاقستان رەسپۋبليكاسىندا ەۋروپالىق ساپا مەنەدجمەنتى قورىنىڭ سەرتيفيكاتىنا يە بولعان ءبىرىنشى مەملەكەتتىك ورگان بولىپ تانىلدى. استانا اكىمدەگى حالىقارالىق بەدەلدى قوردىڭ وسىنداي جوعارى باعاسىنا يە بولعان ءتورتىنشى مۋنيتسيپاليتەت بولىپ وتىر. ءداستۇر بويىنشا, ەFQM سەرتيفيكاتىنا كوممەرتسيالىق كاسىپورىندار يە بولاتىن. الايدا سوڭعى جىلدارى ەFQM ىسكەرلىك جەتىستىكتەرىنىڭ مودەلىن ايقىنداۋ ماقساتىندا بۇل سەرتيفيكاتتى بۇقارالىق سەكتورلارعا, ونىڭ ىشىندە مەملەكەتتىك باسقارۋ سالاسىنا دا بەرە باستادى. 2008 جىلى ەFQM سەرتيفيكاتىنا تۇرىكتىڭ بۋرسا قالاسى, 2011 جىلى پولشانىڭ دجەرجونيوۆ, 2011 جىلى يسپانيانىڭ كيۋداد قالالارى يە بولعان بولاتىن.
سەرتيفيكات تاپسىرۋ سالتاناتىندا استانا اكىمدىگىنىڭ ەFQM-ءنىڭ ەۋروپالىق الدىڭعى قاتارلى ۇيىمدار رەەسترىنە كىرگەندىگى اتاپ كورسەتىلدى. ءوز كەزەگىندە بۇل قالانىڭ ءيميدجىن ارتتىرۋعا ىقپال ەتەتىندىگى داۋسىز.
«ءبىز ءۇشىن سوڭعى جىلدارى اكىم اپپاراتىنا جەتىستىكتىڭ ىرگەلى تۇجىرىمدامالارىن, جەتىستىك ءولشەمدەرىن, سونىمەن بىرگە رادار ءوز-وزىنە باعا بەرۋ تەتىكتەرىن, مەملەكەتتىك ورگان ەڭبەككەرلەرىنىڭ قىزمەتىنە باعا بەرۋ جۇمىسىن ەنگىزدىك», دەدى راسىمدە سويلەگەن ءسوزىندە استانا قالاسى اكىمىنىڭ ورىنباسارى ەرلان قوجاعاپانوۆ. ونىڭ ايتۋىنشا, ەFQM تاراپىنان جۇرگىزىلگەن تاۋەلسىز باعا بەرۋ ءجۇيەسى قالا اكىمدىگىنە ءوز جۇمىسىنا سىن كوزبەن قاراي وتىرىپ, جۇمىستىڭ كۇشتى جانە جەتىلدىرۋدى قاجەت ەتەتىن ءالسىز تۇستارىن انىقتاۋعا مۇمكىندىك بەرگەن. سونىمەن بىرگە, ىشكى رەزەرۆتەردى ەسكەرە كەلىپ, باسقارۋ تيىمدىلىگىن جەتىلدىرىپ, ءمۇددەلى بارلىق تاراپتاردىڭ سۇرانىمىن قاناعاتتاندىراتىن قىزمەتتى دامىتۋعا جول اشقان.
استانا قالاسى اكىمدىگىنىڭ ساپا مەنەدجمەنتى باعاسىن انىقتاۋعا ەFQM مۇشەلەرى, اسەسسورلار تادەۋش بۋچاش, اندريانو رۋچيني, ازات ابدارحمانوۆ, ولەگ كاينازاروۆ قاتىسقان. ولار قازاقستان ەلورداسى اكىمى اپپاراتىنىڭ جانە ونىڭ 11 قالالىق باسقارمالارى مەن قۇرىلىمدارىنىڭ جۇمىسىن جان-جاقتى زەرتتەپ, ساراپتاۋدان وتكىزدى. بۇل ساراپتاۋلار قور ادىستەمەسىندە بەلگىلەنگەن 9 كريتەري بويىنشا ءجۇرگىزىلدى. ولار: كوشباسشىلىق, ستراتەگيا, پەرسونالدار, ارىپتەستىك جانە رەسۋرستار; ۇدەرىستەر, ونىمدەر جانە قىزمەت كورسەتۋ; تۇتىنۋشىلار ءۇشىن جەتىستىك, قىزمەتكەرلەر ءۇشىن جەتىستىك, قوعام ءۇشىن جەتىستىك; شەشۋشى قورىتىندىلار.
ەۋروپالىق ساپا مەنەدجمەنتى قورىنىڭ «تانىلعان جەتىستىك» سەرتيفيكاتىنىڭ بەرىلۋى – استانا قالاسى اكىمدىگىنىڭ قالا تۇرعىندارىنىڭ تۇرمىس جاعدايىن جاقسارتۋ ماقساتىنداعى جۇيەلى دە تاباندى جۇرگىزىلگەن جۇمىسىنىڭ جەمىسى. قالا اكىمدىگى الداعى ۋاقىتتا وسى جەتىستىك يگىلىگىن نىعايتا وتىرىپ, بيىك بەلەستەردەن كورىنە بەرمەك.
جىلقىباي جاعىپار ۇلى.