الەمنىڭ جەتەكشى ساۋلەتشىلەرى استاناعا حالىقارالىق ساۋلەتشىلەر كونگرەسىنە قاتىسۋ ءۇشىن جينالدى. حالىقارالىق دەڭگەيدەگى شارا استانانىڭ 20 جىلدىعىنا ارنالعان جانە كاسىبي تاجىريبەمەن الماسۋ مەن جاھاندىق تۇرعىدا جەرگىلىكتى سايكەستىك ماسەلەلەرىنىڭ شەشىمىن تابۋ ارقىلى زاماناۋي وتاندىق ساۋلەت ونەرىن دامىتۋ ماقساتىندا ۇيىمداستىرىلعان.
كونگرەسكە الەمنىڭ 20-دان استام ەلىنەن جەتەكشى ساۋلەتشىلەر, ۋربانيستەر مەن زەرتتەۋشىلەر قاتىستى.
كونگرەستىڭ اشىلۋىندا قر مادەنيەت جانە سپورت ۆيتسە-ءمينيسترى اقتوتى رايىمقۇلوۆا ءسوز سويلەدى.
ء«بىز بۇكىل الەم ساۋلەتشىلەرىنىڭ شىعارماشىلىعىنا زور قۇرمەت بىلدىرە وتىرىپ, ءاردايىم جاڭا جوبالاردى قۋانا كۇتەمىز, ەلىمىز ەڭ ادەمى ەلدەردىڭ ءبىرى بولۋى ءۇشىن جۇمىس ىستەۋگە ءاردايىم ءازىرمىز. كونگرەسس الەم ساۋلەتشىلەرى جينالىپ, وزەكتى پروبلەمالاردى تالقىلاي الاتىن الاڭعا اينالادى دەپ ۇمىتتەنەمىز», — دەدى ا. رايىمقۇلوۆا.
استانا قالاسى اكىمىنىڭ ورىنباسارى ماليكا بەكتۇروۆا ءوز سوزىندە قالاداعى «اقىلدى» جۇيە تۇرعىندار ءۇشىن قالاي قولايلى بولۋى كەرەكتىگى تۋرالى ايتىپ بەردى.
ء«بىز العاش رەت ساۋلەتشىلەر كونگرەسى مەن «اقىلدى» قالا بويىنشا بولىگىن استانانىڭ دامۋدىڭ كەلەسى كەزەڭىنە وتكەنىن كورسەتۋ ءۇشىن بىرىكتىردىك. بۇل جاي عانا قۇرىلىستار ەمەس, ءۇي «اقىلدى» بولۋى ءۇشىن ەندى ءبىز ەنەرگيالىق ءتيىمدى عيماراتتار سالىپ, ماتەريالداردى, وزىق تەحنولوگيالاردى پايدالانعىمىز كەلەدى. قالا ءوسىپ كەلە جاتىر, ونىڭ تيىمدىلىگى دە ارتا ءتۇسۋى ءتيىس. تكش قاراستىرساق, كوپتەگەن ماسەلەلەر بار. ارينە, ءبىرىنشى ماسەلە ءۇيدىڭ توزۋىنا قاتىستى. ءبارى جوندەلىپ بىتپەي, سمارت شەشىمدەر ءتيىمسىز بولىپ قالا بەرمەك», — دەدى اكىمنىڭ ورىنباسارى.
سونىمەن قاتار, بۇگىن كونگرەسس اياسىندا وسى جىلدىڭ 14–16 شىلدەسى ارالىعىندا جاس ساۋلەتشىلەر مەن ستۋدەنتتەر اراسىندا ستارتاپ ۋيكەند فورماتىندا وتكەن «قالالىق ورتا: «اقىلدى» اۋدان» بايقاۋىنىڭ ناتيجەلەرى جاريالاندى.
ءۇش كۇن بويى, تاڭەرتەڭنەن كەشكە دەيىن بايقاۋ قاتىسۋشىلارى ءۇش باعىت – قالالىق ورتا ءۇشىن يننوۆاتسيالار, ۋربانيستيكا جانە جەرگىلىكتى قوعامدىق كەڭىستىكتى دامىتۋ, «جاسىل» تەحنولوگيالار ەنگىزۋ بويىنشا شەشىمدەر ويلاپ شىعاردى. «اقىلدى» اۋداننىڭ ورنالاسقان جەرى رەتىندە استانا قالاسىنداعى جاستار شاعىن اۋدانى تاڭدالدى.
تۇرعىندار ءۇشىن قىسقى جىلىجاي كەشەندەرىن جاساۋدى ۇسىنعان «Sredalab» كومانداسى گران-پري يەلەندى. بۇل جوبانىڭ ەرەكشەلىگى, جىلىجايلاردىڭ عيماراتتاردىڭ شاتىرلارى مەن قاسبەتتەرىندە شىنى ۇيشىكتەر تۇرىندە سالىنىپ, جىلۋ تراسسالارى, كۇن باتارەيالارىن قوسۋ, جەل ەنەرگياسى ارقىلى جىلىتىلا الاتىندىعىندا. جىلىجايدىڭ ىسكە قوسىلۋىنان تۇسەتىن كىرىستى يدەيا اۆتورلارىنىڭ ويىنشا, اۋدان تۇرعىندارى اۋلا تەرريتورياسىن اباتتاندىرۋعا نەمەسە بالالارعا قاجەتتى قۇرالدارى ساتىپ الۋعا باعىتتاي الادى.
ءبىرىنشى ورىندى «Nurcelona» كومانداسى يەلەندى. ولار قالاداعى كولىك تۇراقتارى ءۇشىن AirBnB بالاماسىن جاساۋدى ۇسىنعان.
قالالىق درەناج جۇيەلەرىن ۇسىنعان «RainTech» كومانداسى ەكىنشى ورىنعا يە بولدى.
ءۇشىنشى ورىندى «ات مەكتەبى» كومانداسى الدى. ولاردىڭ شەشىمى — مۇمكىندىگى شەكتەۋلى جاندار ءۇشىن ات-مەكتەپ قۇرۋ.
استانا اكىمىنىڭ ارنايى سىيلىعىمەن «King Wins» كومانداسى ماراپاتتالدى.
Astana Innovations باسقارما توراعاسى ولجاس سارتاەۆ جەڭىمپازداردىڭ ءوز يدەيالارىن «اقىلدى» اۋدان جوباسى اياسىندا ىسكە اسىرۋعا مۇمكىندىكتەرى بولاتىنىن ايتتى.
«ول «جاستار» شاعىن اۋدانىندا. بۇگىندە وندا وسى ءۇش باعىت بويىنشا بىرنەشە تەحنولوگيا ەنگىزىلگەن. جۇمىستار جالعاسۋدا. جىلىجاي كەشەندەرى تۋرالى ايتساق. ولاردى ىسكە اسىرۋ ءۇشىن ءۇش-ءتورت اي ۋاقىت كەرەك. ءبىز ءوز تاراپىمىزدان باعالاپ, بيىل ەڭ بولماسا ءبىر جىلىجايدى شاعىن اۋدانعا شىعارۋعا تىرىسامىز. كولىك تۇراقتارى بويىنشا جوبالارعا قاتىستى. ونى جاستار شاعىن اۋدانىندا باسىمدىقپەن ىسكە اسىرامىز. بىراق ءبىز بۇل اۋدانمەن عانا شەكتەلىپ قالمايمىز», — دەدى و. سارتاەۆ.
2018 جىلى ءساۋىر ايىندا بايقوڭىر اۋدانىنىڭ ا. باراەۆ, ا. كراۆتسوۆ, ج. تاشەنوۆ جانە ت. حۋسەين كوشەلەرىنىڭ قيىلىسىنداعى «جاستار» شاعىن اۋدانىندا ورنالاساتىن «اقىلدى» اۋدان جوباسى تانىستىرىلدى. جوبا 60 ملن تەڭگە جەكە ينۆەستيتسيالار تارتتى. ينۆەستيتسيالار «اقىلدى» ەسەپتەۋىشتەردى ورناتۋعا, جاياۋ جۇرگىنشى جولدارىنا, ايالدامالاردى, سونىمەن قاتار فين كومپانياسىنىڭ جىلۋدى اۆتوماتتى رەتتەۋىشىن قويۋعا جۇمسالدى.
حالىقارالىق ساۋلەتشىلەر كونگرەسىنىڭ ءبىرىنشى كۇنى «Astana Innovations» اق مەن دەنساۋلىق ساقتاۋ مينيسترلىگى, ءبىلىم جانە عىلىم مينيسترلىگى, ەڭبەك جانە حالىقتى الەۋمەتتىك قورعاۋ مينيسترلىگى, سونىمەن قاتار «ۇلتتىق تەحنولوگيالىق دامۋ اگەنتتىگى» اق اراسىندا ىنتىماقتاستىق تۋرالى 4 مەموراندۋمعا قول قويىلدى.
ەڭبەك جانە حالىقتى الەۋمەتتىك قورعاۋ مينيسترلىگىمەن ولاردىڭ تسيفرلىق كەڭىستىككە ەنگىزۋگە بولاتىن سەرۆيستەرى بار. بۇل سەرۆيستەر ءتىزىمى ايقىندالدى. سونىمەن قاتار, ءبىز ءموبيلدى قوسىمشاعا شىعارا الاتىن قىزمەتتەر ءتىزىمى ناقتىلاندى. قازىرگى تاڭدا دارىگەردى ۇيگە شاقىرۋ مەن دارىگەردىڭ قابىلداۋىنا جازىلۋ ءموبيلدى قوسىمشادا بار.
كونگرەسس اياسىندا «قالالىق ورتا: ءداستۇرى جانە بولاشاعى» تاقىرىبىندا حالىقارالىق عىلىمي-پراكتيكالىق كونفەرەنتسيا وتكىزىلدى. شارا پلەنارلىق وتىرىس جانە 2 پانەلدىك سەسسيا فورماتىندا ءوتتى:
جاڭا قالالار. جاڭادان باستاۋ;
الەۋمەتتىك جوبالاۋ. اۋلادان قالاعا دەيىن.
سونىمەن قاتار كونگرەسس وتكەن كۇندەرى «قۇندىلىقتاردى سارالاۋ. جاھاندىق مانماتىندەگى جەرگىلىكتى سايكەستىك» تاقىرىبىنا «دوڭگەلەك ۇستەل» وتىرىسى ءوتتى. كونگرەسس جۇمىسى بارىسىندا سونداي-اق شەبەرلىك سىنىپتارى ۇيىمداستىرىلدى, تابىستى شەتەلدىك ساۋلەتشىلەردىڭ دارىستەرى وقىلدى, «ورتانى كىم قۇرادى؟» تاقىرىبىندا ديالوگ بولدى.