جۋىردا استانانىڭ 20 جىلدىعىنا وراي, ەلباسىمىزدىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ اياسىندا ستەپنوگورسك قالالىق تاريحي-ولكەتانۋ مۋزەيى اشىلدى.
مۇراجايعا ستەپنوگورسك قالاسىنىڭ اكىمى ءانۋار كۇمپەكەەۆتىڭ قولداۋىمەن جانە «قازاقالتىن تەحنولودجي» جشس-نىڭ ديرەكتورى دانيال نابيەۆتىڭ دەمەۋشىلىگىمەن 6,5 ميلليون تەڭگەنىڭ كۇردەلى جوندەۋ جۇمىستارى جۇرگىزىلىپ, جوبانىڭ جۇرتشىلىققا تانىستىرىلىمى بولدى.
شارانىڭ اشىلۋ سالتاناتىنا قازاقستان رەسپۋبليكاسىنىڭ بوكس فەدەراتسياسىنىڭ ۆيتسە-پرەزيدەنتى, وليمپيالىق بوكس وقۋ-جاتتىعۋ ورتالىعىنىڭ ديرەكتورى, 2000 جىلعى وليمپيادا چەمپيونى, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ەرماحان يبرايموۆ, «AstanaArlans» جارتىلاي كاسىبي بوكس كلۋبىنىڭ باس مەنەدجەرى, 2004 جىلعى وليمپيادا چەمپيونى باحتيار ارتاەۆ, ازيا ويىندارىنىڭ چەمپيونى نۇرجان كارىمجانوۆ قاتىستى.
جاڭا فورماتتا قازاقستاننىڭ ءۇشىنشى جاڭعىرۋىنا سايكەس ەلىمىزدىڭ يندۋستريالىق دامۋىنا ەلەۋلى ۇلەس قوسقان قالا كاسىپورىندارىنىڭ ماكەتتەرى مەن ونىمدەرى كورىنىس تاپتى.
بايقال ءبايادىل,
«ەگەمەن قازاقستان»
اقمولا وبلىسى