بيىل قاراعاندى ءوڭىرىنىڭ بەكتاۋاتا شاتقالىنداعى بالالارعا ارنالعان «فاكەل» ماۋسىمدىق ساۋىقتىرۋ لاگەرى تاعى ءبىر تاماشا باستامانى قولعا الدى. تابيعات اياسىنا شىققان جاس جەتكىنشەكتەر بۇدان بىلاي دەمالىپ قانا قويماي, زياتكەرلىكتى دامىتۋ الاڭدارىندا وزدەرىنىڭ قابىلەتتەرىن ارتتىرۋعا مۇمكىندىكتەرى بار. اتاپ ايتقاندا, روبوت-تەحنيكا, قولمەن مودەلدەۋ, قولدانبالى ونەر زەرتحانالارىندا جۇمىس ىستەۋ, لاگەر لاندشافتارىن كوگالداندىرۋ, كوگەرشىن اسىراۋ, بي ۇيىرمەسى, قۋىرشاق تەاترى جانە ۇشتىلدىلىك سياقتى جازعى مەكتەپتەردىڭ جۇمىسى بۇگىندە لاگەر اياسىن كەڭەيتە تۇسكەن. بۇل بىرىنشىدەن, بالالاردىڭ تانىمى مەن تالانتىن ۇشتاۋ بولسا, ەكىنشى جاعىنان ءتۋريزمنىڭ تەتىكتەرىن جەتىلدىرۋدىڭ تاعى ءبىر ارناسى دەۋىمىزگە بولادى.
اتالعان الاڭدا سونىمەن قاتار ەرەسەك بالالار وتريادىمەن ترەنينگ فورماتىندا كاسىپتىك باعدارلاۋ بويىنشا جۇمىستار دا جۇرگىزىلەتىنىن ايتا كەتكەنىمىز ءجون. بۇگىندە بولاشاق ماماندىعىڭدى دۇرىس تاڭداۋدىڭ ماڭىزدىلىعى زور. بۇل – ءار جەتكىنشەكتىڭ الدىندا تۇرعان وزەكتى ماسەلە. ۇدەمەلى دامۋ ۇستىندەگى الەمدە فۋتۋرولوگتار قايسىبىر ماماندىق تۇرلەرىنىڭ مۇلدەم سۇرانىسسىز قالىپ, جاڭا ءبىر ماماندىق تۇرلەرىنىڭ پايدا بولاتىنى تۋرالى ايتادى. سوندىقتان دا ماماندىق تاڭداۋدا بىرقاتار فاكتوردى العا تارتا وتىرىپ, دۇرىس قادام جاساۋ اسا ماڭىزدى. «فاكەل» ماۋسىمدىق ساۋىقتىرۋ لاگەرى سول پسيحولوگيا مەن كاسىپتىك باعدار اراسىنداعى كوزگە كورىنبەس بايلانىستىڭ بۇگىنى مەن ەرتەڭىنە ەركىن كوز جۇگىرتۋدى كوزدەيدى.
جۋىردا اقتوعايلىق بالالاردىڭ جازعى دەمالىسىمەن جانە تۇرمىستىق جاعدايىمەن تانىسقان قاراعاندى وبلىستىق ءبىلىم باسقارماسىنىڭ باسشىسى ەسەنعازى يمانعاليەۆ سپورت الاڭدارىندا, كوشەدەگى جاتتىعۋ قۇرىلعىلارىندا, سكالودرومدا, ستاندارتتى ەمەس سپورتتىق جابدىقتاردا جاتتىعىپ جۇرگەن جاستاردىڭ اراسىندا بولىپ, بالالارعا ادام ميىنىڭ ءىس-ارەكەتتى قالاي باسقاراتىنىن بايانداپ بەردى. بالالار دا وزدەرى قۇراستىرعان 5 جاياۋ تۋريستىك مارشرۋت پەن 1 ۆەلوسيپەدتىك تۋريستىك مارشرۋت تۋرالى ويلارى مەن اسەرلەرىن ورتاعا سالىپ, وزدەرىن ساياحاتقا شىعىپ قانا قويماي, قازاقستاننىڭ كيەلى ورىندارىنىڭ ءبىرى بەكتاۋاتامەن تەرەڭىرەك تانىسقاندارىن جەتكىزدى.
ەسەنعازى نۇرتولەۋ ۇلى جەتكىنشەكتەرگە سوتسيونيكا, ياعني ادام پسيحيكاسىنىڭ قورشاعان ورتامەن اقپاراتتىق قارىم-قاتىناس جاساۋ عىلىمى تۋرالى قىزىقتى دا تارتىمدى اڭگىمەلەپ بەردى. ونىڭ ايتۋىنشا, «ديحاتوميكالىق تەست» جۇرگىزۋ بارىسىندا ترەنينگتىڭ ءار قاتىسۋشىسى ءوزىنىڭ تۇلعالىق ءتيپىن ايقىنداي الدى. سونىمەن قاتار ءار جاسوسپىرىمگە قابىلەتتەرىن قانداي سالادا قولدانۋعا قاتىستى جانە ماماندىق تاڭداۋ بويىنشا ۇسىنىستار بەرۋگە بولادى.
ترەنينگ بارىسىندا بالالار بەلسەندىلىك تانىتىپ, ءارالۋان سۇراقتار قويدى. سوتسيونيكالىق بىلىمگە ۇلكەن ءمان بەرىپ, ونى جەتىستىككە جەتۋ ءۇشىن دۇرىس پايدالانۋ تۋرالى كوپتەگەن جاڭا اقپارات الدى. اڭگىمە اسەرىنە بولەنگەن بالالار قىركۇيەك ايىندا مەكتەپكە كەلگەن كەزدە قۇرداستارىمەن دە وسىنداي كەزدەسۋ وتكىزەتىندىكتەرىن ايتتى. بۇل ءۇشىن لاگەردىڭ پسيحولوگتارى مەن الەۋمەتتىك پەداگوگتەرىنىڭ قىزمەت كورسەتۋ ورتالىعى قوسىمشا وقىتۋ ساباقتارىن جانداندىرا تۇسپەك.
ميراس اسان,
«ەگەمەن قازاقستان»
قاراعاندى وبلىسى