كوكشەتاۋدا كورمە سيرەك وتەدى. قىلقالام ۇستاعاندار از. سوندىقتان دا ءار كورمەدەن جىل كەلگەندەي جاڭالىق ىزدەيمىز. تاياۋدا وبلىستىق تاريحي-ولكەتانۋ مۋزەيىندە «رۋحاني جاڭعىرۋ» باعدارلاماسى اياسىندا قازاقستان رەسپۋبليكاسى كوركەمونەر اكادەمياسىنىڭ كوررەسپوندەنت-مۇشەسى, كسرو جانە قازاقستان سۋرەتشىلەر وداعىنىڭ مۇشەسى دۋلات قوسپانوۆتىڭ جەكە كورمەسى ۇيىمداستىرىلدى.
جەرگىلىكتى قىلقالام شەبەرى, كەسكىندەمەشىنىڭ كورمەسىنە قويىلعان تۋىندىلارىنىڭ ارقايسىسىنىڭ استارىندا وزىندىك فيلوسوفيالىق ماعىنا بار. «دالا», «التىن ادام», «ابىلاي حان», «قانجىعالى بوگەنباي», «قاناي بي», «كوكشەتاۋ», «وقجەتپەس» كارتينالارى ەل تاريحىنان سىر شەرتىپ تۇر. «جورىق الدىندا...» اتتى تۋىندىسىندا ابىلاي حان مەن بۇقار جىراۋ, قاراكەرەي قابانباي, قانجىعالى بوگەنباي, باتىر بايان بەينەلەنىپ, كورەرمەننىڭ كوز الدىنا سان عاسىرلار سورابىن اكەلەدى. بۇل تۋىندى رەسپۋبليكالىق كاتالوگقا ەنگەن.
سۋرەتشى دۋلات قوسپانوۆتىڭ تۋىندىلارى قازاقستان رەسپۋبليكاسىنىڭ ۇلتتىق مۋزەيىندە, قازاقستان رەسپۋبليكاسى كوركەم كورمەلەر باسقارماسىندا, قىتاي, رەسەي, امەريكا, جاپونيا, گەرمانيا, بالتىق ەلى ليتۆادا, ەلىمىزدىڭ باسقا دا قالالارىنداعى گالەرەيالار مەن جەكە ادامدار قورىندا ساقتاۋلى.
سۋرەتشىنىڭ وزىندىك قولتاڭباسى بار. ونىڭ تاريحي تۋىندىلارى ادامدى قيال قاناتىندا ءسوز جەتكىزسىز عاجايىپ ونەر الەمىنە جەتەلەي تۇسكەندەي. عۇمىر جولىنىڭ قىرىق جىلىن ونەر سالاسىنا ارناعان ايتۋلى سۋرەتشىنىڭ قىلقالامىنان تۋعان تۋىندىلار كەلەر ۇرپاققا رۋحاني ازىق بولارى انىق.
بايقال ءبايادىل, «ەگەمەن قازاقستان»
كوكشەتاۋ