كەشە فينليانديادا رەسەي مەن اقش پرەزيدەنتتەرى ۆلاديمير پۋتين مەن دونالد ترامپتىڭ كوپتەن جوسپارلانعان كەزدەسۋلەرى ءوتتى.
حەلسينكيدەگى پرەزيدەنتتىك سارايدا ەكى مەملەكەتتىڭ باسشىسى الدىمەن شاعىن قۇرامدا كەزدەسىپ, پىكىر الماستى.
كەزدەسۋ بارىسىندا رەسەي پرەزيدەنتى تياناقتى اڭگىمەلەسۋدىڭ ۋاقىتى جەتكەندىگىن اتاپ ءوتتى.
– ءبىزدىڭ بايلانىستارىمىز جالعاسىپ كەلەدى. بىزدەر تەلەفونمەن دە سويلەسىپ وتىردىق جانە حالىقارالىق ءىس-شارالاردىڭ اياسىندا بىرنەشە رەت جۇزدەستىك. مىنە, ەكى جاقتى قارىم-قاتىناستار مەن الەمدەگى «جاندى نۇكتەلەر» جايىندا اشىلىپ سويلەسەتىن ۋاقىت جەتتى جانە قوردالانىپ قالعان ماسەلە كوپ, – دەدى ۆ.پۋتين.
ال د.ترامپ ءوز سوزىندە كۇللى الەم ماسكەۋ مەن ۆاشينگتوننىڭ اراسىنداعى قارىم-قاتىناستاردىڭ جاقسارۋىن كۇتىپ وتىرعاندىعىنا توقتالدى.
– ءبىزدىڭ ەلدەرىمىزدىڭ ەكىجاقتى بايلانىستاردى قالپىنا كەلتىرۋگە ۇلكەن مۇمكىندىگى بار. ول بىرنەشە جىلدارعا سوزىلىپ كەلەدى, – دەدى د.ترامپ.
اقش پرەزيدەنتى, سونداي-اق ءوز سوزىندە امەريكا تاراپىن ساۋدا, اسكەري ماسەلەلەر, ەكى مەملەكەتتىڭ يادرولىق الەۋەتى جانە قىتايعا بايلانىستى كەلىسسوزدەر قىزىقتىراتىندىعىن اتاپ ءوتتى. ول, سونىمەن قاتار ءپۋتيندى رەسەيدىڭ فۋتبولدان الەم چەمپيوناتىن ءساتتى وتكىزۋىمەن قۇتتىقتاۋدى ۇمىتپادى.
بۇل شاعىن قۇرامداعى كەزدەسۋلەردىڭ بۇقارا ءۇشىن اشىق تۇسى ەكى مەملەكەت باسشىلارىنىڭ قول الىسۋىمەن تۇيىندەلدى. بۇدان سوڭ پۋتين مەن ترامپ كەلىسسوزدەرىن وڭاشا جالعاستىردى.
سونىمەن قاتار كەڭەيتىلگەن قۇرامداعى كەلىسسوزدەر دە ءوتتى.
اتاپ وتەرلىگى, حەلسينكي ءسامميتى كوپجاقتى حالىقارالىق فورۋمداردى ايتپاعاندا, الەمدەگى ەكى جەتەكشى مەملەكەت باسشىلارىنىڭ تولىق كەزدەسۋىنە مۇمكىندىك بەرگەن العاشقى جيىن بولدى.
سەرىك ابدىبەك, «ەگەمەن قازاقستان»