الماتىنىڭ تۇركسىب اۋدانىندا جابىق پىشىندەگى جاڭا قوسالقى ستانسا ىسكە قوسىلدى. سۋ جاڭا نىسان 2008 جىلى باستالعان الماتى قالاسىن ەلەكترمەن ورنىقتى جابدىقتاۋ باعدارلاماسىن تولىقتاي ىسكە اسىرۋعا مۇمكىندىك بەرىپ وتىر.
نىساننىڭ اشىلۋىنا ارنايى كەلگەن «سامۇرىق -قازىنا» ۇلتتىق ءال-اۋقات قورى» اق باسقارما توراعاسى احمەتجان ەسىموۆ ەلىمىزدىڭ ەڭ ءىرى مەگاپوليسىن ەنەرگيامەن ءۇزىلىسسىز قامتاماسىز ەتۋ ماسەلەسىنە ۇلكەن ءمان بەرىلەتىنىن, ەندىگى جالعىز مىندەت وسى قۋات كوزدەرىن دۇرىس پايدالانۋ ەكەنىن اتاپ ءوتتى. «تۇركسىب» قوسالقى ستانساسى ترانسفورماتورلىق قۋاتتى 30 مۆا-عا ارتتىرادى جانە تۇركسىب اۋدانىنىڭ ورتالىق بولىگىن, سونداي-اق «قولجەتىمدى باسپانا» باعدارلاماسى اياسىندا سالىنعان «جاس قانات» جاڭا شاعىن اۋدانىن, «الماتى اگلومەراتسياسىنىڭ 2030 جىلعا دەيىنگى وڭىرارالىق سحەماسى» باعدارلاماسى بويىنشا قالاعا قوسىلعان «قايرات» شاعىن اۋدانىنىڭ نەگىزگى بولىگىن ەلەكترمەن قامتاماسىز ەتپەك.
– مەملەكەت باسشىسى وسىدان ون جىل بۇرىن العا قويعان مىندەتتەردىڭ ءبىرى الماتى قالاسىن ەلەكترمەن ورنىقتى جابدىقتاۋ بولاتىن. بۇگىن قوسالقى ستانسانىڭ ىسكە قوسىلۋىمەن بۇل ماسەلە تولىق شەشىلدى. ەندىگى مىندەت – وسى قۋات كوزدەرىن دۇرىس پايدالانۋ, ويتكەنى جۇمسالعان 20 ملرد تەڭگەدەن استام قاراجات ءتيىمدى جۇمىس ىستەۋى كەرەك. ەستەرىڭىزدە بولار, وسىدان 10 جىل بۇرىن جارىقتى كەزەك-كەزەگىمەن اپاتتىق جاعدايدا ءسوندىرىپ, ەلەكترمەن ورنىقتى جابدىقتاي المايتىنبىز. بۇل قالانىڭ جانە بيزنەستىڭ دامۋىنا كەدەرگى كەلتىرىپ, حالىقتىڭ الەۋمەتتىك جاعدايىنا اسەر ەتەتىن. ەندى بۇل وزەكتى پروبلەما تولىقتاي شەشىلدى دەپ ايتۋعا ابدەن بولادى, – دەپ اتاپ ءوتتى احمەتجان ەسىموۆ.
سانى جاعىنان 33-ءشى قوسالقى ستانسا ىسكە قوسىلعاننان كەيىن, قالانى ەنەرگيامەن جابدىقتاۋ كارتاسى تولىعىمەن «جاسىل تۇسكە» بويالاتىن بولادى.
سونداي-اق احمەتجان ەسىموۆ الماتى قالاسىنا جۇمىس ساپارى بارىسىندا قالاداعى ەنەرگەتيكالىق كەشەننىڭ ورنىقتى دامۋىندا ۇلكەن ماڭىزعا يە «الاتاۋ جارىق كومپانياسى» اق-تىڭ وبەكتىلەرىندە بولىپ, جۇكتەمەنى «تاۋلى قىرات» قوسالقى ستانساسىنان «ەرمەنساي» قوسالقى ستانساسىنا اۋىستىرۋ جۇمىستارىمەن تانىستى. بۇل جوبا «تاۋلى قىرات» ورنالاسقان اۋماقتا لاي كوشكىنى بولعان جاعدايدا, قوسالقى ستانسانىڭ قيراۋ جانە تۇتىنۋشىلاردىڭ ەلەكتردەن جاپپاي اعىتىلۋ قاۋپى تۋىنداۋىنا بايلانىستى ىسكە اسىرىلۋدا. اپاتتى جاعدايلاردى بولدىرماۋ ماقساتىندا جۇكتەمەنى «گورنىي گيگانت» شاعىن ستانساسىنان «ەرمەنسايعا» اۋىستىرۋ تۋرالى شەشىم قابىلدانعانىن ايتا كەتكەن ءجون.
سوڭعى ۇلگىدەگى زاماناۋي تەحنولوگيالارمەن جابدىقتالعان «ەرمەنساي» قوسالقى ستانساسى الماتى قالاسىندا قىسقى ازيادا – 2011 ويىندارىنىڭ وتكىزىلۋىنە ورايلاستىرىلىپ ىسكە قوسىلعان بولاتىن. ماماندار جۇكتەمەلەردى اۋىستىرۋ جۇمىستارى تولىق اياقتالعاننان كەيىن «تاۋلى قىرات» قوسالقى ستانساسى جويىلاتىنىن ايتادى.
ارمان وكتيابر, «ەگەمەن قازاقستان»
الماتى