تالدىقورعان قالاسىندا قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ الماتى وبلىسى بويىنشا فيليالى اشىلدى. مەملەكەتتىك قىزمەتشىلەردىڭ كاسىبي ءبىلىمىن جەتىلدىرۋ باعىتىندا جۇمىس ىستەيتىن اكادەميا فيليالىنىڭ اشىلۋىنا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ارنايى كەلدى.
فيليال عيماراتىنىڭ اشىلۋ سالتاناتىندا اگەنتتىك توراعاسى اليك شپەكباەۆ پەن الماتى وبلىسىنىڭ اكىمى اماندىق باتالوۆ عيمارات الدىنا قويىلعان ەسكەرتكىش تاقتاعا قولتاڭبالارىن قالدىردى. مۇنداعى وقىتۋ كابينەتتەرىن, كىتاپحانا مەن باسقا دا جۇمىس بولمەلەرىن ارالاپ, ولاردىڭ جابدىقتالۋىمەن تانىسقان ا. شپەكباەۆ اكادەميانىڭ الماتى وبلىستىق فيليالىن رەسپۋبليكاداعى ۇزدىك فيليال رەتىندە اتاپ ءوتتى.
- مەملەكەتتىڭ قولداۋىمەن وبلىس ورتالىعىندا اشىلىپ وتىرعان اكادەميا فيليالى – ءوڭىردىڭ مەملەكەتتىك قىزمەتشىلەرى ءۇشىن تاماشا مۇمكىندىك. الداعى ۋاقىتتا مۇندا ءبىلىمى مەن كاسىبي بىلىكتىلىگىن جەتىلدىرگەن مەملەكەتتىك قىزمەتشىلەر وبلىس ەكونوميكاسىن ودان ءارى دامىتۋعا سەپتىگىن تيگىزەتىنىنە سەنىمدىمىن, - دەدى جيىندا ءسوز العان ايماق باسشىسى ا. باتالوۆ.
ال ا. شپەكباەۆ ءوز سوزىندە پرەزيدەنتتىڭ تاپسىرماسىنا سايكەس مەملەكەتتىك قىزمەت ىستەرى سالاسىنداعى قولعا الىنىپ جاتقان زاماناۋي باعىتتار تۋرالى باياندادى. سونىڭ ىشىندە سىبايلاس جەمقورلىقتىڭ الدىن الۋ جانە ونىمەن كۇرەس جۇمىستارىنىڭ ناتيجەلەرى, حالىق الدىنداعى ەسەپتىلىك, مەملەكەتتىك قىزمەت كورسەتۋدى اۆتوماتتاندىرۋ, جالپى سالانى تسيفرلاندىرۋ تۋرالى ماسەلەلەرگە كەڭىنەن توقتالدى. اسىرەسە ەڭ الدىمەن مەملەكەتتىك قىزمەتشىلەردىڭ ءوزى ەلەكتروندى ۇكىمەت پورتالى ارقىلى جۇمىس ىستەپ ۇيرەنۋى كەرەكتىگىن اتاپ ايتتى.
- تسيفرلاندىرۋ ىسىنە ەڭ الدىمەن جەرگىلىكتى جەرلەردە اكىمدەر مۇددەلى بولۋى كەرەك. بۇل ورايدا الماتى وبلىسىنىڭ اكىمدىگى زور قولداۋلار كورسەتىپ وتىر. سوڭعى ۋاقىتتا الماتى وبلىسىندا ەلەكتروندى فورماتتا مەملەكەتتىك قىزمەت كورسەتۋ كورسەتكىشى ارتىپ كەلەدى, - دەدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى.
سونداي-اق, وسى كۇنى وبلىس ورتالىعىندا «مەملەكەتتىك قىزمەتتى كاسىبيلەندىرۋدىڭ زاماناۋي ترەندتەرى: وڭىرلىك اسپەكت» اتتى سەمينار-كەڭەس ءوتتى. سەميناردى پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى فاتيما جاقىپوۆا جۇرگىزدى. جيىنعا رەسپۋبليكامىزدىڭ وزگە وبلىستارىنداعى اكادەميا فيليالدارىنىڭ ديرەكتورلارى ارنايى شاقىرىلدى. سەميناردان كەيىن اليك شپەكباەۆ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ عيماراتىن ارالاپ, دەپارتامەنت ۇجىمىمەن كەزدەستى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
سۋرەت وبلىسى اكىمى ءباسپاسوز قىزمەتىنەن الىندى