قازاقستان تاۋەلسىزدىگىنىڭ 20 جىلدىعى مەرەكەسىندە جەلتوقساندىقتاردىڭ ءبىر توبىنا جاڭا باسپانا بەرىلەتىن بولدى. الماتى قالالىق اكىمدىگىندە وتكەن جيىندا قالا اكىمىنىڭ ورىنباسارى سەرىك سەيدۋمانوۆ بۇدان شيرەك عاسىر بۇرىن, ياعني 1986 جىلدىڭ جەلتوقسان ايىندا الماتىدا وتكەن جەلتوقسان وقيعاسىنا قاتىسقاندارعا مەملەكەتتىك تۇرعىن ءۇي قورىنان التى پاتەر بولىنگەنى تۋرالى حابارلادى.
ولاردىڭ اراسىندا سەرىك تولەگەن, امانعازى كارىپجان, باقىتجان تۇرداليەۆا, عاينوللا ايمانوۆ, اسقارباي بەكبوسىنوۆ جانە ۆالەري كارو-مادە سياقتى تۇرعىندار بار. الماتى قالاسىنىڭ بوستاندىق, المالى جانە اۋەزوۆ اۋداندىق اكىمدىكتەرىندە تۇرعىن ءۇي كەزەگىندە تۇرعاندار قازاقستان رەسپۋبليكاسى تاۋەلسىزدىگىنىڭ 20 جىلدىعى مەن جەلتوقسان وقيعاسىنىڭ 25 جىلدىعىنا وراي قونىس تويىن تويلايدى.
باقىت بالعارينا.
الماتى.