بۇۇ باس حاتشىسى.
جوعارى مارتەبەلى, قۇرمەتتى نۇرسۇلتان ءابىش ۇلى, قۇرمەتتى مىرزالار مەن حانىمدار. قازاقستان حالقى مەن ۇكىمەتىن سىزدەردىڭ ەلدەرىڭىزدىڭ تاۋەلسىزدىگىنىڭ 20 جىلدىعىنا بايلانىستى قۇتتىقتاۋعا قۋانىشتىمىن. «قازاق» دەگەن ءسوز كونە تۇرىك تىلىندە «تاۋەلسىز» نەمەسە «رۋحى ەركىن» دەگەن ماعىنانى بىلدىرەدى. بۇل ۇعىم قازاق حالقىنىڭ ناعىز بولمىسىن ءدال انىقتاعان. سەبەبى, تاۋەلسىزدىك العان كەزەڭنەن باستاپ قازاقستان حالقى قازاقستاندى ايماقتىق ساحنانىڭ بارلىق سالالارىندا شەشۋشى ويىنشىعا اينالدىرۋ ءۇشىن ۇلكەن بەلسەندىلىك تانىتا ءبىلدى. يادرولىق قارۋسىزدانۋ ماسەلەسىن دامىتۋ جونىندە كوپ مەملەكەت قازاقستان سياقتى تاباندىلىق تانىتا المادى. وتكەن جىلى مەن ارالاۋ مۇمكىندىگىنە يە بولعان سەمەي يادرولىق پوليگونى بۇل عاسىر تاجالىنىڭ ادامزاتقا تيگىزەتىن زاردابىن ەلەستەتەتىن كوڭىلسىز كورىنىستەرگە تولى. وسىعان بايلانىستى ورتالىق ازيادا يادرولىق قارۋدان ازات ايماق قۇرۋ جونىندەگى جاسالعان كەلىسىم بۇكىل دۇنيە جۇزىندەگى بەيبىتشىلىك پەن قاۋىپسىزدىككە قوسىلعان ماڭىزدى ۇلەس بولىپ سانالادى. سونىمەن بىرگە قازاقستان 29 تامىزدى – يادرولىق سىناققا قارسى ءىس-شارالاردىڭ حالىقارالىق كۇنى رەتىندە اتاپ ءوتۋ جونىندە باستاما كوتەردى. بۇل باستامانى بۇۇ باس اسسامبلەياسى بەكىتتى. مەن قازاقستانعا يادرولىق قارۋدان ازات بەيبىتشىلىك سۇيگىش الەم قۇرۋ جولىنداعى باستاماسى ءۇشىن ريزامىن. بۇعان قوسىمشا ەۋروپاداعى قاۋىپسىزدىك جانە ىنتىماقتاستىق ۇيىمى, شانحاي ىنتىماقتاستىق ۇيىمى جانە يسلام ىنتىماقتاستىعى ۇيىمى سياقتى ايماقتىق جانە حالىقارالىق ۇيىمدارعا ويداعىداي توراعالىق ەتە وتىرىپ, قازاقستان بۇگىنگى زاماننىڭ ەتنوسارالىق ۇيلەستىك جانە دىنارالىق ديالوگ سياقتى وتە ماڭىزدى ماسەلەلەرمەن بەلسەندى اينالىسىپ كەلەدى. الەمدىك جانە ءداستۇرلى دىندەر كوشباسشىلارىنىڭ سەزدەرى – قازاقستاننىڭ بۇگىنگى زامان ءۇشىن وتە قاجەتتى باستاماسى. بۇل باستاما تولەرانتتىلىقتى دامىتۋعا, مادەنيەتتەر, داستۇرلەر جانە ءدىني نانىم-سەنىمدەر اراسىنداعى ءوزارا تۇسىنىستىك پەن توزىمدىلىكتى قالىپتاستىرادى. مەن قازاقستاندى وسى سالاداعى كۇش-جىگەردى ودان ءارى دامىتۋعا شاقىرامىن, ءوز كەزەگىندە بۇۇ ۇلتىنا, ەتنوسىنا, مادەنيەتىنە, دىنىنە نەمەسە ءدىني سەنىمىنە قاراماستان, بارلىق حالىقتاردىڭ قاۋىپسىزدىگىن, قۇندىلىقتارىن جانە بولاشاققا دەگەن سەنىمىن قامتاماسىز ەتۋ ءۇشىن قىزمەتىن جالعاستىرا بەرەتىنىنە سەنىم بىلدىرەمىن. قازاقستان رەسپۋبليكاسى مىڭجىلدىقتى دامىتۋ ماقساتىن ءجۇزەگە اسىرۋدا ايتارلىقتاي جەتىستىكتەرگە جەتتى. قازاقستان رەسپۋبليكاسىنىڭ ۇكىمەتىن جانە ونىڭ ءارىپتەستەرىن قازاقستاننىڭ كۇن ءتارتىبىنە بەلگىلەگەن ماقساتىنا «تسرت+» جەتۋ جولىندا كۇش-جىگەرلەرىن اياماۋعا شاقىرامىن. ورتالىق ازيانىڭ باسقا مەملەكەتتەرى سياقتى قازاقستان دا ەسىرتكى تاسىمالى جانە لاڭكەستىك اكتىلەرى سياقتى ترانسشەكارالىق قىلمىس پروبلەمالارىنا كەزدەسىپ وتىر. بۇۇ الداعى ۋاقىتتا دا وسىنداي قاۋىپتەرگە قارسى كۇرەستە قولداۋ تانىتاتىن بولادى. ونىڭ ىشىندە بۇۇ-نىڭ قارجىلىق قولداۋىمەن ەسىرتكىگە جانە قىلمىسقا قارسى قۇرىلعان الماتى قالاسىندا تۇراقتى جۇمىس ىستەيتىن ازيالىق ايماقتىق-اقپاراتتىق ۇيلەستىرۋ ورتالىعىنىڭ جۇمىسىن دا جۇمىلدىراتىن بولادى. ءبىز سونداي-اق ايماقتىڭ مەملەكەتتەرىندە زاڭدىلىق جانە ادام قۇقىنىڭ باسىمدىققا يە بولىپ, وسى ۇدەرىستىڭ تۇراقتى جانە ۇزدىكسىز جۇرگىزىلۋىن قامتاماسىز ەتۋگە تەرەڭ كۇش-جىگەر جۇمسايتىن بولامىز. سۋ جانە ەنەرگەتيكالىق رەسۋرستاردى باسقارۋ, قورشاعان ورتا احۋالىنىڭ ناشارلاۋى ورتالىق ازيادا بۇرىنعىسىنشا ماڭىزدى ماسەلە بولىپ قالۋدا. مىنە, وسى سالاداعى ايماقتىق بايلانىستار وتە ماڭىزدى. بىرىككەن ۇلتتار ۇيىمىنىڭ جۇيەسى بۇۇ-نىڭ ايماقتىق ورتالىقتارىمەن بىرىگە وتىرىپ, ورتالىق ازيادا وسى ماڭىزدى مىندەتتەردى ءوزارا ءتيىمدى نەگىزدە شەشۋ ءۇشىن بىرلەسكەن باستامالارىن ودان ءارى جالعاستىراتىن بولادى. قازاقستان حالقىن تاۋەلسىزدىكتىڭ 20 جىلدىعىمەن تاعى دا قۇتتىقتايمىن. گۇلدەنگەن, دەموكراتيالىق جانە تابىستى قازاقستان قۇرمەتى ءۇشىن مەنىڭ شىن جۇرەكتەن شىققان قۇتتىقتاۋىمدى قابىلداۋلارىڭىزدى وتىنەمىن. ءبىزدىڭ تىعىز بايلانىستاعى ىنتىماقتاستىعىمىزدىڭ الداعى ۋاقىتتا دا جالعاسىن تاباتىنىنا سەنەمىن.د.مەدۆەدەۆ,
رەسەي فەدەراتسياسىنىڭ پرەزيدەنتى.
قازاقستان رەسپۋبليكاسىنىڭ پرەزيدەنتى جوعارى مارتەبەلى نۇرسۇلتان نازارباەۆ مىرزاعا قۇرمەتتى نۇرسۇلتان ءابىش ۇلى, قازاقستان رەسپۋبليكاسىنىڭ ۇلتتىق مەرەكەسى – تاۋەلسىزدىك كۇنىنىڭ 20 جىلدىعىنا بايلانىستى شىنايى قۇتتىقتاۋىمدى قابىل الىڭىز. وتكەن جىلدار ىشىندە قازاقستان ەكونوميكالىق دامۋدا, حالىقتىڭ ءال-اۋقاتىن قامتاماسىز ەتۋدە اسا زور جەتىستىكتەرگە قول جەتكىزدى. تۇراقتىلىق جانە قوعامداعى ءوزارا تۇسىنىستىك, زور جاۋاپكەرشىلىكپەن جۇزەگە اسىرىلعان سىرتقى ساياساتتاعى باعىت رەسپۋبليكانىڭ حالىقارالىق بەدەلىنىڭ ءوسۋى ءۇشىن سەنىمدى نەگىز بولدى. قازاقستانداعى جۇيەلى جۇرگىزىلگەن قايتا قۇرۋلار جانە ءبىزدىڭ مەملەكەتتەرىمىزدىڭ حالىقتارىنىڭ دوستىق پەن تاتۋ كورشىلىككە نەگىزدەلگەن ءداستۇرى رەسەي-قازاقستان اراسىنداعى ستراتەگيالىق ارىپتەستىكتىڭ جوعارى قارقىنمەن دامۋىنا وڭ اسەرىن تيگىزۋدە. ەكونوميكانىڭ شەشۋشى سالالارىنداعى كووپەراتسيادان كەڭ كولەمدەگى مادەني-گۋمانيتارلىق بايلانىسقا دەيىنگى ءارتۇرلى سالالارداعى بىرلەسكەن اۋقىمدى جوبالار ويداعىداي جۇزەگە اسىرىلۋدا. كەلىسىم-قۇقىقتىق بازانى جەتىلدىرۋ جونىندەگى جۇمىستار ەلەۋلى يگى جەمىسىن بەرۋدە. عىلىمي-تەحنيكالىق بايلانىس جانە يننوۆاتسيا سالالارىندا, اتوم ەنەرگەتيكاسى جانە باسقا دا كوپتەگەن باعىتتاردا ءىرى مۇمكىندىكتەر اشىلۋدا. قولداعى مۇمكىندىكتەردى بارىنشا ءىس جۇزىنە اسىرۋ ماقساتىنداعى قۋاتتى قارقىن تمد, ەۋرازەق, ۇقشۇ, شىۇ – ايماقتىق بىرلەستىكتەرىنىڭ شەڭبەرىندە ىنتىماقتاستىقتى تۇراقتى تەرەڭدەتۋگە يگى ىقپالىن تيگىزۋدە. قازاقستاننىڭ ينتەگراتسيالىق ۇدەرىستەردى دامىتۋداعى بەلسەندى ءرولىن ايرىقشا اتاپ وتكىم كەلەدى. ءتيىمدى جۇمىس ىستەپ جاتقان كەدەن وداعى, ءبىرتۇتاس ەكونوميكالىق كەڭىستىك قۇرۋ جانە ەۋرازيالىق ەكونوميكالىق وداق قۇرۋ جونىندەگى ناقتى تاجىريبەلىك قادامدار ءوزارا ءتيىمدى ارىپتەستىكتى دامىتۋعا جان-جاقتى قولايلى جاعداي جاسايدى. ءبىز الدا تۇرعان جوسپارلاردى ءىس جۇزىنە اسىرۋ ماقساتىندا الداعى ۋاقىتتا دا ءوزارا ەڭ تەرەڭ ىنتىماقتاستىق پەن بايلانىسقا دايىنبىز. قازاقستان-رەسەي اراسىنداعى وداقتاستىق جونىندەگى سالماقتى الەۋەتتى پايدالانۋ الداعى ۋاقىتتا دا ءبىزدىڭ حالىقتارىمىزدىڭ ءومىر ساپاسىن ارتتىرۋعا جاعداي جاسايتىندىعىنا, بۇكىل ەۋروازيالىق ايماقتا تۇراقتىلىق پەن قاۋىپسىزدىكتى نىعايتۋ مىندەتتەرىنە قىزمەت ەتەتىندىگىنە سەنىمدىمىن. باراك وباما, اقش پرەزيدەنتى. قۇرمەتتى پرەزيدەنت مىرزا! قازاقستاننىڭ تاۋەلسىزدىكتىڭ جانە ۇلت ەگەمەندىگىنىڭ 20 جىلدىعىن تويلاۋىنا وراي امەريكا قۇراما شتاتتارى حالقى اتىنان ەڭ جىلى قۇتتىقتاۋىمدى جەتكىزەمىن. ءبىز 1991 جىلدىڭ 16 جەلتوقسانىنان باستاپ بىرلەسىپ كوپتەگەن ىستەر اتقاردىق جانە بۇگىندە قازاقستان ءبىزدىڭ ەلدەرىمىزدىڭ وڭىرلىك تۇراقتىلىقتى العا باستىرۋ, وركەندەۋ مەن ەنەرگەتيكالىق ارىپتەستىگى جولىندا بىرلەسە جۇمىس ىستەۋدى جالعاستىرىپ كەلەدى. ءسىزدىڭ باسشىلىعىڭىزبەن قازاقستان اۋعانستانداعى اسكەري وپەراتسيالارعا قولداۋ كورسەتۋ ءۇشىن سولتۇستىك تاراتۋ جەلىسىندە ماڭىزدى ءرول اتقارادى. مەن ءسىزدىڭ ۇكىمەتتىڭ ءبىزدىڭ سولداتتارىمىزدى جاقسى قورعاۋدى جانە اۋعانستانداعى ۇزاق مەرزىمدى قاۋىپسىزدىك پەرسپەكتيۆالارىن قامتاماسىز ەتۋگە كومەكتەسەتىن دوڭعالاقتى بروندالعان ماشينەلەر مەن ەكى جاقتى ترانزيت تۋرالى كەلىسىمدى قۋاتتاعانى ءۇشىن سىزگە العىس بىلدىرگىم كەلەدى. ءسىزدىڭ كولىك ينفراقۇرىلىمىن جاقسارتۋ مەن جاس اۋعاندىقتاردى كاسىبي وقىتۋعا قولداۋ جاساۋىڭىز اۋعانستاننىڭ دامۋى ءۇشىن نىعايتۋشى كۇش بولماق. مەن بۇكىل ءوڭىردىڭ ەكونوميكالىق ينتەگراتسياسىن جانە وركەندەۋىن العا باستىرۋ جونىنەن بىرلەسكەن قادامدار جاساۋدى جالعاستىرامىز دەپ سەنەمىن. وسىدان 20 جىل بۇرىن قازاقستاندا بارلىق يادرولىق قارۋدان باس تارتىپ, بۇكىل حالىقارالىق قوعامداستىق ءۇشىن ۇلگى كورسەتە وتىرىپ, ءسىز تاريحي جانە كورەگەن شەشىم قابىلدادىڭىز. بۇل باعىتتىڭ ءوڭىردى جانە بۇكىل الەمدى نەعۇرلىم قاۋىپسىز ورىنعا اينالدىرۋدا كورسەتكەن ىقپالىن باعالاماۋ ءمۇمكىن ەمەس. تاراتپاۋ سالاسىنداعى ءبىزدىڭ كەڭ كولەمدى قىزمەتتەستىگىمىز ءالى كۇنگە دەيىن جالعاسۋدا, اسىرەسە, ءبىزدىڭ يادرولىق قاۋىپسىزدىك سالاسىنداعى ىنتىماقتاستىعىمىز وتە تاماشا بولدى. مەن ءسىزدىڭ وسى ماسەلەلەردەگى ۇزاق جىلعى تاجىريبەڭىزدى جوعارى باعالايمىن جانە ناۋرىز ايىندا سەۋلدە سىزبەن كەزدەسكەن كەزدە يادرولىق قاۋىپسىزدىك جونىندەگى ءبىزدىڭ ماقساتتارىمىزدى قامتاماسىز ەتۋدى قالاي جالعاستىرۋ كەرەكتىگى جونىندە ءسىزدىڭ ويلارىڭىزدى ەستيمىن دەپ ۇمىتتەنەمىن. قازاقستان قاڭتارداعى سايلاۋ ارقىلى كوپ پارتيالى پارلامەنتكە كوشۋگە دايىندالۋدا. كانديداتتار ءۇشىن بىرەگەي ويىن ەرەجەسىن جانە سايلاۋ ۇدەرىسىنىڭ ادىلدىگىن قامتاماسىز ەتۋدە ءسىزدىڭ باسشىلىعىڭىز ومىرلىك ماڭىزدى بولىپ تابىلادى. ءوز اكىمشىلىگىمنىڭ العاشقى جۇمىسىنان باستاپ مەن امبەباپ قۇندىلىقتار مەن ىرگەلى بوستاندىقتاردى مويىندايتىن ەلدەر نەعۇرلىم تۇراقتى بولىپ, وركەندەي تۇسەدى دەگەن ءىلىمدى باسشىلىققا الا وتىرىپ, دەموكراتيانى العا باستىرۋدى قولدايتىنىمدى ايعاقتادىم. الداعى پارلامەنتتىك سايلاۋ دەموكراتيالىق دامۋدىڭ ساباقتاستىعىن نىعايتۋعا مۇمكىندىك بەرىپ, ونىڭ ءوزى قازاقستان ءۇشىن الداعى 20 جىل مەن ودان كەيىنگى كەزەڭدە قىزمەت ەتەتىن بولادى. ءبىز قازاقستانمەن جانە ورتالىق ازيامەن قارىم-قاتىناستارداعى بەتبۇرىستى ساتتە تۇرمىز. وسىناۋ سىندارلى ءسات ءبىزدىڭ ەكى جاقتى بايلانىستارىمىزدى ءوزارا سىيلاستىق پەن ورتاق مۇددەلەر نەگىزىندە تەرەڭدەتە ءتۇسۋ تۇرعىسىندا جاڭا پەرسپەكتيۆالار تۋىنداتادى. سىزدەر قازاقستان تاريحىنىڭ تاعدىرشەشتى ءساتىن مەرەكەلەۋدەسىزدەر, سوعان وراي سىزگە جانە قازاقستان حالقىنا دەگەن مەنىڭ ەڭ ىزگى تىلەكتەرىمدى قابىل الىڭىزدار. مايكل حيگگينس, يرلانديا پرەزيدەنتى. قازاقستان رەسپۋبليكاسىنىڭ پرەزيدەنتى, جوعارى مارتەبەلى نۇرسۇلتان نازارباەۆ مىرزاعا يرلانديا حالقى جانە مەن ءسىزدىڭ ەلىڭىزدىڭ ۇلتتىق مەرەكەسىنە بايلانىستى ءسىزدىڭ جوعارى مارتەبەڭىزگە ءوزىمىزدىڭ قۇتتىقتاۋىمىزدى جولدايمىز. وسى مۇمكىندىكتى پايدالانا وتىرىپ, قازاقستان رەسپۋبليكاسىنىڭ حالقىنا شىنايى باقىت جانە ءورىستى وركەندەۋ تىلەيمىن. نيكوليا ساركوزي, فرانتسۋز رەسپۋبليكاسىنىڭ پرەزيدەنتى. پرەزيدەنت مىرزا, قىمباتتى نۇرسۇلتان! قازاقستان رەسپۋبليكاسى ءتاۋەلسىزدىگىنىڭ 20 جىلدىق مەرەيتويىنا بايلانىستى مەنىڭ ەڭ جىلى لەبىزدەرىمدى قابىل الىڭىز. قازاقستاننىڭ ءسىزدىڭ باسشىلىعىڭىزبەن ب ۇلىڭعىر بولاشاقتى بۇرىنعى كەڭەستىك رەسپۋبليكادان حالىقارالىق ابىرويى كۇن ساناپ ءوسىپ كەلە جاتقان, ەتنوسارالىق جانە كونفەسسياارالىق كەلىسىم ۇستەمدىك قۇرعان, بىرىڭعاي سەرپىندى دامۋ جولىنداعى ەلگە اينالۋ بارىسىندا ءجۇرىپ وتكەن جولى تاڭ قالدىرادى. 2009 جىلدىڭ قازان ايىندا ماعان رەسمي ساپارمەن كەلىپ, استانانى تاماشالاۋ باقىتى بۇيىردى. جاڭا ەلوردالارىڭىز وسى كورنەكتى جەتىستىكتەرىڭىزدىڭ فۋتۋريستىك سيمۆولى بولىپ تابىلادى. ءبىزدىڭ تۇراقتى كەزدەسۋلەرىمىز 2008 جىلدىڭ 11 ماۋسىمىندا پاريج قالاسىندا سىزبەن قول قويعان ستراتەگيالىق ارىپتەستىك تۋرالى كەلىسىمگە وتە ناقتى مازمۇن ەنگىزۋگە مۇمكىندىك بەردى. مەن 2012 جىل ونسىز دا قارقىندى, ۇدەمەلى ەكىجاقتى ارىپتەستىككە جاڭا كوكجيەكتەر اشادى دەپ سەنەمىن. پرەزيدەنت مىرزا, قىمباتتى نۇرسۇلتان, سىزگە دەگەن شىنايى قۇرمەتىمدى جەتكىزەمىن. كريستيان ۆۋلف, گەرمانيا فەدەراتيۆتىك رەسپۋبليكاسىنىڭ پرەزيدەنتى. پرەزيدەنتى, جوعارى مارتەبەلى نۇرسۇلتان نازارباەۆ مىرزاعا پرەزيدەنت مىرزا, ءوز اتىمنان جانە بارلىق وتانداستارىمنىڭ اتىنان ءسىزدى جانە ءسىزدىڭ حالقىڭىزدى قازاقستان رەسپۋبليكاسىنىڭ تاۋەلسىزدىگى كۇنىمەن شىن جۇرەكتەن قۇتتىقتايمىن. قازاقستان رەسپۋبليكاسى بيىلعى جىلى ءوز تاۋەلسىزدىگىنىڭ 20 جىلدىعىن اتاپ وتۋدە. وسى كەزەڭدە ءسىزدىڭ ەلىڭىز اسا زور دامۋ جولىنان ءوتتى. شىنايى ماقتان تۇتاتىن قول جەتكىزگەن جەتىستىكتەر كوپ جانە بۇكىل حالىق مۇددەسى ءۇشىن ءسىزدىڭ ەلىڭىزدى ودان ءارى جاڭعىرتۋ جولىندا الدا دا كوپتەگەن مىندەتتەر تۇر. 1991 جىلدان باستاپ ءبىزدىڭ ەلدەرىمىزدىڭ اراسىندا بارلىق دارەجەدەگى دوستىق بايلانىستار قالىپتاستى. گەرمانيا العاشقى كۇننەن باستاپ تاۋەلسىز قازاقستانعا بەلسەندى قولداۋ جانە جاردەم كورسەتتى. جاڭا بايلانىستاردى كەڭەيتۋ ءۇشىن ساياسي, ەكونوميكالىق جانە مادەني سالالاردا بۇرىنعىسىنشا زور الەۋەتتەر بار. قۇقىق جانە قۇندىلىقتار تۋرالى ساياسي ۇنقاتىسۋلاردى تەرەڭدەتە وتىرىپ, گەرمانيا الداعى ۋاقىتتا دا ءسىزدىڭ مەملەكەتىڭىزدىڭ سەنىمدى سەرىكتەسى بولادى. سىزگە بارلىق ساتتىلىكتەردى جانە قازاقستان حالقىنا بەيبىتشىلىك, ازاتتىق جانە گۇلدەنۋ جاعدايىنداعى باقىتتى بولاشاق تىلەيمىن. ابداللا بەن ابدەلازيز ال ساۋد, ساۋد ارابياسى كورولدىگىنىڭ كورولى. سسالاۋماعالەيكۋم ۋا راحماتۋللا ۋا باراكاتۋ قازاقستان رەسپۋبليكاسىنىڭ پرەزيدەنتى, باۋىرىم, جوعارى مارتەبەلى نۇرسۇلتان نازارباەۆقا قازاقستان رەسپۋبليكاسى ءتاۋەلسىزدىگىنە 20 جىل تولۋ مەرەكەسىمەن بارشا حالقىمنىڭ, كورولدىك ۇكىمەتى جانە ءوز اتىمنان شىن جۇرەكتەن قۇتتىقتايمىن. سىزگە وسى ىستىق قۇتتىقتاۋلارىمدى جولداي وتىرىپ, زور دەنساۋلىق پەن باقىت تىلەيمىن. سونىمەن بىرگە قازاقستان حالقىنا بولاشاقتا دا دامىپ, گۇلدەنە بەرۋىنە نيەتتەستىگىمدى بىلدىرەمىن. * * * اللا جار بولسىن! اسسالاۋماعالەيكۋم ۋا راحماتۋللا ۋا باراكاتۋ قازاقستان رەسپۋبليكاسىنىڭ پرەزيدەنتى, جوعارى مارتەبەلى نۇرسۇلتان نازارباەۆقا ءسىزدى قازاقستان رەسپۋبليكاسى تاۋەلسىزدىگىنىڭ 20 جىلدىق تورقالى تويىمەن قۇتتىقتايمىن. سىزگە زور دەنساۋلىق جانە باقىت تىلەيمىن. ءسىزدىڭ باۋىرىڭىز, نايف بەن ابدەلازيز ال ساۋد, ساۋد ارابياسى كورولدىگىنىڭ مۇراگەر حانزاداسى, پرەمەر-ءمينيستردىڭ ورىنباسارى, ىشكى ىستەر ءمينيسترى. ۆيكتور يانۋكوۆيچ, ۋكراينا رەسپۋبليكاسىنىڭ پرەزيدەنتى. اسا قادىرلى نۇرسۇلتان ءابىش ۇلى! قازاقستان رەسپۋبليكاسى تاۋەلسىزدىگىنىڭ 20 جىلدىق مەرەكەسىمەن شىن جۇرەگىمنەن شىققان قۇتتىقتاۋىمدى قابىل الىڭىز. قازاقستاننىڭ يندۋستريالىق-يننوۆاتسيالىق باعدارلامالار اياسىنداعى رەفورمالار مەن ينۆەستيتسيالىق پەرسپەكتيۆالى جوبالاردىڭ جوعارى دەڭگەيدە كورىنىس تاۋىپ, حالىقارالىق ارەنادا ۇلكەن بەدەلگە كوتەرىلۋى ءسىزدىڭ تىكەلەي جەتەكشىلىگىڭىز بەن دانا ساياساتىڭىزدىڭ ارقاسىندا بولىپ وتىر. ۋكراينا مەن قازاقستاننىڭ الداعى ۋاقىتتاردا دا ءبىزدىڭ مەملەكەتتەرىمىزدىڭ مۇددەلەرى جولىندا ءبىزدىڭ حالىقتارىمىزدىڭ ءداستۇرلى دوستىعىنا بەرىك ءوزارا تۇسىنىستىك پەن ارىپتەستىككە نەگىزدەلگەن ءوزارا ءتيىمدى, جەمىستى ىنتىماقتاستىعى بۇدان كەيىن دە نىعايا بەرەرىنە سەنىمدىمىن. ءوزارا قىزىعۋشىلىق تانىتىپ وتىرعان بىرلەسكەن جوبالار, ونىڭ ىشىندە اۆياعارىشتىق, ەنەرگەتيكالىق جانە اگرارلىق كەشەن سالاسىنداعى جوبالار قازاقستان مەن ۋكراينانى ءتيىمدى مودەرنيزاتسيالاۋعا يگى ىقپال جاساعانى ءسوزسىز. سونىمەن بىرگە بۇل ءبىزدىڭ ەلدەردىڭ حالىقارالىق ارەناداعى بەدەلىن كوتەرىپ, حالىقتارىمىزدىڭ ساپالى ءومىر جاعدايىن ارتتىرادى. سىزگە شىنايى جۇرەكتەن جاۋاپتى مەملەكەتتىك قىزمەتىڭىزدە تابىس جانە زور دەنساۋلىق, سول سياقتى باۋىرلاس قازاقستان حالقىنا گۇلدەنۋ, ساتتىلىك تىلەيمىن. كيەلى تاق پاپاسى بەنەديكت ءحVى جوعارى مارتەبەلى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ مىرزاعا جوعارى مارتەبەلى, قازاقستان رەسپۋبليكاسىنىڭ ۇلتتىق مەرەكەسى سىزگە جانە قازاقستان حالقىنا بەيبىتشىلىك پەن وركەندەۋ يگى تىلەكتەرىمدى جولداۋىما قۋانىشتى مۇمكىندىك تۋعىزىپ وتىر. ەلىڭىزدىڭ تاۋەلسىزدىگىنىڭ 20 جىلدىعىنا وراي, جاراتۋشى ەلىڭىزدىڭ تۇرعىندارىنىڭ نەعۇرلىم ۇيلەسىمدى ءارى ادىلەتتى قوعام قۇرۋىنا قۋات بەرىپ, ولاردىڭ وتباسىلىق, الەۋمەتتىك جانە ۇلتتىق ومىرلەرى نۇرلى بولىپ, مادەني جانە رۋحاني قۇندىلىقتاردى قۇرمەتتەۋدى ءناسىپ ەتسىن دەپ تىلەيمىن. جوعارى مارتەبەلى, سىزگە جانە ەلدىڭ بارلىق ازاماتتارىنا جاراتقاننان شاپاعات تىلەيمىن. الەكساندر لۋكاشەنكو, بەلارۋس رەسپۋبليكاسىنىڭ پرەزيدەنتى. قۇرمەتتى نۇرسۇلتان ءابىش ۇلى! بەلارۋس حالقىنىڭ جانە جەكە ءوز اتىمنان ءسىزدى قازاقستان رەسپۋبليكاسىنىڭ جاڭا تاريحىنداعى ايتۋلى كۇنمەن – تاۋەلسىزدىكتىڭ 20 جىلدىعىمەن شىن جۇرەكتەن قۇتتىقتايمىن. قازاقستان حالقىنىڭ ەڭبەكسۇيگىشتىگى مەن ءپاتريوتيزمىنىڭ ارقاسىندا ءسىزدىڭ ەلىڭىز وسى جىلدار ىشىندە وڭىرلىك جانە جاھاندىق قاۋىپسىزدىكتى قامتاماسىز ەتۋدە, پوستكەڭەستىك كەڭىستىكتە ينتەگراتسيالىق ۇدەرىستەرگە ماڭىزدى ۇلەس قوسۋدا, قازاقستانعا حالىقارالىق قاتىناستاردىڭ بەدەلدى قاتىسۋشىسى ءيميدجىنىڭ بەكۋىندە, الەۋمەتتىك-ەكونوميكالىق دامۋدا جانە مەملەكەتتى نىعايتۋدا ايتارلىقتاي تابىستارعا قول جەتكىزدى. وسىنداي ۇلكەن جەتىستىكتەرگە قول جەتكىزۋ, قازاقستاننىڭ قازىرگى زامان پروگرەسى جولىندا تۇڭعىش پرەزيدەنتتىڭ ۇلكەن جەكە ۇلەسىنىڭ ارقاسىندا مۇمكىن بولعاندىعى ءشۇباسىز. ءسىزدى «حالىق قاھارمانى» مارتەبەلى مەملەكەتتىك ناگراداسىنا ۇسىنۋدىڭ ءوزى ۇلكەن ەڭبەگىڭىزگە دەگەن جوعارى باعا دەپ تۇسىنەمىن. ەمومالي راحمون, تاجىكستان رەسپۋبليكاسىنىڭ پرەزيدەنتى. قۇرمەتتى نۇرسۇلتان ءابىش ۇلى! ءسىزدى جانە دوستاس قازاقستان حالقىن تاۋەلسىزدىكتىڭ جيىرما جىلدىق مەرەيتويىمەن شىن جۇرەكتەن قۇتتىقتايمىن! تاۋەلسىزدىك جىلدارى ىشىندە قازاقستان ءوزىنىڭ الەۋمەتتىك-ەكونوميكالىق جانە ساياسي دامۋىندا ءسىزدىڭ كوشباسشىلىعىڭىزبەن ۇلكەن تابىستارعا قول جەتكىزدى, حالىقارالىق ارەنادا ءوز ابىروي-بەدەلىن بەكىتىپ, بيىكتەتە ءتۇستى. ءداستۇرلى دوستىق راۋىشتەگى جانە ءوزارا ءتيىمدى تاجىك-قازاق قارىم-قاتىناستارى كەلەشەكتە دە ەكى ەل مەن حالىق يگىلىگىنە قىزمەت ەتە بەرەتىنىنە سەنىمدىمىن. سىزگە, قۇرمەتتى نۇرسۇلتان ءابىش ۇلى, باقىت جانە مىقتى دەنساۋلىق, ال دوستاس قازاقستان حالقىنا – جاقسىلىقتار مەن وركەندەۋ تىلەيمىن! يۆو يوسيپوۆيچ, حورۆاتيا رەسپۋبليكاسىنىڭ پرەزيدەنتى. قازاقستان رەسپۋبليكاسىنىڭ پرەزيدەنتى, جوعارى مارتەبەلى نۇرسۇلتان نازارباەۆقا جوعارى مارتەبەلى نۇرسۇلتان ءابىش ۇلى! قازاقستان رەسپۋبليكاسىنىڭ تاۋەلسىزدىك مەرەكەسىنە بايلانىستى ءسىزدى جانە حالقىڭىزدى حورۆاتيا رەسپۋبليكاسى ازاماتتارى جانە ءوز اتىمنان شىن جۇرەكتەن قۇتتىقتاعىم كەلەدى. ەلىڭىزدىڭ قارقىندى ۇدەرىسىنە بايلانىستى ازاماتتارىڭىزعا ەڭ جاقسى تىلەكتەرىمىزدى جەتكىزەمىن. جوعارى مارتەبەلى, سىزگە دەگەن جەكە قۇرمەتىمدى قابىل الىڭىز. نادجيب ميكاتي, ليۆان رەسپۋبليكاسىنىڭ پرەمەر-ءمينيسترى. جوعارى مارتەبەلى قازاقستان رەسپۋبليكاسى پرەزيدەنتى, قۇرمەتتى نۇرسۇلتان نازارباەۆ مىرزا! مەن دوستاس قازاقستان رەسپۋبليكاسىنىڭ 20 جىلدىق تاۋەلسىزدىك مەرەكەسىنە جانە ەلىڭىزدى 20 جىل باسقارۋ مەرەيتويىنا وراي قۇتتىقتاۋلارىمىز بەن ىزگى لەبىز-تىلەكتەرىمىزدى جەتكىزسەم دەيمىن. مەن ءسىزدىڭ سارابدال باسشىلىعىڭىزدىڭ ءناتيجەسىندە ەلدەگى تۇراقتىلىق پەن دامۋ, وركەندەۋ تەك بەكي تۇسەتىنىنە سەنەمىن. وسى ەكى ەرەكشە وقيعالارعا بايلانىستى ليۆان مەن دوستاس قازاقستان رەسپۋبليكاسىن بايلانىستىراتىن تەرەڭ دوستاستىققا ارقا سۇيەي وتىرىپ, ءبىز ەكى ەل مەن حالىقتارىمىزدىڭ يگىلىگى ءۇشىن سەنىم مەن ارىپتەستىگىمىزدى ارتتىرا تۇسۋگە ۇمتىلاتىنىمىزعا سەندىرگىم كەلەدى. جوعارى مارتەبەلى پرەزيدەنت, مەنىڭ ەڭ ىزگى تىلەكتەرىم مەن جىلى لەبىزىمدى, قۇرمەتىمدى قابىل الىڭىز. ماحمۇد ابباس, پالەستينا مەملەكەتىنىڭ پرەزيدەنتى, پالەستينانى ازات ەتۋ ۇيىمى اتقارۋشى كوميتەتىنىڭ توراعاسى پالەستينا ۇلتتىق اكىمشىلىگىنىڭ باسشىسى. جوعارى مارتەبەلى نۇرسۇلتان نازارباەۆ قازاقستان رەسپۋبليكاسىنىڭ پرەزيدەنتى قازاقستان تاۋەلسىزدىگىنىڭ 20 جىلدىق مەرەيتويىنا وراي ءوزىمنىڭ جانە بارشا پالەستينا حالقىنىڭ اتىنان ىستىق ىقىلاسقا تولى شىنايى قۇتتىقتاۋىمدى جولداۋ مەن ءۇشىن زور قۋانىش. وسى ورايلى ساتتە سىزگە, ۇكىمەتىڭىزگە, دوستاس حالقىڭىزعا جانە مەملەكەتىڭىزگە گۇلدەنۋ مەن وركەندەۋ تىلەيمىن. ءبىزدىڭ ۇزاق جىلدارعا سوزىلعان كۇرەسىمىز بارىسىندا كورسەتكەن اعايىندىق قولداۋىڭىز بەن پالەستينا حالقىمەن تىلەكتەستىگىڭىزدى جوعارى باعالايتىنىمىزدى اتاپ وتكىم كەلەدى. مەملەكەتتەرىمىز اراسىنداعى اعايىندىق قارىم-قاتىناستار مەن ءوزارا ىلتيپاتقا نەگىزدەلگەن بايلانىستاردى حالىقتارىمىزدىڭ يگىلىگى ءۇشىن ودان ءارى دامىتۋعا مۇددەلىگىمىزدى قۋاتتايمىن. سىزگە, جوعارى مارتەبەلى, زور دەنساۋلىق پەن باقىت, ال دوستاس قازاقستان حالقىنا ورلەۋ مەن قۇت-بەرەكە تىلەيمىن. راماللا, 2011 ج. 13 جەلتوقسان. جوزە مانۋەل بارروزۋ, ەۋروپالىق كوميسسيانىڭ توراعاسى. قازاقستان رەسپۋبليكاسىنىڭ پرەزيدەنتى, جوعارى مارتەبەلى نۇرسۇلتان نازارباەۆ مىرزاعا قۇرمەتتى پرەزيدەنت مىرزا, مەن ءۇشىن ءسىزدى جانە قازاقستان رەسپۋبليكاسىنىڭ بارلىق ازاماتتارىن 1991 جىلى 16 جەلتوقساندا جاريالانعان تاۋەلسىزدىكتىڭ 20 جىلدىعىمەن قۇتتىقتاۋ ۇلكەن قۇرمەت جانە زور قۋانىش. قازاقستان وسى تاريحي وقيعا بولعان ساتتەن ساياسي, ەكونوميكالىق جانە مادەني سالالاردىڭ حالىقارالىق ساحناسىندا ءوزىن قالىپتاستىرۋ, دامىتۋ جانە نىعايتۋ جولىندا تەڭدەسسىز كۇش-جىگەر تانىتتى. مەن ەۋروپالىق وداقتىڭ ەكىجاقتى ىنتىماقتاستىق جانە ءبىزدىڭ ءوزارا بايلانىستارىمىز ارقىلى وسى پروگرەسسيۆتى باعىتتىڭ ورنىعۋىنا وزىندىك ۇلەسىمىزدى قوسقانىمىزعا قۋانىشتىمىن. وسى ايتۋلى وقيعاعا بايلانىستى مەنىڭ ەۋروپالىق وداقتىڭ قازاقستان رەسپۋبليكاسىنىڭ جانە ونىڭ ازاماتتارىنىڭ ارقاشان دوسى جانە سەرىكتەسى بولاتىندىعىن تاعى دا اتاپ وتكىم كەلەدى. ءبىزدىڭ قولدانىستاعى ارىپتەستىك جانە ىنتىماقتاستىق تۋرالى كەلىسىمدى ءىس جۇزىنە اسىرۋداعى جانە ارىپتەستىكتى دامىتۋ ءجونىندەگى جاڭا كەلىسىم بويىنشا كەلىسسوزدەر جۇرگىزۋدى ىسكە اسىرۋ جولىنداعى بايلانىسىمىز ءوزارا قارىم-قاتىناسىمىزدى نىعايتۋعا جانە تەرەڭدەتۋگە مۇمكىندىك بەرەدى. سونىمەن بىرگە, قازاقستاننىڭ ۇلەسى وتە ماڭىزدى بولىپ وتىرعان ورتالىق ازياداعى ءبىزدىڭ ستراتەگيامىزدىڭ رۋحى بويىنشا بايلانىسىمىزدى ودان ءارى نىعايتا بەرمەك. قازاقستان رەسپۋبليكاسىنداعى, سونىمەن بىرگە ەۋروپالىق وداقتاعى نەگىزگى رەفورمالاردى دامىتۋ, ەۋروپالىق وداق جانە ەو-عا مۇشە مەملەكەتتەر ينستيتۋتتارىن قولداۋ جونىندەگى اتقارىلىپ جاتقان باستامالارعا ءبىز ۇنەمى قولداۋ كورسەتەمىز. بۇل رەفورمالىق ۇردىستەر سىزدەردىڭ ەلدەرىڭىزگە دەموكراتيالىق ەكونوميكالىق جانە الەۋمەتتىك دامۋ جانە حالىقتىڭ ءال-اۋقاتىن جاقسارتۋ جولىندا العا قويعان ماقساتتارىڭىزعا جەتۋگە يگى ىقپالىن تيگىزەتىن بولادى. سىزگە جانە قازاقستان رەسپۋبليكاسىنىڭ بارلىق ازاماتتارىنا باقىت جانە ساتتىلىك تىلەگەن مەنىڭ شىن جۇرەكتى سەزىمىمدى قابىل الىڭىز.