قاراعاندىداعى كەنشىلەر مادەنيەتى سارايىنىڭ الدىندا 1 شىلدە – ۇلتتىق دومبىرا كۇنى قۇرمەتىنە 150-دەن استام ونەرپاز قاتىسقان كونتسەرتتىك باعدارلاما ءوتتى.
وبلىستىق مادەنيەت, مۇراعاتتار جانە قۇجاتتاما باسقارماسى ۇيىمداستىرعان مادەني شارادا تاتتىمبەت اتىنداعى اكادەميالىق حالىق اسپاپتارى وركەسترى مەن «ارقا سازى» فولكلورلىق ءانسامبلى جانە قالاداعى ونەر مەكتەپتەرىندە وقيتىن جاس دومبىراشىلار ونەر كورسەتتى. وركەسترگە قازاقستاننىڭ ەڭبەك سىڭىرگەن قايراتكەرى دۇيسەن ۇكىباي ديريجەرلىك ەتتى.
وركەستردىڭ ورىنداۋىنداعى تاتتىمبەتتىڭ «سارىجايلاۋى», قۇرمانعازىنىڭ «سارىارقاسى» جانە باسقا دا ايگىلى كۇيلەر جيىلعان قاۋىمنىڭ جان الەمىن شۋاققا, كەنشىلەر قالاسىنىڭ اسپانىن شاتتىققا بولەدى.
«دومبىرا كۇنى, اسىرەسە مۋزىكانتتار ءۇشىن ماڭىزى زور مەرەكە بولماق. نەگە دەسەڭىز, دومبىرا – حالىق شىعارماشىلىعىنىڭ قاينار بۇلاعى, ول باعزى زامانداردان قازاق حالقىمەن بىرگە جاساسىپ كەلە جاتقان قاسيەتتى اسپاپ. سوندىقتان, ول ءوزىنىڭ مەنشىكتى مەرەكەسىنىڭ بولۋىنا ابدەن ەڭبەگى سىڭگەن اسىل مۇرا. ودان بەرىدە, دومبىرا مۋزىكا تاريحىنىڭ تەرەڭىنەن تامىر تارتقان ۇلتتىق سيمۆول», دەيدى ديريجەر دۇيسەن ۇكىباي.
بىرنەشە ونەر ۇجىمىنان, جاسى بار, جاسامىسى بار ونداعان دومبىراشىدان اياقاستى قۇرالعان وركەستردىڭ ۇسىنۋىنداعى ۇلتتىق مۋزىكا ونەرىندەگى نەبىر جاۋھار دۇنيەلەردىڭ ورىندالۋ ساپاسىنا سىن ايتقان ادام بالاسى بولمادى. قايتا بۇل كەشتىڭ كۋاسى بولعان قالا تۇرعىندارى مەن قوناقتارىنىڭ ءۇيدى-ۇيىنە قاسيەتتى ونەردىڭ قۇدىرەتىمەن رۋحتانىپ, قاناتتانىپ قايتقانى ءسوزسىز ەدى.
قايرات ءابىلدا,
«ەگەمەن قازاقستان»
قاراعاندى