بوبروۆكا تۇرعىندارىنىڭ ءبىرازى ءالى دە بولسا قوناق ۇيلەردە, تۋعان-تۋىستارىنىڭ ۇيىندە تۇرىپ جاتىر. سەبەبى كەيبىرىنىڭ ۇيلەرى تۇبەگەيلى جوندەۋدى تالاپ ەتەدى. قازىرگى ۋاقىتتا 134 ءۇي قايتادان قالىپقا كەلتىرىلۋدە.
بۇل ۇيلەر بيۋدجەتتەن تىس قاراجاتقا, ياعني قوعامدىق قور مەن دەمەۋشىلەر ارقىلى جينالعان قارجى بويىنشا جوندەلۋ ۇستىندە ەكەن. قازىرگى ۋاقىتتا 134 ءۇيدىڭ 117-ءسىنىڭ قۇرىلىس جوندەۋلەرى اياقتالىپ قالدى.
قالا اكىمى ەرماك ءسالىموۆتىڭ ايتۋىنشا, سەمەيدە تابيعي اپاتتاعى توتەنشە جاعداي بويىنشا 9 جەر ءۇي مۇلدە جارامسىز بوپ سۋ استىنا كەتىپتى. ميرنىي جانە پريستان اۋماعىندا 205 ءۇي زارداپ تارتقان. ولاردىڭ جوندەۋ جۇمىستارىنا رەسپۋبليكالىق بيۋدجەتتەن 343 ملن 665 مىڭ تەڭگە بولىنگەن. تاعى دا 58 ملن تەڭگە ۇيلەرى جارامسىز بولىپ, ەزىلىپ كەتكەندەرگە جاڭا پاتەر, ءۇي ساتىپ الۋ ءۇشىن قاراستىرىلعان. پريستان مەن ميرنىي كەنتتەرىندە مەردىگەر كومپانيالارمەن 127 كەلىسىمشارت جاسالىپتى. زارداپ تارتقاندار وزدەرى مەردىگەر كومپانيا تاڭداپ, قالانىڭ ىشىندە وزدەرى تاڭداعان جەردە پاتەر نە ءۇي ساتىپ الا الادى.
-قازىرگى ۋاقىتتا زارداپ تارتقان حالىققا دۇنيە-م ۇلىك پەن تۇرمىستىق تەحنيكا ساتىپ الۋ ءۇشىن مۇمكىندىگىنشە جاردەماقى ءبولۋ ماسەلەسى دە قاراستىرىلۋدا,-دەدى قالالىق ءماسليحات حاتشىسى بەيسەنبەك اقجالوۆ,-شىعىنداردى ەسەپتەيتىن كوميسسيا بوبروۆكاداعى بارلىق پروبلەمالاردى نازارعا الىپ وتىر. قاراجات ادامداردىڭ قولىنا بەرىلمەيتىندىگى, تەك ۇكىمەت قاۋلىسى ارقىلى عانا ءبولىنىپ, تەك تولەماقى تۇرىندە بولاتىندىعى ناقتى بولدى. ءماسليحات دەپۋتاتتارى جانە دەمەۋشىلەر, جالپى بارلىق حالىق بىرىگىپ, سۋدان زارداپ تارتقاندارعا ءالى دە بولسا كومەكتەسۋدى جالعاستىرامىز.
راۋشان نۇعمانبەكوۆا,
سەمەي