جاھان جاڭالىقتارى. يراندا ستاديونعا قىزداردىڭ كىرۋىنە رۇقسات ەتىلدى

الەم چەمپيوناتىنىڭ توپتىق كەزەڭىندەگى يران-يسپانيا ماتچى الدىندا تەگەرانداعى «ازادي» ستاديونىنا ارنايى ەكران قويىلىپ, جانكۇيەر قاۋىمنىڭ ءوز ەلىن قولداۋىنا مۇمكىندىك بەرىلدى. ستاديونعا 10 مىڭ ادام جينالىپ, فۋتبول تاماشالاعان. نەگىزى مۇنداي شەشىم ماروككوعا قارسى ويىن الدىندا قابىلدانۋى ءتيىس بولاتىن. الايدا ماتچ باستالۋىنا بىرنەشە ساعات قالعاندا بيلىك اشىق الاڭدارداعى ترانسلياتسياعا تىيىم سالعان-دى. ايتا كەتەيىك, مۇنداي تىيىم وسىعان دەيىن ساۋد ارابياسىندا دا بولعان. بىراق وتكەن جىلدىڭ سوڭىنا تامان ساۋديالىق بيلىك ايەلدەردىڭ ستاديوننان ماتچتاردى تاماشالاۋىنا مۇمكىندىك بەرەتىن زاڭ قابىلدادى.

سوندەرس 15 قىركۇيەكتە جەكپە-جەك وتكىزەدى

ورتا سالماقتا WBO تۇجىرىمى بويىنشا الەم چەمپيونى بريتانيالىق بيللي دجو سوندەرس (26-0, 12 كو) ەكىنشى ورتا سالماق دارەجەسىنە كوتەرىلىپ (76,2 كگ), IBF بەلدىگى بار دجەيمس ديگەيلمەن (24-2-1, 14 كو) جەكپە-جەك وتكىزبەك.

بۇل تۋرالى سوندەرستىڭ پروموۋتەرى فرەنك ۋوررەن ايتتى. ونىڭ ايتۋىنشا, ەگەر بوكسشىلار ايقاسقا كەلىسە السا, جەكپە-جەك 15 قىركۇيەكتە لوندونداعى O2 ارەناسىندا وتەدى. «ەگەر ءبارى دۇرىس بولىپ جاتسا, سوندەرسكە ازداپ سالماق قوسۋ كەرەك بولادى. ۋاقىتتىڭ الدىنا تۇسكىمىز كەلمەيدى, بىراق بىزدە بىرنەشە نۇسقا بار. دەگەنمەن كۇزدە ۇلكەن بوكس شوۋىن وتكىزۋگە تىرىسىپ, جانكۇيەرلەرگە كەرەمەت بوكس كەشىن سىيلاۋعا بارىمىزدى سالامىز», دەيدى پروموۋتەر. 

سوندەرس 23 ماۋسىمدا وتانداسى مارتين ميۋررەيمەن (36-4-1, 17 كو) جۇدىرىقتاسىپ, WBO بەلدىگىن قورعاۋى قاجەت ەدى. بىراق ءبيلليدىڭ جاراقاتىنا بايلانىستى جەكپە-جەك وتپەي قالدى. 

العاشقى ترانسفەر – 49 ملن ەۋرو 

يتاليانىڭ «ناپولي» كلۋبىنىڭ جارتىلاي قورعاۋشىسى جورجينو جاقىن كۇندەرى «مانچەستەر سيتي» ساپىنا قوسىلادى. بۇل تۋرالى Sky Sports ءتىلشىسى فابريتسيو رومانو ءوزىنىڭ تۋيتتەر پاراقشاسىندا مالىمدەدى. 

شەتەلدىك باق وكىلدەرى تاراتقان اقپاراتقا قاراعاندا «قالالىقتار» 26 جاستاعى فۋتبولشى ءۇشىن يتاليا ۆيتسە-چەمپيونىنا 49 ملن ەۋرو تولەيدى. بىراق بۇل سوما بىرقاتار بونۋستاردىڭ ەسەبىنەن الىنۋى مۇمكىن. مالىمەت ورنىنا ايتا كەتەيىك, جورجينو وتكەن ماۋسىمدا «ناپولي» كلۋبى ساپىندا 39 ماتچقا شىعىپ, 4 گول سوققان.

دايىنداعان  ءالي بيتورە, «ەگەمەن قازاقستان»