ەلوردامىزدىڭ 20 جىلدىعىنا وراي مادەنيەت جانە سپورت مينيسترلىگىنىڭ قولداۋىمەن استاناداعى «سارىارقا» ۆەلوترەگىندە تۇڭعىش رەت «Voice of Astana» ءى حالىقارالىق فەستيۆالى ءوتتى.
ەسترادا انشىلەرى اراسىندا ۇيىمداستىرىلعان ونەر بايقاۋىنىڭ الەمنىڭ تۇكپىر-تۇكپىرىن قامتىعان گەوگرافيالىق اۋقىمىنىڭ كەڭدىگىمەن قاتار, فەستيۆال باعدارلاماسىنىڭ قازاقتىڭ ءبىرتۋار دارىنى, ءانشى باتىرحان شۇكەنوۆتى ەسكە الۋعا باعىتتالۋى كوپشىلىك قاۋىمنىڭ كوڭىلىن ەرەكشە سەرپىلتتى.
– بۇگىندە استانا – بەيبىتشىلىك پەن تولەرانتتىلىقتىڭ سيمۆولى. وسىناۋ 20 جىلدىڭ ىشىندە ەلوردامىز ونەردىڭ سان ءتۇرىن ءبىر ارنادا توعىستىرعان ەۋرازيالىق كەڭىستىكتەگى اسا ءىرى مادەني ورتالىققا اينالىپ ۇلگەردى. باس شاھار تورىندە تۇڭعىش رەت ءوتىپ جاتقان «Voice of Astana» ءى حالىقارالىق فەستيۆالىنىڭ كوركەمدىك ءھام مازمۇندىق دەڭگەيى سونىڭ ايعاعى. بۇل فەستيۆال ارقىلى جاقىن جانە الىس شەت ەلدەردىڭ ۇزدىك ورىنداۋشىلارى مەن مادەنيەت قايراتكەرلەرى اراسىنداعى شىعارماشىلىق ىنتىماقتاستىقتىڭ جاڭا فورمالارىن دامىتۋ قاجەت», – دەپ اتاپ كورسەتتى ا.مۇحامەدي ۇلى.
2018 جىلدىڭ 25 مامىرىنا دەيىن جالعاسقان ىرىكتەۋ كەزەڭىندە «Voice of Astana» بايقاۋىنا 20-دان استام شەت ەلدەن 18 بەن 35 جاس ارالىعىنداعى بارلىعى 600-گە جۋىق ءانشى مەن ءتۇرلى مۋزىكالىق توپتان قۇرالعان ۇمىتكەرلەردىڭ ءوتىنىمى قابىلداندى. ولاردىڭ ىشىندە وتاندىق قاتىسۋشىلاردان بولەك, رەسەي, ازەربايجان, گرۋزيا, ۇلىبريتانيا, يتاليا, بولگاريا, ەستونيا, قىرعىزستان, قىتاي, ءۇندىستان, تۇركيا, تاتارستان, يزرايل, ارمەنيا, وزبەكستان ەلدەرىنىڭ تالانتتى ونەرپازدارى بار. بۇل جونىندە اتالعان بايقاۋدىڭ قازىلار القاسىنىڭ مۇشەسى, قازاقستاننىڭ ەڭبەك سىڭىرگەن ءارتىسى, بەلگىلى مۋزىكانت بايعالي سەركەباەۆ: «مۋزىكامەن ءومىر سۇرەتىن دارىندى جاستارمەن ءاردايىم قۋانا تانىسامىن. ءارى جاڭا ەسىمدەردى ۇنەمى باقىلاپ جۇرەمىن. «جۇلدىزدار فابريكاسىندا» ءبىز Jigits توبىن جينادىق. وسى جولى دا كوپتەگەن جاڭا ەسىمدەر تۋاتىندىعىنا سەنىمدىمىن» – دەپ بايقاۋ بولاشاعىنىڭ جارقىن ءارى عۇمىرلى بولاتىنىنا زور سەنىم ءبىلدىردى.
بايعالي ەرمەك ۇلىنىڭ ايتۋىنشا, «Voice of Astana» بايقاۋىنىڭ بيىلدان باستاپ جىل سايىن ۇيىمداستىرىلاتىنى كوپتەگەن تالانتتى جاس ورىنداۋشىلاردىڭ جۇلدىزىنىڭ جانىپ, ونەر الەمىنە باتىل قادام باسۋىنا ۇلكەن مۇمكىندىك سىيلايدى. ونداي مىسالدار الەمدىك مۋزىكا تاجىريبەسىندە از ەمەس. ماسەلەن, تاريحى 1951 جىلدان باستاۋ الاتىن «سان-رەمو» يتاليا اندەرىنىڭ فەستيۆالى, سول سەكىلدى 1956 جىلدان بەرى ۇزدىكسىز ۇيىمداستىرىلىپ كەلە جاتقان «ەۆروۆيدەنيە» مەن 2002 جىلدان بەرى تمد اۋماعىنا اسا تانىمال ونەر دوداسى – «نوۆايا ۆولنا» ءان بايقاۋلارى مۋزىكا مامانىنىڭ جوعارىدا كەلتىرگەن پىكىرىن تولىقتاي قۋاتتايدى.
«Voice of Astana» بايقاۋىنىڭ جارتىلاي فينالىندا قاتىسۋشىلار وسى شاراعا ارنايى جازىلعان ەلىمىزدىڭ باس قالاسى – استانا تۋرالى اۆتورلىق اندەردى شىرقاسا, اقتىق دودادا ءوز رەپەرتۋارىنداعى ۇزدىك تۋىندىلاردى كوپشىلىك قاۋىم مەن مۋزىكا ماماندارىنىڭ تالقىسىنا ۇسىندى. مادەنيەت جانە سپورت ءمينيسترى ارىستانبەك مۇحامەدي ۇلى, قازاقستاننىڭ ەڭبەك سىڭىرگەن ءارتىسى بايعالي سەركەباەۆ, رەسەي فەدەراتسياسىنىڭ ەڭبەك سىڭىرگەن ءارتىسى ۆالەري مەلادزە, 31 ارنانىڭ باس ديرەكتورى باعدات قوجاحمەتوۆ, حالىقارالىق «ەۆروۆيدەنيە» جانە بالالار «ەۆروۆيدەنيە» بايقاۋلارى باسقارماسىنىڭ مۇشەسى نيكولا كاليگيورە جانە Discover Silk Road Star-دىڭ باس ديرەكتورى باستاعان ونەر مايتالماندارى قازىلىق ەتكەن بايقاۋدا ۆوكاليستەرگە ورىنداۋ شەبەرلىگى مەن ارتىستىك ونەر, ساحنالىق تارتىمدىلىق ءھام زالدى يگەرۋ تالاپتارى تۇرعىسىنان باعا بەرىلدى.
بايقاۋ قورىتىندىسى بويىنشا, قازىلار القاسىنىڭ شەشىمىمەن ءىىى ورىن مەن بايقاۋ لاۋرەاتى اتاعى ازەربايجاندىق ونەرپاز يلحام نازاروۆقا تابىس ەتىلدى. ءىى ورىندى قىتايلىق لين باو مەن ۋكراينادان كەلگەن قاتىسۋشى تاتيانا دوكانينا تەڭدەي بولىسسە, ءى ورىن مەن بايقاۋ لاۋرەاتى اتاعى Goldstone ( ۇلىبريتانيا) مەن بەردىبەك قۇلعاراەۆتىڭ (قازاقستان) قانجىعاسىنا بايلاندى. ال فەستيۆالدىڭ باستى جۇلدەسى – گران-پري مەن «استانا داۋىسى» قۇرمەتتى اتاعى جانە قوماقتى قارجىلاي سىيلىققا گرۋزيادان كەلگەن تالانتتى ونەرپاز اۆيتانديل ابەسلاميدزە لايىق دەپ تانىلدى.
سونداي-اق «Voice of Astana» ءى حالىقارالىق فەستيۆالىنىڭ اياسىندا ۆالەري مەلادزە, لەونيد اگۋتين, ۆلاديمير پرەسنياكوۆ, الەكسەي چۋماكوۆ, يۋلياننا كاراۋلوۆا, ەلينا چاگا, «A-Studio» توبى, روزا رىمباەۆا, كارينا ابدۋللينا, مەيرامبەك بەسباەۆ, جۇبانىش جەكسەن ۇلى, ءدىلناز احماديەۆا, JCS توبى, ايقىن تولەپبەرگەن, دينارا سۇلتان, ءالي وقاپوۆ, The Jigits, اعايىندى جۇگىنىسوۆتەر, Vox Acapella توبى باستاعان قازاقستاندىق جانە رەسەيلىك بەلگىلى ەسترادا انشىلەرىنىڭ قاتىسۋىمەن وتكەن باتىرحان شۇكەنوۆتى ەسكە ارنالعان كونتسەرت پەن قازاقستاننىڭ ەڭبەك سىڭىرگەن ءارتىسى بايعالي سەركەباەۆتىڭ شىعارماشىلىق كەشى دە ونەر دۋمانىنىڭ كورىگىن قىزدىرىپ, قالا تۇرعىندارى مەن قوناقتارىنا مەرەكەلىك كوڭىل سىيلادى.
نازەركە جۇماباي,
«ەگەمەن قازاقستان»