كەشە قازاقستان قور بيرجاسى (KASE) كۇندىزگى ساۋدا سەسسياسىنىڭ ناتيجەلەرىن جاريالادى. ساۋداعا KASE ۆاليۋتالىق نارىعىنىڭ 22 مۇشەسى قاتىستى.
وتكەن اپتانىڭ باسىندا بايقالعان اقش دوللارىنىڭ قىمباتتاۋ قارقىنى ءالى باسەڭدەر ەمەس. كەشەگى ساۋدا سەسسياسىندا ونىڭ باعامى 1 دوللارعا شاققاندا 339,15 تەڭگەنى قۇراپ, تاۋلىك ىشىندە 2 تەڭگەگە كوتەرىلگەنىن كورسەتتى.
تەڭگەنىڭ السىرەۋىنە قاتىستى وتكەن اپتانىڭ سوڭىندا ۇلتتىق بانك توراعاسى دانيار اقىشەۆتىڭ تۇسىنىكتەمە بەرگەنىن ايتا كەتەيىك. ونىڭ ايتۋىنشا, حالىقتىڭ شەتەلگە دەمالىسقا بارۋ ماۋسىمى سۇرانىستىڭ كوتەرىلۋىنە ىقپال ەتكەن فاكتورلاردىڭ ءبىرى دەۋگە بولادى. قولما-قول اقشانى تەڭگەدەن اقش دوللارىنا ايىرباستاۋ وسى مەزگىلدە كوبەيەدى. تەڭگەنىڭ باعامىنا كەرى اسەر ەتكەن باسقا دا سەبەپتەر بار.
– دامۋشى نارىقتاردىڭ ۆاليۋتالارىنا قاتىستى اقش دوللارىنىڭ نىعايۋى جانە اقش-تىڭ فەدەرالدىق رەزەرۆىنىڭ پايىزدىق مولشەرلەمەلەرىنىڭ ۇلعايۋى تەڭگەنىڭ اقش دوللارىنا باعامىنىڭ ىقپال ەتكەن فاكتورلاردىڭ ءبىرى بولىپ تابىلادى, – دەپ ءتۇسىندىردى د. اقىشەۆ.
ول قازاقستاننىڭ نەگىزگى ساۋدا ارىپتەسى – رەسەيگە سالىنعان سانكتسيالار كاپيتالدىڭ رەسەيدەن اكەتىلۋىن كۇشەيتكەندىگىن اتاپ ءوتتى. اقش-تىڭ سانكتسيالارى رۋبل باعامىنىڭ السىرەۋىنە اكەلىپ سوقتىردى, ال بۇل تەڭگە باعامىن قالىپتاستىرۋ فاكتورلارىنىڭ ءبىرى.
«استانا» حقو: قىتاي بانكىمەن بايلانىس كۇشەيدى
تاياۋدا احقو باسقارۋشىسى قايرات كەلىمبەتوۆ پەن قىتاي بانكىنىڭ اتقارۋشى ۆيتسە-پرەزيدەنتى جەن دەتسي ستراتەگيالىق سەرىكتەستىك تۋرالى مەموراندۋمعا قول قويدى.
وسى مەموراندۋم اياسىندا تاراپتار جوعارى ساپالى سەرۆيستى قامتاماسىز ەتۋ جانە جاڭا بانك ونىمدەرىن ازىرلەۋ ءۇشىن ترانسشەكارالىق بيزنەستى ودان ءارى دامىتۋدىڭ مۇمكىندىكتەرىن بىرلەسىپ زەردەلەۋگە نيەتتى.
– قىتاي بانكى – الەمدەگى ەڭ جەتەكشى قارجى ينستيتۋتتارىنىڭ ءبىرى, سوندىقتان ونىڭ تاجىريبەسى احقو-نى قارجى قىزمەتتەرىنىڭ وڭىرلىك حابى رەتىندە قالىپتاستىرۋ ءۇشىن وتە ماڭىزدى. بانك سەرىكتەستەرىنىڭ جاھاندىق جەلىسى احقو-عا وزىق قارجى تەحنولوگيالارىن تارتۋعا كومەكتەسەدى, – دەدى ق.كەلىمبەتوۆ.
جاقىندا «استانا» حقو الاڭىندا قىتاي مەملەكەتتىك دامۋ بانكىنىڭ (قمدب) رەسمي وكىلدىگىنىڭ اشىلعانىن ايتا كەتەيىك. بۇل قمدب-نىڭ ورتالىق ازياداعى ءبىرىنشى, ال الەمدەگى جەتىنشى وكىلدىگى ەكەنىن ايتا كەتەيىك. اتالعان بانكتىڭ وكىلدىكتەرى بار لوندون, ماسكەۋ, ريو-دە-جانەيرو سىندى شاھارلاردىڭ ساناتىنا ەندى استانا دا قوسىلىپ وتىر.
«قارا التىن» قۇنى قۇلدىراي باستادى
مۇناي باعاسى سوڭعى التى اپتانىڭ ىشىندەگى ەڭ تومەنگى دەڭگەيگە قۇلدىراپ, Brent ماركالى 1 باررەل – 74,1 $-عا تەڭەستى.
ساراپشىلاردىڭ پايىمداۋىنشا, «قارا التىن» قۇنىنىڭ تومەندەۋىنە ىقپال ەتكەن باستى سەبەپتەردىڭ ءبىرى – اقش پەن قىتاي اراسىنداعى ساۋدا تەكەتىرەستەرىنىڭ تولاستاماۋى. ينۆەستورلار وپەك-كە مۇشە- مەملەكەتتەر مينيسترلەرىنىڭ وتىرىسىنان قانداي ناتيجە كۇتىپ وتىرعانى دا باعا ساياساتىنا اسەر ەتۋدە. مۇناي ەكسپورتتاۋشى مەملەكەتتەردىڭ مينيسترلەرى وسى وتىرىستا كومىرسۋتەگىن ءوندىرۋ كولەمىنە قاتىستى شەشىم قابىلداۋعا ءتيىس.
دايىنداعان
ارنۇر اسقار, «ەگەمەن قازاقستان»