ناتاليا جۇمادىلداەۆا: مۇعالىمدەرگە ارتىق مىندەت جۇكتەلۋدە

2017 جىلدان ءبىلىم جانە عىلىم مينيسترلىگى ۇبت-نى ەكى كەزەڭگە ءبولۋ تۋرالى شەشىم قابىلدادى. بۇل فورمات بويىنشا ورتا ءبىلىم تۋرالى اتتەستات الۋ ءۇشىن تۇلەكتەر مەكتەپتە ەمتيحان تاپسىرىپ, ال جوو-عا ءتۇسۋ ءۇشىن ۇبت تاپسىرۋعا ءتيىستى بولدى. ءسويتىپ جوو-عا تۇسۋدە وقۋشىلاردىڭ ءبىلىم ساپاسىن جاڭاشا باعالاۋ قولعا الىندى. الايدا, جوو-عا ءتۇسۋ تۋرالى ءوتىنىش تاپسىرۋ, قاجەتتى قۇجاتتاردى جيناۋ, ولاردى ۇبت پۋنكتتەرىنە وتكىزۋ, سونداي-اق ابيتۋريەنتتىڭ ەمتيحانعا قاتىسۋىن قامتاماسىز ەتۋ مەكتەپكە جۇكتەلگەن.

وسىنىڭ ءوزى ەشقانداي قۇقىقتىق نورمالارمەن رەتتەلمەيتىن ءتارتىپ, ويتكەنى مەكتەپ قولىنا اتتەستات تاپسىرعاننان كەيىن تۇلەكپەن قوش ايتىسىپ, وزدەرىنىڭ قاتارىنان شىعارادى ەمەس پە؟ تۇلەكتىڭ ەندىگى ءىسى جوو-مەن بولسا, بۇعان مەكتەپتىڭ قانداي قاتىسى بار؟

مىنە, بيىل دا 15 ماۋسىمدا مەكتەپ بىتىرۋشىلەر اتتەستاتسيا قورىتىندىسىمەن اتتەستاتتارىن قولدارىنا الادى. وسى ساتتەن باستاپ ولار مەكتەپ وقۋشىسى ەمەس, ەندى ابيتۋريەنت رەتىندە جوو-لارمەن قۇقىقتىق قاتىناسقا تۇسەدى. دەمەك مۇعالىمدەردىڭ موينىنان ولاردى جوو-لارعا اپارۋ, قۇجاتتارىن دايىنداتۋ سياقتى مىندەتتەر الىنۋى كەرەك ەدى. الايدا ءبىلىم جانە عىلىم ءمينيسترى ەرلان ساعاديەۆ مۇعالىمدەرگە ارتىق مىندەت جۇكتەمەيتىنىن تالاي رەت ايتسا دا ءوزىنىڭ بۇيرىقتارىمەن ولاردىڭ موينىنا ءتيىستى ەمەس فۋنكتسيالاردى ىلۋدەن جالىقپاۋدا.

وسىعان بايلانىستى ءبىز پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداپ, ءبىلىم جانە عىلىم مينيسترلىگى تاراپىنان ورىن الىپ وتىرعان وسى كەلەڭسىزدىكتى جويۋىن وتىنۋگە ءماجبۇر بولىپ وتىرمىز. اتاپ ايتقاندا, ءبىز ە.ساعاديەۆتىڭ بۇيرىعىمەن بەكىتىلگەن ۇبت جانە كەشەندى تەستىلەۋ تۋرالى ەرەجەدەگى №1 پاراگرافتى («ۇبت-عا قاتىسۋ قۇجاتتارىن ءبىلىم بەرۋ ۇيىمدارى ارقىلى قابىلداۋ ءتارتىبى») الدىرىپ تاستاۋعا تىكەلەي ءوزىڭىزدىڭ ارالاسۋىڭىزدى سۇرايمىز. بۇل ساۋالدى قولداپ 20 شاقتى دەپۋتات قولىن قويدى. ارىپتەستەرىمىزدىڭ ءبارى دە جۇمىستارى ونسىز دا كوپ مۇعالىمدەرگە ارتىق مىندەت جۇكتەۋدىڭ دۇرىس ەمەستىگىن قولداپ وتىر.

ناتاليا جۇمادىلداەۆا,

ءماجىلىس دەپۋتاتى