الەم چەمپيوناتىنىڭ العاشقى كۇندەرى ءارتۇرلى كوڭىل سىيلادى. ۇيىمداستىرۋ جاعى سىنعا الىنىپ, قوناق بولىپ كەلگەن جانكۇيەرلەر اۋىر جاعدايعا ءتۇستى. دەگەنمەن سوعىلىپ جاتقان گولدار مەن كوماندالاردىڭ ونەرى كۇتكەننەن دە ارتىق بولۋدا. ال ازىرگە ەۋروپا فۋتبولى ۇستەمدىك قۇرىپ تۇرعانى انىق.
ەكاتەرينبۋرگتەگى بوس تريبۋنالار
ەكاتەرينبۋرگ قالاسىنداعى ستاديوندا وتكەن مىسىر مەن ۋرۋگۆاي ويىنىندا بوس تريبۋنالار بولدى. تەلەكورسەتىلىمدە بۇل جاعداي انىق بايقالىپ, الەمدىك ءباسپاسوز قازىر رەسەيدى ۇيىمداستىرۋ جاعىنان سىنعا الدى. الەمدە كوپتەگەن ادامدار مۋنديال كورە الماي, ساندالىپ بيلەت تاپپاي جۇرگەندە بۇل قالاي بولدى دەيدى؟ ونىڭ دا بىرنەشە جاۋابى بار. ەڭ قاراپايىمى, سول ويىننىڭ الدىندا بيلەتتەر ساتىلىمعا شىققاندا ەلەكتروندى قىزمەتتەر ىستەن شىققان. ياعني وعان فيفا-نىڭ دا قاتىسى بار. جۇيەدەن اقاۋ كەتىپ, كورەرمەندەر كەرەكتى بيلەتتەرىن الا الماپتى. بيلەت ساتاتىن سايت قازىر رەتتەلىپ, قالپىنا كەلتىرىلدى.
رونالدۋدىڭ سولوسى
چەمپيوناتتا بولعان ازىرگە ەڭ تارتىستى ماتچ يسپانيا مەن پورتۋگاليا اراسىندا ءوتتى. وسىنىڭ الدىندا وتكەن ويىنداردىڭ بارلىعى اسا قاتتى تارتىستى بولا قويماپ ەدى. فۋتبول ماماندارى ءتىپتى گولدار از سوعىلىپ جاتىر, ويىندار قىزىق ەمەس دەپ تە قوبالجي باستاعان. بىراق كريشتيانۋ رونالدۋدىڭ حەت-تريگى چەمپيوناتتى قىزدىرا ءتۇستى. الما-كەزەك گول سوعىپ, تارازى باسىن ءارلى-بەرلى تەڭسەلتكەن ويىننىڭ ەڭ سوڭعى ەسەبى 3:3 بولدى. ال رونالدۋدىڭ سوڭعى مينۋتتا ايىپ دوبىنان سوققان گولى بيىلعى چەمپيوناتتاعى ادەمى گول بولىپ تۇر. ارينە ۋاقىتشا دەپ سەنەيىك.
جۋرناليستەر قاۋىمى رونالدۋدىڭ بۇل ەرلىگىن اسىرا جازىپ, ماقتاۋىن كەلىستىرىپ جاتىر. بيىلعى «التىن دوپتى» پورتۋگالدىق ويىنشى الۋى ءتيىس دەپ ەرتە باستان پىكىر ايتقاندار دا جوق ەمەس. چەمپيوندار ليگاسىن جەڭىپ, الەم چەمپيوناتىندا دا اتوي سالسا, «التىن دوپتى» رونالدۋ الماعاندا كىم السىن؟ الايدا چەمپيونات تەك ەندى عانا باستالدى.
مەسسي ءمۇلت كەتتى
رونالدۋ بار قىرىنان كورىنىپ پورتۋگاليانى جالعىز سۇيرەپ جۇرگەن سوڭ, مەسسي دە سولاي ونەر كورسەتۋى ءتيىس بولدى. ليونەل دە ارگەنتينانى العا جەتەلەپ شىقتى. يسلاندياعا قارسى وتكەن ويىن ىڭعايسىز ءارى ساتسىزدىكپەن ءورىلدى. ەسەپ 1:1 بولىپ تەڭ اياقتالعانىمەن, ارگەنتينا بۇل ناتيجەگە قاناعاتتانبادى. ويىن بارىسىندا مەسسي دە پەنالتيدەن گول سوعا المادى. لەو سوڭعى تەپكەن 7 پەنالتيىنىڭ 4-ءىن سوقپادى. ال جالپى العاندا, وسى بىرىنشىلىكتە 2 رەت پەنالتي گولعا اينالمادى. 2014 جىلمەن سالىستىرعاندا بۇل ەندىگى بىرەۋگە ارتىق. برازيلياداعى چەمپيوناتتا تەك ءبىر عانا پەنالتي قيىس تەبىلدى. فرانتسيا شابۋىلشىسى كاريم بەنزەما ءمۇلت كەتكەن بولاتىن.
7 جانكۇيەردى قاعىپ كەتتى
ماسكەۋدىڭ قاق ورتاسىندا 7 جانكۇيەردى تاكسي قاعىپ كەتتى. جول ساقشىلارىنىڭ مالىمدەۋىنشە, تاكسي جۇرگىزۋشىسى قىرعىزستان ازاماتى ەكەن. اۆتوكولىكتىڭ تىزگىنىندە وتىرعان ول قالعىپ كەتىپ جول جيەگىنە شىققان. سونىڭ سالدارىنان 7 جولاۋشى زارداپ شەككەن. ولاردىڭ ىشىندە ەكەۋى مەكسيكا قۇراماسىنىڭ جانكۇيەرى ەكەندىگى دە انىقتالدى. ەڭ باستىسى, ەشكىم اسا قاتتى اۋىر جاراقات الماعان.
قيىن جاعدايعا تۇسكەن تاكسي جۇرگىزۋشىسى وقيعا ورنىنان قاشىپ كەتكەن. بىراق كەيىننەن ۇستالىپ, ءوز كىناسىن موينىنا الدى. پوليتسەيلەرگە ايتقان جالعىز ءۋاجى – 20 ساعات بويى ۇيىقتاماي, رولدە بولىپتى.
دايىنداعان ەرمۇحامەد ماۋلەن,
«ەگەمەن قازاقستان»