استاناداعى تاۋەلسىزدىك سارايىندا ۇلتتىق دومبىرا كۇنىن ۇيىمداستىرۋ مەن وتكىزۋ شارالارىن كەڭىنەن ناسيحاتتاۋعا باعىتتالعان ءباسپاسوز ءماسليحاتى ءوتتى.
جيىنعا استانا قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ, پارلامەنت ءماجىلىسىنىڭ دەپۋتاتى, قازاقستان رەسپۋبليكاسىنىڭ ەڭبەك سىڭىرگەن ءارتىسى بەكبولات تىلەۋحان, قازاقستاننىڭ ەڭبەك سىڭىرگەن ءارتىسى, كۇيشى سەكەن تۇرىسبەك, پروفەسسور, كۇيشى ايتجان توقتاعان جانە استانا قالاسى اكىمدىگىنىڭ مەملەكەتتىك اكادەميالىق فيلارمونياسى قازاق وركەسترىنىڭ كوركەمدىك جەتەكشىسى ءارى باس رەجيسسەرى, كومپوزيتور ايتقالي جايىموۆ قاتىستى.
ەلباسى نۇرسۇلتان نازارباەۆتىڭ جارلىعىمەن بەكىتىلگەن جاڭا مەيرام – ۇلتتىق دومبىرا كۇنى جىل سايىن شىلدە ايىنىڭ العاشقى جەكسەنبىسىندە اتالىپ وتىلەتىن بولادى. بيىل بۇل مەرەكەنىڭ تۇساۋكەسەرى 1 شىلدەگە تۋرا كەلىپ وتىر. ايتۋلى دومبىرا دۋمانىنا قاتىسۋعا قازىردىڭ وزىندە 1300-دەن اسا ءوتىنىم كەلىپ تۇسكەن.
– ۇلتتىق دومبىرا كۇنىنە وراي ەلىمىزدىڭ مىڭداعان مۋزىكانت دومبىراشىسىنىڭ قاتىسۋىمەن وتەتىن «دومبىرا – اسىل مۇرا» اتتى كونتسەرت اتالعان مەرەكەنىڭ كوركىن كەلتىرىپ, قازاق دالاسىن ۇلتتىق اسپاپتىڭ كۇمبىرىنە بولەيتىنى ءسوزسىز. ايتۋلى شارادا ونەر جاناشىرلارى تانىمال قوعام قايراتكەرلەرى سەكەن تۇرىسبەك, بەكبولات تىلەۋحان, ايتجان توقتاعان, ايتقالي جايىموۆ, ايگۇل ۇلكەنباەۆا, نۇرجان تاجىكەنوۆ, اسىلبەك ەڭسەپوۆ, «ارت دومبىرا» تريوسى مەن «مۋزارت» توبى باستاعان ونەرپازداردىڭ ونەرىن تاماشالايدى. سونىمەن قاتار اتالعان شارانىڭ تاعى ءبىر ەرەكشەلىگى – مەرەكەلىك كونتسەرتكە asyldombyra.kz سايتىندا ونلاين تىركەلىپ, «كوڭىلاشار», «اداي», «بالبىراۋىن», «سارىارقا», «ەركە سىلقىم» كۇيلەرىن جاتقا بىلەتىن كەز كەلگەن ورىنداۋشى قاتىسا الادى. ارقا ءتوسىن كۇمبىرلەگەن دومبىرا ۇنىنە, ۇلتتىق رۋحقا بولەيتىن مۇنداي اۋقىمدى شارا ەلوردادا بۇرىن-سوڭدى بولعان ەمەس», – دەپ ب.ماجاعۇلوۆ ايتۋلى دۋماننىڭ نەگىزگى ەرەكشەلىگى مەن ماڭىزىنا توقتالىپ ءوتتى.
جوعارىدا اتالعان تىزىمنەن بولەك, باس شاھارداعى ۇلتتىق دومبىرا كۇنىن مەرەكەلەۋگە, سونداي-اق قۇرمانعازى اتىنداعى قازاق مەملەكەتتىك ۇلتتىق اسپاپتار وركەسترى, «وتىرار سازى» ۇلتتىق اسپاپتاردىڭ فولكلورلىق-ەتنوگرافيالىق وركەسترى, استانا قالاسىنىڭ مەملەكەتتىك اكادەميالىق فيلارمونياسىنىڭ ۇلتتىق اسپاپتار وركەسترى جانە اقتاۋ قالاسىنىڭ قازاق ۇلتتىق اسپاپتار وركەسترى ارنايى كەلىپ ونەر كورسەتەدى.
مادەنيەت جانە سپورت باسقارماسىنىڭ باسشىسى بولات باۋىرجان ۇلىنىڭ ايتۋىنشا, ۇلتتىق دومبىرا كۇنىنىڭ قۇرمەتىنە استانادا حالىقتىق سەرۋەن ۇيىمداستىرۋ جوسپارلانۋدا. مۇندا ونەر جانكۇيەرلەرى مەن قالا قوناقتارى اتالعان شاراعا ارنايى تىگىلگەن كيىز ۇيلەردىڭ ىشىنەن دومبىرادان بولەك, باسقا دا ۇلتتىق اسپاپتاردىڭ سان الۋان ءتۇرىن كورىپ, ولاردىڭ تاريحىمەن تانىسۋعا مۇمكىندىك الادى. كاسىبي مۋزىكانتتار حالىق شىعارمالارىن ورىندايدى. سونىمەن قاتار ءدال وسى كۇنى جينالعان قاۋىم دومبىرا جاساۋ بارىسىمەن تانىسىپ, «قازاق ەلى» مونۋمەنتى الدىنداعى الاڭدا ورتەكە ونەرىن دە تاماشالاي الادى.
– 1 شىلدەدە «قازاق ەلى» مونۋمەنتىنىڭ الدىنداعى الاڭدا حالىقتىق سەرۋەن وتەدى. كيىز ۇيلەر تىگىلىپ, قازاق ۇلتتىق اسپاپتارىنىڭ مۋزەيى اشىلادى. مۋزەيدە قۇرمانعازى, دينا نۇرپەيىسوۆا, احمەت جۇبانوۆ جانە تاعى دا باسقا كوپتەگەن كۇي ونەرى شەبەرلەرىنىڭ تارتقان دومبىرالارى كوپشىلىك نازارىنا ۇسىنىلادى. ويتكەنى دومبىرانىڭ قازاق ومىرىنەن الار ورنى ۇلكەن. وسكەلەڭ ۇرپاقتى ۇلتجاندىلىققا, رۋحاني تەرەڭدىككە تاربيەلەيمىز دەسەك, بۇل شارانىڭ ءمانى وراسان. بۇعان ەلباسىمىز دا ءوزىنىڭ «رۋحاني جاڭعىرۋ» باعدارلامالىق ماقالاسىندا ايرىقشا نازار اۋدارتقان بولاتىن. دومبىرا سەكىلدى باسقا ەشبىر مۋزىكالىق اسپاپ ۇلتىمىزدى وسىلاي بىرىكتىرىپ, رۋحىمىزدى كوتەرە الامايدى», – دەدى ب.ماجاعۇلوۆ.
كومەيىنەن كۇمبىرلى كۇي توگىلگەن قاسيەتتى قازاق اسپابى, مىنە, ەندى ءداستۇرلى تۇردە جىل سايىن ۇلتتىق دەڭگەيدە اتالىپ وتىلەتىن بولادى. مەملەكەت باسشىسى نۇرسۇلتان نازارباەۆتىڭ قولداۋىمەن جۇزەگە اسىپ جاتقان ايتۋلى دومبىرا دۋمانى استانانىڭ 20 جىلدىعىنا ۇلكەن تارتۋ بولادى دەپ كۇتىلۋدە.
نازەركە جۇماباي,
«ەگەمەن قازاقستان»