قىزىلجار وڭىرىنە ارنايى ىسساپارمەن كەلگەن پارلامەنت ءماجىلىسىنىڭ دەپۋتاتتارى دەنساۋلىق ساقتاۋ نىساندارىن ارالاپ, بىرقاتار پروبلەمالارعا نازار اۋداردى.
حالىق قالاۋلىلارى پەريناتالدىق , كارديولوگيالىق ورتالىقتاردا, № 3 اۋرۋحانانىڭ جۇقپالى اۋرۋلار بولىمشەسىندە بولىپ, جاعدايمەن تانىستى.
پەريناتالدىق ورتالىق زاماناۋي قۇرال-جابدىقتارمەن 76 پايىز جابدىقتالعان. مۇندا جىل سايىن ورتا ەسەپپەن 5 مىڭعا جۋىق ءسابي دۇنيەگە كەلەدى.
كارديولوگيالىق ورتالىقتا دا قالىپتاسقان تاجىريبەلەر از ەمەس. جىلىنا جۇرەككە 600-گە جۋىق وتا جاسالادى.
«نۇر وتان» پارتياسىنىڭ «قازاقستان–2021: بىرلىك. تۇراقتىلىق. جاسامپازدىق» سايلاۋالدى باعدارلاماسىنىڭ «دەنساۋلىق» باعىتى بويىنشا وتكەن كوشپەلى كوميسسيا ءماجىلىسىن اشقان زاۋرەش امانجولوۆا ەلباسى جولداۋىنان تۋىندايتىن مىندەتتەرگە وراي اتقارىلىپ جاتقان مەديتسينالىق شارالاردىڭ ماڭىزدىلىعىن اتاپ ءوتتى.
دەنساۋلىق ساقتاۋ ءمينيسترىنىڭ ءورىنباسارى لاززات اقتاەۆا ەلىمىزدە مەنينگيت اۋرۋى تۇراقتى باقىلاۋعا الىنعانىن, ەشقانداي قاۋىپ جوق ەكەنىن جەتكىزدى. ونىڭ ايتۋىنشا قوستاناي, سولتۇستىك قازاقستان, شىعىس قازاقستان, پاۆلودار, اقمولا وبلىستارىندا وتكەن جىلى بالا تۋ كورسەتكىشى مەن حالىقتىڭ تابيعي ءوسىمى كەمىپ كەتكەن. سونداي-اق قىزىلجار وڭىرىندە انا ءولىمى, ينفەكتسيالىق جۇقپالى اۋرۋلار كورسەتكىشتەرى جوعارى.
ءماجىلىس دەپۋتاتتارى يۆان كليمەنكو, ولگا شيشيگينا, مارينە ميكاەليان جەرگىلىكتى جەرلەردە مەديتسينالىق سالانى جاقسارتۋ, قاۋىپتى دەرتتەردىڭ الدىن الۋ جايلى وي-پىكىرلەرمەن ءبولىستى.
ءومىر ەسقالي, «ەگەمەن قازاقستان»