ەرتەڭ قىتايدىڭ تسينداو قالاسىندا شانحاي ىنتىماقتاستىق ۇيىمىنىڭ XVIII ءسامميتى وتەدى. جيىنعا قازاقستان, رەسەي, قىتاي, وزبەكستان, قىرعىزستان, تاجىكستان, ءۇندىستان جانە پاكىستان ەلدەرىنىڭ كوشباسشىلارى قاتىسادى.
بۇگىن مەملەكەت باسشىسى نۇرسۇلتان نازارباەۆ قىتايدىڭ تسينداو قالاسىنا باردى. ەلباسى شانحاي ىنتىماقتاستىق ۇيىمىنىڭ XVIII سامميتىنە قاتىسادى. جيىن ەرتەڭ سارى تەڭىزدىڭ جاعالاۋىندا وتەدى. وعان قىتاي, قازاقستان, رەسەي, قىرعىزستان, تاجىكستان, پاكىستان, وزبەكستان جانە ءۇندىستان ەلدەرىنىڭ كوشباسشىلارى قاتىسادى. يران بولسا ۇيىمنىڭ تولىققاندى مۇشەسى بولۋعا نيەتتى.
تسينداوداعى جيىن – شانحاي ىنتىماقتاستىق ۇيىمىنىڭ «ۇلكەن ەۋرازيالىق سەگىزدىك» فورماتىنداعى ءبىرىنشى ءسامميتى. بىلتىر ءۇندىستان, پاكىستان سەكىلدى ەلدەردىڭ استانا سامميتىندە ۇيىمعا مۇشەلىككە ءوتۋى سەگىزدىكتىڭ سالماعىن ارتتىرا ءتۇستى. قۇرىلىم كەڭەيۋ ارقىلى گەوساياسي ىقپالىن كۇشەيتە تۇسپەك ءارى الىپ نارىق. شانحاي كەڭەسىندە تەرروريزمگە قارسى كۇرەس, شەكارا قاۋىپسىزدىگى, ەسىرتكى اينالىمىن تەجەۋ, سەپاراتيزم مەن ەكسترەميزم قاۋپىنىڭ الدىن الۋ سەكىلدى كۇردەلى ماسەلەلەر تالقىعا تۇسپەك. بۇلار ءبىر ەلگە عانا ءتان ەمەس, تۇتاس مەملەكەتتەردەگى حالىقارالىق دەڭگەيدە ۋشىققان ماسەلەلەر. كەسەلدەن قۇتىلۋدىڭ جالعىز جولى – بىرلەسىپ كۇرەسۋ. سامميت ناتيجەسى بويىنشا ناقتى ۇسىنىستار ازىرلەنىپ, تسينداو دەكلاراتسياسى قابىلدانادى دەپ كۇتىلۋدە.