بۇگىن فيلولوگيا عىلىمدارىنىڭ دوكتورى, پروفەسسور, تۇركىتانۋشى, رەسەي جانە قازاقستاننىڭ حالىقارالىق جوعارى مەكتەپ عىلىم اكادەميالارىنىڭ اكادەميگى, بەلگىلى مەملەكەت جانە قوعام قايراتكەرى, ەلشى-ديپلومات ءادىل احمەتوۆتىڭ «عاسىر عيبراتى» اتتى ءۇش بولىمنەن تۇراتىن كىتابىنىڭ تۇساۋكەسەرى ءوتتى.
جيىندى اشقان «ەگەمەن قازاقستان» رگ» اق باسقارما توراعاسى دارحان قىدىرالى اتالعان كىتاپتىڭ جاھاندانعان الەمنىڭ گەوساياسي كەلبەتىن ايشىقتايتىن تۋىندى ەكەنىن, جاستارعا باعىت بەرەر شامشىراق ىسپەتتى تاعىلىمدى ەڭبەك ەكەنىن اتاپ ءوتتى.
قالىڭ وقىرمانعا ارنالعان كىتاپقا اۆتوردىڭ ەگەمەن ەلىمىزدىڭ الەمدىك گەوساياساتتاعى دارا جولىن كورسەتەتىن ساراپتامالىق ماقالالارى توپتاستىرىلعان. بۇل رەتتە ءسوز العان ەلشى-ديپلومات ءادىل احمەتوۆ الەمدىك ديپلوماتيا مەن حالىقارالىق قاتىناستاردىڭ بۇگىنگى بولمىس-ءبىتىمى جايىندا تەرەڭىنەن ساراپتالعان تۋىندىنى ەل يگىلىگىنە ارناپ وتىرعانىن تىلگە تيەك ەتتى. «جيناققا ەنگەن ماقالالاردىڭ 99 پايىزى ءار جىلدارى «ەگەمەن قازاقستان» گازەتىندە جارىق كورگەن. ولاردى جاھاندىق گەوساياساتتىڭ بۇگىنگى-بولمىس ءبىتىمى, ونداعى قازاقستاننىڭ دارا جولى جانە مۇسىلمان الەمى دەپ ۇشكە ءبولدىم. كىتاپتا قازىرگى قۇبىلمالى گەوساياسات, كوش باسىندا تۇرعان امەريكانىڭ جاعدايى, قىتاي مەن ەۋروپا, سينگاپۋردىڭ جاعدايى تۋرالى پايىمدامالار بار. ساياسات سۇڭعىلالارى – زبيگنەۆ بجەزينسكي, گەنري كيسسيندجەر, دجوزەف ستيگليتس, دجەرەمي ريفكين عۇلامالاردىڭ كىتاپتارىن ءسۇزىپ شىعىپ, سونىڭ سينتەزىن ءوز ەلىمىزگە پايداسى تيەر-اۋ دەگەن ماقساتپەن توپتاستىردىم», - دەدى ءادىل احمەتوۆ جاڭا كىتاپتىڭ تانىستىرىلىمىندا.
«عاسىر عيبراتى» كىتابىنىڭ ەلەكتروندى نۇسقاسى «ەگەمەن قازاقستان» گازەتىنىڭ سايتىنا ورنالاستىرىلعان.
ءادىل قۇرمانجان ۇلى احمەتوۆ 1941 جىلى الماتى وبلىسى نارىنقول سەلوسىندا دۇنيەگە كەلگەن. 1963 جىلى الماتى شەت تىلدەرى ينستيتۋتىن اعىلشىن جانە قازاق ءتىلى ماماندىعى بويىنشا بىتىرگەن. كەيىنىرەك, وسى ينستيتۋتتا وقىتۋشى, اعا وقىتۋشى, دەكان, پرورەكتور, رەكتور قىزمەتتەرىن اتقارعان. ودان بولەك, ءادىل احمەتوۆ قر سىرتقى ىستەر ءمينيسترىنىڭ ءبىرىنشى ورىنباسارى (1999-2000), ۇلىبريتانياداعى توتەنشە جانە وكىلەتتى ەلشىسى (2000-2001) بولعان. 2001 جىلى قازاق-بريتان تەحنيكالىق ۋنيۆەرسيتەتىن قۇردى. 2007-2013 جىلدارى پارلامەنتى سەناتىنىڭ دەپۋتاتى, سەناتتىڭ حالىقارالىق قاتىناستار, قورعانىس جانە قاۋىپسىزدىك ماسەلەلەرى جونىندەگى تۇراقتى كوميتەت حاتشىسى جانە ەقىۇ سول كەزدەگى توراعاسىنىڭ مۇسىلمانداردى كەمسىتۋ جانە شەتتەتۋمەن كۇرەس جونىندەگى جەكە ۋاكىلى بولدى.