قىزىلوردالىق 8 مەملەكەتتىك قىزمەتشىنىڭ وتباسى ءوزارا تارتىسقا ءتۇسىپ, مىقتىلارىن انىقتادى.
«1 ماۋسىم – حالىقارالىق بالالاردى قورعاۋ كۇنىنە» وراي «مۇز ايدىنى» سپورت كەشەنىندە وتكىزىلگەن «اكەم, انام جانە مەن – سپورتتىق جانۇيا» اتتى وتباسىلىق سپارتاكياداعا قالا اكىمى اپپاراتىنىڭ, ادىلەت, قازىناشىلىق, كىرىستەر دەپارتامەنتتەرى مەن ەكونوميكا, اۋىلشارۋاشىلىعى, ءبىلىم باسقارمالارىنىڭ مەملەكەتتىك قىزمەتشىلەرىنىڭ وتباسىلارى قاتىستى.
جالپى, جىل باسىنان بەرى قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىنىڭ باستاماسىمەن مەملەكەتتىك قىزمەت ىستەرى ورگاندارىنىڭ جانە سىبايلاس جەمقورلىققا قارسى زاڭنامانىڭ 20 جىلدىعىن ۇلىقتاۋ اياسىندا ءتۇرلى ءىس-شارالار ۇيىمداستىرىلۋدا. وتباسىلىق سپارتاكيادا دا سول شارالاردىڭ ءبىرى.
وتباسىلىق جارىستى وتكىزۋدىڭ باستى ماقساتى مەملەكەتتىك قىزمەتشىلەر اراسىندا سالاۋاتتى ءومىر سالتىن قالىپتاستىرۋ, «دەنساۋلىق زور بايلىق» دەگەن ءسوزدى قوعامدا كەڭىنەن ناسيحاتتاۋ, جەمقورلىققا قارسى كۇرەستە وتباسىنىڭ ءرولىن ارتتىرۋ.
5 ەستافەتالىق ويىن تۇرىنەن قىزىق تا تارتىستى وتكىزىلگەن سپورتتىق سايىستا ءبىلىم باسقارماسىنان قاتىسقان ءابدىرامانوۆتار وتباسى جەڭىمپاز اتانسا, ادىلەت دەپارتامەنتىنەن ابدرەەۆتەر وتباسى جۇلدەلى ەكىنشى ورىندى جانە ەكونوميكا جانە بيۋدجەتتىك جوسپارلاۋ باسقارماسىنان مۋحيتدينوۆتار وتباسى ءۇشىنشى ورىندى يەلەندى.
جەڭىسكە جەتكەن وتباسىلار ارنايى كۋبوكپەن, ديپلومدارمەن جانە سىيلىقتارمەن ماراپاتتالدى. سپارتاكياداعا قاتىسقان بارلىق وتباسىلارعا العىس حات تابىستالىپ, بالالارعا سىيلىقتار بەرىلدى.